އެކްސްކޯ މެމްބަރަކު އިސްތިއުފާ ދޭވަރުކަމެއް ނުކުރަން: ލަތީބެ

ވޮލީބޯލް އެސޯސިއޭޝަންގެ އެކްސްކޯ މެމްބަރަކު އިސްތިއުފާ ދެއްވަން ޖެހިވަޑައިގަންނަވާ ވަރުގެ ކަމެއް ނުކުރައްވާކަމަށް އެ އެސޯސިއޭޝަންގެ ރައީސް މުހައްމަދު ލަތީފު ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން ލަތިބެ ވިދާޅުވީ، ވީއޭއެމްގެ އެކްސްކޯ އިން ބައެއް މެމްބަރުން އިސްތިއުފާ ދެއްވާފައިވާކަން ބައެއް މީޑިއާތަކަށް އަރާފައިވާތަން ފެނިފައިވާ ކަމަށާއި، އެހެންނަމަވެސް ރަސްމީކޮށް އެއްވެސް މެމްބަރަކު އިސްތިއުފާ ދެއްވިކަން އެބޭފުޅާއަށް އެނގިނުލައްވާ ކަމަށެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި ވީއޭއެމްގެ އެކްސްކޯއިން ފަސް މެމްބަރަކު ވަނީ އިސްތިއުފާ ދެއްވާފައެވެ. އެއީ މުހައްމަދު ޝަރަފު، މުހައްމަދު ޝާފިއު، އަލީ ލަތީފު، މުހައްމަދު ސާޖިދު އަދި އަބްދުﷲ ނަޝީދެވެ.

ލަތީބެ ވިދާޅުވީ، އެކްސްކޯ މެމްބަރުން އިސްތިއުފާ ދެއްވަންޖެހޭ އެއްވެސް ސަބަބެއް ނޯންނާނެ ކަމަށާއި، މައްސަލަ ޖެހިފައިވަނީ ސޮނޭވާ އާއި ވީއޭއެމްއާ ދެމެދު ކަމަށެވެ. އެގޮތުން ލަތީބެ ބުނީ ސޮނެވާގެ މެނޭޖްމަންޓްއާ ވާހަކަދައްކައިގެން މިހާރު އެކަންތައް ހައްލުކުރެވިފައިވާ ކަމަށެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި މައްސަލަ ޖެހިފައިވަނީ ސޮނެވާ ކޯޗު ސަސްޕެންޑުކުރަން ޑިސިޕްލިނަރީ ކޮމެޓީން ނިންމުމުން، އެ ނިންމުން ސޮނޭވާ އިން އެޕީލްކުރުމާއެކު، އެޕީލްސް ކޮމިޝަނުން ޑިސިޕްލިނަރީ ފިޔަވަޅު ތަންފީޒުކުރުން ފަސްކުރުމުންނެވެ.

"އެކްސޯ މެމްބަރުން އިސްތިއުފާ ދޭންޖެހޭ އެއްވެސް ސަބަބެއް ނެތް. ސޮނޭވާ އާއި ވީއޭއެމްއާ މައްސަލަ ޖެހުނީ. މިސްއަންޑަސްޓޭޑިންއެއް. މަޝްވަރާކޮށްގެން ސޮނޭވާއާ ޖެހުނު މައްސަލަ ހައްލުކުރެވުނު" ލަތީބެ ވިދާޅުވިއެވެ.

ސޮނެވާ ކޯޗު ސަސްޕެންޑުކުރަން ނިންމީ އިންޓަ ރިސޯޓު ވޮލީބޯލްގެ ޒޯން ފަހެއްގެ ފައިނަލްގައި އަނަންތަރާ ކިހާވަށް އަދި ސޮނެވާ ބައްދަލުކުރާ މެޗު ފެށުމަށް ވަގުތު ކުޑަތަންވެފައި ވަނިކޮށެވެ. އެހެންނަމަވެސް ފައިނަލް މެޗު ފެށުމުގެ 30 އަކަށް މިނެޓުކުރިން ސަސްޕެންޝަން ތަންފީޒުކުރުން އެޕީލް ކޮމިޝަނުން ވަނީ ހުއްޓުވާފައެވެ. އެގޮތުން ފައިނަލް މެޗު ކުޅުނު އިރު ސޮނެވާ ކޯޗު ބެންޗުގައި ހުއްޓެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ވީއޭއެމް އެކްސްކޯ މެމްބަރުން ހިތްހަމަނުޖެހުނީ ސޮނެވާގެ ކޯޗު ސަސްޕެންޑުކުރަން ނިންމި ނިންމުމަށް ނުފޫޒު ފޯރުވިކަމަށް ތުހުމަތުކޮށްފައެވެ.

