ހިޒްބުﷲ އިން އިޒްރޭލުގެ ހައިފާގެ އަސްކަރީ މަރުކަޒަކަށް ޑްރޯން ހަމަލާއެއް ދީފި

ލުބުނާނުގެ ހިޒްބުﷲ އިން އިޒްރޭލުގެ ހައިފާގެ އަސްކަރީ މަރުކަޒަކަށް ޑްރޯން ހަމަލާއެއް ހުކުރު ދުވަހު ދީފި ކަމަށް އެ ޖަމާއަތުން ބުނެފިއެވެ.

ހިޒްބުﷲ އިން މި ހަމަލާ ދިނީ އެ ޖަމާއަތުގެ ބާރުކަނޑުވާލަން ކަމަށް ބުނެ ލުބުނާނުގެ ބެއިރޫތަށް ވައިގެ މަގުންނާ އެއްގަމު މަގުން އިޒްރޭލު ސިފައިން ވަރުގަދަ ހަމަލާތަކެއް ދެމުންދާ ދަނޑިވަޅެއްގައެވެ.

އެ ޖަމާޢަތުން ހުކުރު ދުވަހު ނެރުނު ބަޔާނެއްގައި ބުނެފައިވަނީ "ގޮވާ ތަކެތި ލޯޑް ކޮށްފައިވާ ޑްރޯންތަކެއް" ހައިފާގައިވާ އިޒްރޭލުގެ "ވައިގެ ދިފާއީ ކޮމާންޑް ބޭސް" އަކަށް "ވައިގެ ހަމަލާއެއް" ދީފައިވާ ކަމަށެވެ. މިއީ ލުބުނާނުގެ "ސިޓީތަކާއި އަވަށްތަކާއި އާންމު ރައްޔިތުންނަށް" އިޒްރޭލުން ދިން ހަމަލާތަކަށް "ރައްދު ދިނުމުގެ" ގޮތުން ކަމަށް އެ ބަޔާނުގައި ބުނެފައިވެއެވެ.

މީޑިއާ ރިޕޯޓްތައް ބުނާ ގޮތުން އިޒްރޭލުން ހަމަލާދީ ހިޒްބުﷲ ގެ ލީޑަރޝިޕްގެ މުހިންމު ފަރާތްތަކެއް މަރާލާފައި މި ދަނޑިވަޅުގައި, އެ ޖަމާއަތުން ގެންދަނީ ހަނގުރާމައިގެ ސްޓެރެޓަޖީ ބަދަލުކޮށް އިޒްރޭލާއެކު ދިގު މުއްދަތެއްގެ ހަނގުރާމައަކަށް ތައްޔާރުވަމުންނެވެ.

ހިޒްބުﷲ ގެ މުހިންމު ޓާގެޓްތަކަށް އަމާޒު ކޮށް އިޒްރޭލުން ލުބުނާނަށް ވަރުގަދަ ހަމަލާތަކެއް ދެމުންދާތާ ތިން ހަފްތާ ފާއިތުވެފައިވާއިރު، އެ ޖަމާއަތުގެ ބާރު ކުޑަވެފައިވާ ކަމަށް ބެލެވުނު ނަމަވެސް މަސްރަހް ދިރާސާ ކުރާ ފަރާތްތަކުން ބުނަނީ އަދިވެސް އެ ޖަމާޢަތުގެ އަތުގައި ގިނަ އަދަދެއްގެ ނުރައްކާތެރި ހަތިޔާރު ހުރިކަމަށެވެ. މީގެ ތެރޭގައި އެންމެ ވަރުގަދަ ޕްރެސިޝަން މިސައިލްތައް ވެސް ހިމެނެއެވެ. މިހާތަނަށް ހަނގުރާމައިގައި މިފަދަ މިސައިލްތައް ބޭނުންކޮށްފައެއް ނުވެއެވެ. އަނެއްކޮޅުން އިޒްރޭލުން ބުނާ ގޮތުގައި އެ ޤައުމުގެ ވައިގެ ހަމަލާތަކުން ހިޒްބުﷲ ގެ ހަތިޔާރު ރައްކާކުރާ ވަރަށް ގިނަ ތަންތަން ވަނީ ހަލާކުވެފައިވެއެވެ.

ރިޕޯޓްތައް ބުނާ ގޮތުގައި ހިޒްބުﷲ ގެ ވެރިޔާ ނަސްރުﷲ އިޒްރޭލުން ހަމަލާދީ މަރާލުމާއެކު 27 ސެޕްޓެމްބަރުގެ ފަހުން، އެ ޖަމާއަތުގެ ކޮމާންޑް އޮޅުންބޮޅުމުގެ ތެރެއަށް ދިޔައެވެ. އެހެންނަމަވެސް 72 ގަޑިއިރު ފަހުން އެ ޖަމާއަތުން އައު "އޮޕަރޭޝަންސް ރޫމެއް" ޤާއިމުކުރި ކަމަށް ހިޒްބުﷲ ގެ ފީލްޑް ކޮމާންޑަރަކާއި އެ ޖަމާއަތުގެ އެހެން މަސްދަރަކާ ހަވާލާދީ އަލް އަރަބިއްޔާ އިން ބުނެފައިވެއެވެ.