ޣައްޒާ އަށް ހޮނިހިރު ދުވަހު އިޒްރޭލުން ދިން ހަމަލާތަކުގައި މަދުވެގެން 36 މީހުން މަރުވެއްޖެއެވެ.
އިޒްރޭލުން ދިން ހަމަލާތަކުގެ ތެރެއިން ނުސައިރާތު ރެފިއުޖީ ކޭމްޕުގައި ހުރި ގެއަކަށް ދިން ހަމަލާއެއްގައި 5 މީހުން މަރުވެފައިވާ ކަމަށް އަލްޖަޒީރާއިން ބުނެއެވެ.
ވަފާ ނިއުސް އެޖެންސީން ބުނެފައިވާ ގޮތުގައި ޣައްޒާގެ މެދު އަދި އުތުރު ސަރަޙައްދުތަކަށް އިޒްރޭލުން ދިން ހަމަލާތަކުގައި މަދުވެގެން 11 މީހުން މަރުވެފައިވާކަން ވަނީ ކަށަވަރުވެފައެވެ.
ނުސައިރާތު ރެފިއުޖީ ކޭމްޕުޕުގައި ހުރި މީހުން ދިރިއުޅޭ ގެއަކަށް އިޒްރޭލުން ދިން ހަމަލާއެއްގައި 7 މީހުން މަރުވެފައިވާކަން ވަފާއިން ރިޕޯޓުކޮށްފައިވެއެވެ. އޭގެ ކުރިން އަލްޖަޒީރާ އިން ރިޕޯޓުކޮށްފައިވާނީ ނުސައިރާތުގައި ހުރި އަބޫ ދަލާލު އާއިލާގެ ގެއަކަށް ދިން ހަމަލާއެއްގައި މަދުވެގެން 5 މީހުން މަރުވެފައިވާ ކަމަށެވެ.
އުތުރު ޣައްޒާގެ ޖަބާލިޔާ ރެފިއުޖީ ކޭމްޕަށް އިޒްރޭލުގެ ސިފައިން ދިން ހަމަލާއެއްގައި މަދުވެގެން 4 މީހުން މަރުވެފައިވެއެވެ. ވަފާގެ ރިޕޯޓުގައިވާ ގޮތުން، ގިނަ އަދަދެއްގެ މީހުން ތިބީ ސީރިއަސް ހާލަތެއްގައި ކަމަށްވުމާއެކު، މަރުވާ މީހުންގެ އަދަދު އިތުރުވާނެ ކަމަށް ބެލެވެއެވެ.
ޖަބާލިޔާ އަށް އިޒްރޭލުން ދިން އެންމެ ފަހުގެ ހަމަލާތަކާ ގުޅިގެން، ކަމާލް އަދުވާން ހޮސްޕިޓަލަށް އަނިޔާވެފައިވާ ފަލަސްޠީން މީހުން އާދިއްތަ ދުވަހަށް އިރު އެރިއިރުވެސް ގެންނަމުންދާ ކަމަށް ރިޕޯޓްތައް ބުނެއެވެ.
މި ހޮސްޕިޓަލަށް ޒަޚަމްވެފައިވާ މީހުން ގެންނަމުންދާ އިރު، ފަލަސްތީނު ރެޑް ކްރެސެންޓް ސޮސައިޓީ (ޕީއާރްސީއެސް) އިން ބުނެފައިވަނީ، އެ ހޮސްޕިޓަލުން ބަލިމީހުން ނެރުމަށް 12 ގަޑިއިރު ދިގު "އުނދަގޫ މިޝަނެއް" ކުރިއަށް ގެންގޮސްފައިވާ ކަމަށެވެ. ޣައްޒާގެ ސިއްހަތާ ބެހޭ މިނިސްޓްރީން ބުނާ ގޮތުގައި، އިޒްރޭލު ސިފައިން ވަނީ ހޮސްޕިޓަލުގެ މުވައްޒަފުންނާއި ބަލިމީހުންނަށް އެތަން ދޫކޮށް ދިއުމަށް އަމުރުކޮށް، އެކަން ނުކޮށްފިނަމަ ހައްޔަރުކުރާނެ ކަމަށް ބުނެ ބިރުދައްކާފައެވެ.
ޣައްޒާގެ ސިއްހަތާ ބެހޭ ވުޒާރާގެ އިސްވެރިޔާ ޑރ. މުނީރު އަލް-ބާޝް، އަލްޖަޒީރާއަށް ވިދާޅުވި ގޮތުގައި އުތުރު ޣައްޒާގައި އިޒްރޭލު ސިފައިން 8 ދުވަހުގެ މުއްދަތަށް މި ފަހުން ދިން ހަމަލާތަކުގައި މަދުވެގެން 200 މީހުން މަރުވެފައިވެއެވެ.
ޣައްޒާގައި، 2023 ވަނަ އަހަރުގެ އޮކްޓޯބަރު މަހުން ފެށިގެން އިޒްރޭލުން ދިން ހަމަލާތަކުގައި މަދުވެގެން 42،175 މީހުން މަރުވެ، 98،336 މީހުން ވަނީ ޒަޚަމްވެފައެވެ.