އެހެންނަމަވެސް ލަތީބެ ބުނީ ޑިސިޕްލިނަރީ ކޮމެޓީގެ ނިންމުމުން ނިންމުމާއެކު އެޕީލް ކޮމިޝަނަށް ވަގުތުން އެކަން އެޕީލްކުރުމުން އެޕީލް ކޮމިޝަނުންވެސް ވަގުތުން އެ ކޮމިޝަނުގެ ނިންމުން ނިންމި ކަމަށެވެ. އެކަމަށް އޭނާ އެއްވެސް ނުފޫޒެއް ނުފޯރުވާ ކަމަށާއި، މީގެއިން ދައްކައިދެނީ ވީއޭއެމްގެ ހުރިހާ ގުނަވަންތައްވެސް ރަނގަޅަށް ހިނގާކަން ކަމަށެވެ. އެގޮތުން މިކަމާ އުފާކުރައްވާ ކަމަށްވެސް ލަތީބެ ވިދާޅުވިއެވެ.

"ޑިސިޕްލިން ކޮމެޓީން ސޮނޭވާ ކޯޗު ސަސްޕެންޑު ކުރަން ނިންމި. އެކަން އެޕީލްކުރި ސޮނެވާ އިން. މެޗަށްފަހު ސަސްޕެންޝަން ތަންފީޒުކުރަން އެޕީލްސް ކޮމިޝަނުން ނިންމީ. އެސޯސިއޭޝަންގެ ރައީސް ކުރި ކަމެއް ނޫން. އެސޯސިއޭޝަންގެ ގުނަވަންތައް ރަނގަޅަށް ހިނގަމުންދާތީ އުފާކުރަން" ލަތީބެ ވިދާޅުވި އެވެ.

ލަތީބެ ވިދާޅުވީ، އަދިވެސް މަޝްވަރާކޮށްގެން ހުރިހާ ކަމެއް ހައްލުވާނެ ކަމަށާއި، އެކްސްކޯ މެމްބަރުން އިސްތިއުފާ ދިންކަން މީޑިއާގެ ޒަރިއްޔާއިން އެގުމުން އެކަމާ ހިތާމަކުރައްވާ ކަމަށެވެ.

އެގޮތުން ލަތީބެ ވިދާޅުވީ، އެކްސްކޯގައި މިވަގުތު ތިބީ ވޮލީބޯލް ހިންގުމަށް އެންމެ ކުޅަދާނަ ބޭފުޅުންކަމަށާއި، އޭގެތެރެއިން އެއްވެސް ބޭފުޅަކު އިސްތިއުފާ ދެއްވުމަކީވެސް ފޫނުބެއްދޭނެވަރުގެ ބޮޑު ގެއްލުމެއް ލިބިގެންދާނެ ކަމެއް ކަމަށެވެ.

"ހިތާމަކުރަން މީޑިއާގައި އެކްސްކޯ މެމްބަރުން އިސްތިއުފާ ދިނުން. މަޝްވަރާކޮށްގެން އަދިވެސް ހައްލުކުރުން. އިސްތިއުފާ ދިން ކަމެއް ނޭނގޭ. މީޑިއާ އިން ފެންނަ އެއްޗެއް ފެންނަނީ. އިސްތިއުފާ ދޭންޖެހޭ ވަރުކަމެއް އެސޯސިއޭޝަންގެ ރައީސްގެ ހައިސިއްޔަތުން ނުކުރަން. އެންމެން ގުޅިގެން ކުރިޔަށް ދާންބޭނުންވަނީ. އެއްވެސް މީހަކު އިސްތިއުފާ ދީފި ނަމަ ފޫނުބެދޭވަރުގެ ގެއްލުމެއް ދިމާވާނެ. އެންމެ ގާބިލު މީހުން ތިބީ. މިއަދު ޖެހުނު މައްސަލައިގައި އަނަންތަރާ އާއި ސޮނޭވާއާ ޖެހުނު މައްސަލަ އެއް ނޫން ދެ ރިސޯޓުގެ ކޮމްޕެޓިޝަން ކޮމެޓީއާ ޖެހުނު މައްސަލައެއް ޖެހުނީ" ލަތީބެ ވިދާޅުވިއެވެ.

ވީއޭއެމްގެ އެކްސްކޯގައި މި ފަސް މެމްބަރުންވެސް ހިމެނީ މިދިޔަ ފެބްރުއަރީ މަހުއެވެ. ވީއޭއެމްގެ އެކްސްކޯ އިން ބައެއް މެމްބަރުން ވަނީ މީގެކުރިން ވަކިކޮށްފައެވެ.