ސައްދާމް ހުސެއިންގެ ވެރިކަމުގައި އިރާގުން ކުވޭތައް އެރުމާ ގުޅިގެން ސައުދީ އަރަބިއްޔާ އިން އެކަމާ ނުރުހުން ފާޅު ކުރުމުގެ ގޮތުން ބަންދު ކުރި އިރާގާ ސައުދީ އަރަބިއްޔާ އާ ދެމެދު އޮންނަ އަރާރް ބޯޑަރ އަލުން ހުޅުވުމަށް ސައުދީ އަރަބިއްޔާއިން ނިންމައިފިއެވެ.
ބަޣްދާދުގައި ހުންނަވާ ސައުދީ އަރަބިއްޔާގެ ޝާޑޭފެއަރޒް ބުރާސްފަތި ދުވަހު ވިދާޅުވީ ބޯޑަރު ހުޅުވާލުމުން މި މަގު ބޭނުން ކުރެވޭނީ ދެ ގައުމުގެ ދެމެދުގައި ވިޔާފާރީގެ ގުޅުން އިތުރު ކުރުމަށް ކަމަށެވެ.
ބޯޑަރު ބަންދުކޮށްފައި އޮތް ފާއިތުވި 27 އަހަރުގެ ތެރޭގައި ބޯޑަރު ހުޅުވާލެވެނީ ހަމައެކަނި ހައްޖު މޫސުމުގައި ހައްޖުވެރިން ދަތުރު ކުރުމަށް އަހަރަކު އެއް ފަހަރުއެވެ.
ބޯޑަރު ހުޅުވާލަން ނިންމި އިރު މި ހަފްތާގެ ހޯމަ ދުވަހު ސައުދީ ކެބިނެޓުން ވަނީ އިރާގާ އެކު ޗޮއިންޓް ޓްރޭޑް ކޮމިޝަނެއް އުފެއްދުމަށްވެސް ފާސް ކޮށްފައެވެ.
އިރާގާ އެކު ގުޅުން ބަދަހި ކުރުމަށް ސައުދީ އަރަބިއްޔާގެ އިތުރުން ޔުނައިޓެޑް އެރަބް އެމިރޭޓްސް އިންވެސް ގެންދަނީ އިތުރު ފިޔަވަޅުތައް އަޅަމުންނެވެ.
މަސްރަހު ދިރާސާ ކުރާ ފަރާތްތަކުން ދެކޭ ގޮތުގައި މީގެ ބޭނުމަކީ، ސަރަހައްދުގައި އިތުރުވަމުން އަންނަ އީރާންގެ ނުފޫޒް ކުޑަކުރުމެވެ.
ދާދިފަހުން އިރާގުގެ ނުފޫޒް ގަދަ ޝިއީ ލީޑަރެއް ކަމަށްވާ މުގްތަދާ އަލް ސަދްރު ވަނީ ސައުދީ އަރަބިއްޔާ އަށް ދަތުރުފުޅެއް ކުރައްވާ ސައުދީ ވަލީ އަހުދު މުހައްމަދު ބިން ސަލްމާން އާ ބައްދަލު ކުރައްވާފައިވެއެވެ. މި ބައްދަލު ކުރެއްވުމުގެ ނަތީޖާއެއްގެ ގޮތުން އިރާގު ސަރުކާރަށް 10 މިލިއަން ޑޮލަރުގެ އެހީ ދިނުމަށް ސައުދީ އަރަބިއްޔާއިން ވަނީ ނިންމާފައެވެ. މީގެ އިތުރުން އިރާގުގެ ޝިއީން ގިނަ ސަރަހައްދެއް ކަމަށްވާ ދެކުނު އިރާގުގައި އިންވެސްޓް ކުރުމުގެ ފުރުސަތުތައް ސައުދީ އަރަބިއްޔާއިން ބެލުމަށްވެސް ވަނީ އެއްބަސްވެފައެވެ.
