ސިޓީގެ ފަރިތަކުރުންތަކަށް ޑި ބްރޭނާ ނިކުމެއްޖެ

މެންޗެސްޓަރ ސިޓީގެ ފަރިތަކުރުންތަކަށް، އެ ޓީމަށް ކުޅެމުން އަންނަ ބެލްޖިއަމްގެ މިޑްފީލްޑަރު ކެވިން ޑި ބްރޭނާ ނިކުމެއްޖެ އެވެ.

ޔުއެފާ ޗެމްޕިއަންސް ލީގުގައި ސިޓީން އިންޓަ މިލާންއާ ދެކޮޅަށް ކުޅުނު މެޗުގައި ޑި ބްރޭނާ އަށް ވަނީ އަނިޔާވެފަ އެވެ. ސިޓީ އެއްވަރުވި އެ މެޗުގެ ދެ ވަނަ ހާފު ފަށައިގެން ކުރީ ކޮޅު، ޑި ބްރޭނާ ވަނީ ބަދަލުކޮށްފަ އެވެ. އެއީ އޭނާ އަށް ލިބުނު އަނިޔާގެ ސަބަބުންނެވެ. އޭގެ ފަހުން އިނގިރޭސި ޕްރިމިއާ ލީގުގައި ސިޓީން އިނގިރޭސި ޕްރިމިއާ ލީގުގައި ކުޅުނު މެޗުތަކާއި، ޗެމްޕިއަންސް ލީގުގައި ކުޅުނު މެޗުގައި ވެސް ޑި ބްރޭނާ ނުކުޅެ އެވެ.

ޑި ބްރޭނާގެ އަނިޔާއާ ގުޅޭ ގޮތުން މީގެ ކުރިން ސިޓީގެ ކޯޗު ޕެޕް ގާޑިއޯލާ ބުނީ، އޭނާގެ އަނިޔާ ސީރިއަސް ނޫން ކަމަށެވެ. އެހެން ނަމަވެސް، ޑި ބްރޭނާ ލައްވާ ނުކުޅުވަން ނިންމީ، ސިޓީގެ މެޑިކަލް ޓީމުގެ އިރުޝާދުގެ މަތިން ކަމަށް ވެސް ގާޑިއޯލާ ވަނީ ބުނެފަ އެވެ. އޭގެ ފަހުން ބައިނަލްއަޤުވާމީ ބްރޭކުގައި ބެލްޖިއަމް އިން ކުޅުނު މެޗުތަކުގައި ވެސް ޑި ބްރޭނާ ނުކުޅެ އެވެ.

ބައިނަލްއަޤުވާމީ ބްރޭކަށް ފަހު، ކުލަބު ފުޓުބޯޅައިގެ މެޗުތަކަށް ސިޓީން ތައްޔާރުވަމުން އަންނައިރު، ޑި ބްރޭނާ ވަނީ އެ ކުލަބުގެ ފަރިތަކުރުންތަކުގައި ބައިވެރިވާން ފަށައިފަ އެވެ. އެކަމާ ގުޅިގެން ބައެއް މީޑިއާ ތަކުގައި ބުނެފައިވާ ގޮތުން، ބްރޭކަށް ފަހު ޕްރިމިއާ ލީގުގައި ސިޓީން ވުލްވްސްއާ ދެކޮޅަށް ކުޅޭ މެޗުގައި ޑި ބްރޭނާ ފެނުމުގެ ފުރުސަތު ބޮޑެވެ.

ސިޓީގެ މެދު ތެރޭގައި މުހިންމު ދައުރެއް އަދާ ކުރަމުން އަންނަ ޑި ބްރޭނާ ވަނީ މި ސީޒަންގައި ސިޓީ އަށް ކުޅެދިން ހަ މެޗުގައި އެއް ލަނޑު ޖަހައިފަ އެވެ.