ކުލަބު ވޯލްޑް ކަޕުން އިންޓަ މިއާމީ އަށް ފުރުސަތު ދޭން ނިންމައިފި

އަންނަ އަހަރު އޮންނަ ފީފާ ކުލަބު ވޯލްޑް ކަޕް ފުޓުބޯޅަ މުބާރާތުން، އެމެރިކާގެ އިންޓަ މިއާމީ އަށް ފުރުސަތު ދޭން ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ނިންމައިފި އެވެ.

އަންނަ އަހަރުގެ ކުލަބު ވޯލްޑް ކަޕް ބާއްވަން ފީފާ އިން ނިންމާފައި ވަނީ އައު ފޯމެޓުގެ ދަށުންނެވެ. އެއާއެކު އަންނަ އަހަރު އޮންނަ މުބާރާތުގައި ޖުމުލަ 32 ޓީމެއް ވާދަކުރާނެ އެވެ. ފީފާ އިން ކަނޑަ އަޅާފައި ވަނީ ކުލަބު ވޯލްޑް ކަޕަކީ ކުލަބުތަކުން ސީޒަނަށްފަހު ވާދަކުރަން ޖެހޭ މުބާރާތެއް ކަމަށެވެ. މި ބަދަލާ އެކު، އަންނަ އަހަރުން ފެށިގެން ކުލަބު ވޯލްޑް ކަޕް ބޭއްވުމަށް ހަމަޖެހިފައި ވަނީ ކޮންމެ ހަތަރު އަހަރުން އެއް އަހަރު އެވެ.

އަންނަ އަހަރުގެ ކުލަބު ވޯލްޑް ކަޕް ބޭއްވުމަށް ހަމަޖެހިފައި ވަނީ އެމެރިކާގަ އެވެ. އެހެންވެ ފީފާ އިން ނިންމާފައި ވަނީ މުބާރާތް ބާއްވާ ޤައުމަށް ލިބޭ ފުރުސަތުގެ ތެރެއިން، މޭޖާ ލީގު ސޮކާ (އެމެރިކާ ލީގު)ގެ އިންޓަ މިއާމީ އަށް މުބާރާތުން ފުރުސަތު ދިނުމަށެވެ. އެކަން ފީފާގެ ރައީސް ޖިއާނީ އިންފަންޓީނޯ ވަނީ ރަސްމީކޮށް އިއުލާން ވެސް ކުރައްވައިފަ އެވެ.

އިންޓަ މިއާމީ އަށް ކުލަބު ވޯލްޑް ކަޕުން ފުރުސަތު ދޭން ނިންމާފައިވާއިރު، އެ ކުލަބުގައި މަޝްހޫރު ކުޅުންތެރިންތަކެއް އަންނަނީ ކުޅެމުންނެވެ. އެގޮތުން އާޖެންޓީނާގެ ކެޕްޓަން ލިއޮނަލް މެސީގެ އިތުރުން، އުުރުގުއޭގެ ލުއިސް ސުއަރޭޒް، ސްޕެއިންގެ ޖޯޑީ އަލްބާ އަދި ސާޖިއޯ ބުސްޓެކްސް ފަދަ ކުޅުންތެރިން އަންނަނީ އެ ކުލަބަށް ކުޅެމުންނެވެ.