އިޒްރޭލުން އީރާނަށް ދޭން އުޅޭ ހަމަލާގެ "ޓޮޕް ސީކްރެޓް" ލިޔުންތައް ލީކު ކޮށްލައިފި

އިޒްރޭލުން އީރާނާ ދެކޮޅަށް ދޭން އުޅޭ ބަދަލު ހިފުމުގެ ހަމަލާގެ ރޭވުންތަކާ ގުޅޭ އިންތިހާ ދަރަޖައިގެ ސިއްރު އިންޓެލިޖެންސް މަޢުލޫމާތު ލީކު ކޮށްލައިފިއެވެ.

އޮންލައިންކޮށް މި މަޢުލޫމާތު ލީކުވުމާ ގުޅިގެން އެކަން ހިނގި ގޮތް ބެލުމަށް އެމެރިކާ އިން ތަޙުޤީޤެއް ފަށާފައިވާ ކަމަށް ސީއެންއެން އިން ވަނީ ބުނެފައެވެ. މިކަން މިހެން ހިނގާފައިވާ ކަމުގެ މަޢުލޫމާތު ލިބިފައިވާ ތިން ފަރާތަކުން ސީއެންއެން އާ ވަނީ ވާހަކަ ދައްކާފައެވެ. މީގެ ތެރެއިން އެއް ފަރާތުން ވަނީ ލީކުކޮށްލި ލިޔުންތަކުގެ ޞައްޙަކަން ސީއެންއެން އަށް ކަށަވަރުކޮށްދީފައެވެ.

އެމެރިކާގެ އޮފިޝަލަކު ސީއެންއެން އަށް ބުނެފައިވާ ގޮތުގައި މި ޑޮކިއުމެންޓްތައް ލީކުވުމަކީ "ވަރަށް ކަންބޮޑުވާންޖެހޭ" ކަމެކެވެ.

އޮކްޓޫބަރު 15 އަދި 16 ވަނަ ދުވަހުގެ ތާރީޚު ޖަހާފައިވާ މި ލިޔުންތައް އިންޓަރނެޓުގައި ދައުރުވާން ފެށީ ހުކުރު ދުވަހު "މިޑްލް އީސްޓް ސްޕެކްޓޭޓަރ" ކިޔާ އެކައުންޓަކުން ޓެލެގްރާމްގައި ޕޯސްޓުކުރުމާ އެކުގައެވެ.

މި ލިޔުންތަކުގައި "ޓޮޕް ސީކްރެޓް" ޖަހާފައިވާއިރު، މި ލިޔުންތައް ފެންނަން ޖެހޭނީ ހަމައެކަނި އެމެރިކާ އަށާއި އެމެރިކާގެ ބައިވެރިންގެ "ފަސް ލޮލަށް" ކަމަށް ބަޔާންކޮށްފައިވެއެވެ. "ފަސް ލޯ" ކަމަށް ބުނާ އިއްތިހާދުގައި ހިމެނެނީ އޮސްޓްރޭލިއާ، ކެނެޑާ، ނިއުޒީލެންޑް އަދި އިނގިރޭސި ވިލާތެވެ.

މި ލިޔުންތަކުގައި އީރާނާ ދެކޮޅަށް ޙަމަލާއެއް ދިނުމަށް އިޒްރޭލުން ވަމުންދާ ތައްޔާރީތަކުގެ ވާހަކަ ބަޔާންކޮށްފައިވެއެވެ. ނޭޝަނަލް ޖިއޯސްޕޭޝަލް-އިންޓެލިޖެންސް އޭޖެންސީ އިން އެކުލަވާލި ކަމަށް ބުނާ އެއް ލިޔުމުގައި ވާގޮތުން، މި ރޭވުންތަކުގެ ތެރޭގައި އިޒްރޭލުން ހަތިޔާރު އެއްތަނުން އަނެއްތަނަށް ގެންދިއުން ހިމެނެއެވެ.

އަނެއް ލިޔުމުގައި ބުނެފައިވާ ގޮތުން، އެ ލިޔުން ތައްޔާރު ކޮށްފައިވަނީ ނޭޝަނަލް ސެކިއުރިޓީ އޭޖެންސީންނެވެ. އަދި އޭގައި އިޒްރޭލުގެ އެއަރ ފޯސްއިން އެއަރ-ޓު-ސަރފޭސް މިސައިލްތައް ބޭނުންކޮށްގެން ކުރިއަށްގެންދާ އެކްސަސައިޒްތަކެއްގެ ވާހަކަ ބަޔާންކޮށްފައިވެއެވެ. މިއީވެސް އީރާނަށް ޙަމަލާދިނުމަށް ވާ ތައްޔާރީ އެއް ކަމަށް ބެލެވެއެވެ.

