ޓާކިޝް އެއަރލައިންސްގެ ޕައިލެޓެއް ބޯޓު ދުއްވަން އިންދާ މަރުވެއްޖެ

އެމެރިކާއިން ތުރުކީއަށް ދަތުރުކުރަމުންދިޔަ ޓާކިޝް އެއަރލައިންސްގެ މަތިންދާބޯޓެއްގެ ޕައިލެޓެއް ބޯޓު ދުއްވަމުން ދަނިކޮށް މަރުވެއްޖެއެވެ.

އަންގާރަ ދުވަހުގެ ގާތްގަނޑަކަށް ހަވީރު 7 ޖަހާއިރު، ވޮޝިންގްޓަންއިން އިސްތަންބޫލް އަށް ކުރި ދަތުރުގެ ކެޕްޓަން، އިލްޗެހިން ޕެހްލިވަން، ސިއެޓަލް (59އ) ބޯޓު ދުއްވަން އިންދާ ފުރަތަމަ ހޭ ނެތުނީ ކަމަށް ރިޕޯޓުތައް ބުނެއެވެ.

އޭނާ ހޭނެތުމާ ގުޅިގެން ބޯޓުގެ ކޯ-ޕައިލެޓް ވަނީ ކުއްލި ގޮތަކަށް ބޯޓު ނިއުޔޯކަށް ޖައްސާފައެވެ. ނަމަވެސް، ބޯޓު ނިއުޔޯކުގައި ޖެއްސި އިރުވެސް ކެޕްޓަން ވަނީ މަރުވެފައިކަމަށް ރިޕޯޓުތައް ބުނެއެވެ.

އޭނާ މަރުވި ސަބަބެއް އަދި ހާމައެއް ނުކުރެއެވެ.

މި ހާދިސާ އާއި ގުޅިގެން ޓާކިޝް އެއަރލައިންސްގެ ތަރުޖަމާނު، ޔަހްޔާ އުސްތުން، އެކްސް ކުރެއްވި ޕޯސްޓެއްގައި ވިދާޅުވެފައިވަނީ، ކެޕްޓަން ހޭނެތުމާ ގުޅިގެން ބޯޓުގެ ކްރޫއިން ވަގުތުން އިމަރޖެންސީ ފަރުވާ ދިން ނަމަވެސް، އެ މަސައްކަތް ކާމިޔާބު ނުވާ ކަމަށެވެ.

2007ން ފެށިގެން ޓަރކިޝް އެއަރލައިންސްގައި މަސައްކަތްކުރަމުން އައި 59 އަހަރުގެ ޕައިލެޓް، މާރިޗު މަހު މެޑިކަލް އެގްޒެމިނޭޝަނެއް ހަދާފައިވެއެވެ. ނަމަވެސް، އެ އެގްޒެމިނޭޝަނުން އެއްވެސް ޞިއްޙީ މައްސަލައެއް ހުރިކަމަށް ފާހަގަވެފައެއް ނުވެއެވެ.