ނޭޕާލްގެ ތްރިބުވަން އެއާޕޯޓު ނުވަތަ ކަތަމަންޑޫ އެއާޕޯޓުގެ ރަންވޭއަށް ބަންގްލަދޭޝްގެ މަތިންދާ ބޯޓެއް ޖައްސަން އުޅުމުގެ ތެރޭގައި ވެއްޓި މަދުވެގެން 39 މީހުން މަރުވެއްޖެއެވެ.

ބަންގްލަދޭޝްގެ "ޔޫއެސް-ބަންގްލާ އެއާލައިންސް" އަށް ނިސްބަތްވާ ބޯޓު، ތްރިބުވަން އެއާޕޯޓަށް ނޭޕާލް ގަނޑިން 2:15 ހާއިރު ޖައްސަން އުޅުމުމުގެ ތެރޭގައި އަލިފާން ރޯވިކަމަށް ނޭޕާލްގެ ފުލުހުންގެ ތަރުޖަމާނު ވަނީ ވިދާޅުވެފައެވެ. 

އަލިފާން ރޯވެ ބޯޓު ވެއްޓުމުގެ ހާދިސާގައި، ބޯޓު ވެއްޓުނު ސަރަހައްދުން 31 މީހެއްގެ ހަށިގަނޑު އޮފިޝަލުން ވަނީ ހޯދާފައެވެ. އަދި ހޮސްޕިޓަލަށް ގެންދެވުނު މީހުންގެ ތެރެއިން އަށް މީހަކު މަރުވި ކަމަށް ރިޕޯޓުތައް ބުނެއެވެ. ރިޕޯޓުތައް ބުނާގޮތުން 23 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ. 

ވެއްޓުނު ބޯޓު އޮޕަރޭޓު ކުރާ ބަންގްލަދޭޝްގެ "ޔޫއެސް-ބަންގްލާ އެއާލައިންސް" އިން ބުނާގޮތުގައި، ބޯޓު ވެއްޓުނު އިރު ކްރޫއާ އެކު 71 މީހުން ބޯޓު ގައި ތިއްބެެވެ. 

ބޯޓު ވެއްޓުނު ނޭޕާލްގެ ތްރިބުވަން އެއާޕޯޓުގެ މެނޭޖަރާ ހަވާލާދީ ރިޕޯޓުތައް ބުނާގޮތުން ބޯޓު ރަންވޭ އަށް ޖައްސަން އައީ ބޯޓު ޖައްސަން އަންނަން ޖެހޭ ސަރަހައްދަކުން ނޫނެވެ. 

މި ބޯޓުން ދަތުރުކުރި ދިވެއްސަކަށް ވެސް ހޮސްޕިޓަލްގައި ދަނީ ފަރުވާ ދެމުންނެވެ.