ސީއެންއެންއިން މި ލިޔުންތައް ސީދާ ނަކަލުކޮށްފައެއް ނުވެއެވެ. އަދި އެ ލިޔުންތައް ހާމަ ކޮށްފައެއްވެސް ނުވެއެވެ.

އެމެރިކާގެ އޮފިޝަލަކު ސީއެންއެން އަށް ބުނެފައިވާ ގޮތުގައި، ޕެންޓަގަން އިން ތައްޔާރުކުރި ކަމަށް ބުނާ ލިޔުމަށް އެކްސެސް ލިބިފައިވާ ފަރާތްތަކަކީ ކޮބާތޯ ބަލަމުންދާ ކަމަށެވެ. މިފަދަ ލީކެއް ހިނގައިފިނަމަ އެފްބީއައި އާއި ޕެންޓަގަން އަދި އެމެރިކާގެ އިންޓެލިޖެންސް އިދާރާ ތަކުން ގުޅިގެން އޮޓަމެޓިކުން ވަގުތުން ތަހުގީގެއް ފަށާނެއެވެ.  

އެފްބީއައި އިން މި މައްސަލައާ ގުޅޭގޮތުން އެއްވެސް ކޮމެންޓެއް ކުރަން އިންކާރުކޮށްފައިވާ ކަމަށް ސީއެންއެން އިން ބުނެފައިވެއެވެ.

އެންމެ މަތީ ދަރަޖައިގެ މި ސިއްރު ލިޔުންތައް ލީކުވެފައި މިވަނީ އެމެރިކާ-އިޒްރޭލު ގެ ގުޅުމުގައި ވަރަށް ނާޒުކު ދަނޑިވަޅެއްގައި ކަމަށް ތަޖުރިބާކާރުން ދެކެއެވެ. އަދި މިކަމާ ގުޅިގެން އިޒްރޭލުން ރުޅި ގަދަވާނެ ކަމަށްވެސް ވަނީ ބެލެވިފައެވެ.

މި ލިޔުންތަކުގެ ތެރެއިން އެއް ލިޔުމުގައި އިޒްރޭލުން އަބަދުވެސް ޢާންމުކޮށް ހާމަކުރަން އިންކާރުކުރާ ކަމެއް ފާހަގަކޮށްފައިވެއެވެ. އެއީ އެ ޤައުމުގައި ނިއުކްލިއަރ ހަތިޔާރު ހުރިކަމެވެ. މި ލިޔުމުގައި ބުނެފައިވާ ގޮތުން، އިޒްރޭލުން އީރާނާ ދެކޮޅަށް ނިއުކްލިއަރ ހަތިޔާރެއް ބޭނުންކުރަން ރާވާކަމުގެ އެއްވެސް ނިޝާނެއް އެމެރިކާއަށް ފެނިފައެއް ނުވެއެވެ.

މި ލިޔުންތައް ޢާންމުވީ ކިހިނެއްކަން އަދި އެއީ ހެކްކޮށްގެން ކަމެއް ނުވަތަ މީހަކު ގަސްދުގައި ލީކުކޮށްގެންކަން ސާފެއް ނޫނެވެ. އެމެރިކާ އިން މިހާރުވެސް ވަނީ އީރާނުގެ ހެކިންގ ކެމްޕޭންތަކާ ބެހޭ ގޮތުން އިންޒާރު ދީފައެވެ. މިގޮތުން އޯގަސްޓު މަހު އެމެރިކާގެ އިންޓެލިޖެންސް އޭޖެންސީތަކުން ބުނެފައިވާ ގޮތުގައި އީރާނުން ވަނީ ޑޮނަލްޑް ޓްރަމްޕްގެ ކެމްޕޭނަށް ނިސްބަތްވާ ލިޔުންތަކެއް ހެކްކޮށްފައެވެ.

އެކްސިއޯސް ނިއުސް ސައިޓުން ލީކުވެފައިވާ "ޓޮޕް ސީކްރެޓް" ލިޔުންތަކާ ބެހޭ ޚަބަރު ހޮނިހިރު ދުވަހު ރިޕޯޓް ކޮށްފައިވެއެވެ.