ލުބުނާނަށް ބޮން އަޅަމުން ދަނިކޮށް ހިޒްބުﷲ އިން އިޒްރޭލަށް ވަރުގަދަ ހަމަލާއެއް ދީފި

ލުބުނާނުގެ ހިޒްބުﷲ އިޒްރޭލުގެ ހައިފާ އަށް ވަރުގަދަ ރޮކެޓް ހަމަލާތަކެއް ދީފިއެވެ. މިކަމުގެ ސަބަބުން އިޒްރޭލުން ހިފާފައިވާ މި ސިޓީގައި ނުތަނަވަސްކަމާއި، ހަލަބޮލިކަން އުފެދި ބޮޑެތި ގެއްލުންތަކެއް ލިބިއްޖެ ކަމަށް ރިޕޯޓްތައް ބުނެއެވެ.

އާދީއްތަ ދުވަހުގެ ރޭ އިޒްރޭލުގެ އަސްކަރިއްޔާއިން ވަނީ ލުބުނާނުން ގިނަ އަދަދެއްގެ ރޮކެޓް ހައިފާ ޕޯޓް ސިޓީއަށް އަމާޒުވެފައިވާކަން ކަށަވަރުކޮށްދީފައެވެ. އިޒްރޭލުގެ މީޑިއާތަކުން ރިޕޯޓުކުރި ގޮތުގައި ދެކުނު ލުބުނާނުން މަދުވެގެން 15 ރޮކެޓް ހަމަލާ ވަނީ ފަލަސްޠީނުން އިޒްރޭލުން ހިފާފައިވާ ސަރަޙައްދުތަކަށް ފޮނުވާފައެވެ.

އިޒްރޭލުގެ ދިފާއީ ނިޒާމު ފޫއަޅުވާލުމަށްފަހު މަދުވެގެން 5 ރޮކެޓް ސިޓީއަށް ވާސިލްވި ކަމަށް އަލްޖަޒީރާ އިން ބުނެފައިވެއެވެ. މި ޙަމަލާގައި މަދުވެގެން އިޒްރޭލުގެ 10 މީހުން ވަނީ ޒަޚަމްވެފައެވެ.

އަދި ހައިފާގައި ހުރި ރެސްޓޯރަންޓަކަށް ސީދާ ޙަމަލާއެއް އަމާޒުވެފައިވާކަމުގެ ރިޕޯޓުތަކެއްވެސް ވަނީ ލިބިފައެވެ. އުތުރުގައި އޮންނަ ޓައިބީރިއަސް ސިޓީގައިވެސް ސައިރަންގެ އަޑު އިވެމުންދިޔަ ކަމަށް ޚަބަރުތައް ބުނެއެވެ.

އިޒްރޭލުގެ އަސްކަރިއްޔާއިން އިތުރަށް ބުނެފައިވަނީ 15 ރޮކެޓް ފާހަގަކުރެވުމާ ގުޅިގެން އަޕަރ ގަލީލީ ސަރަޙައްދުގައި ރައްކާތެރިވުމަށް އިޒްރޭލު ރައްޔިތުންނަށް އިންޒާރު ދީފައިވާނެ ކަމަށެވެ.

ހިޒްބުﷲ ބުނެފައިވަނީ އިޒްރޭލުގެ އަސްކަރީ މަރުކަޒަށް އަމާޒުކޮށްފައިވަނީ ފާދީ-1 މިސައިލްތަކުން ކަމަށާއި، މި ޙަމަލާ ދީފައިވަނީ އިޒްރޭލުން ލުބުނާން އާއި ފަލަސްތީނުގެ އާންމު ރައްޔިތުންނަށް ދޭ އަނިޔާއާއި ހިންގާ ޖަރީމާތަކަށް ރައްދު ދިނުމުގެ ގޮތުން ކަމަށެވެ.

މީގެ ކުރިން އާދީއްތަ ދުވަހު، ހިޒްބުﷲ ވަނީ ހައިފާގެ އުތުރުގައި ހުރި އަސްކަރީ މަރުކަޒަކަށް ޑްރޯން ޙަމަލާއެއް ދީފައެވެ.

ލުބުނާނަށް ހުއްޓުމެއް ނެތި އިޒްރޭލުގެ ފައިޓަރ ޖެޓްތަކުން ހަމަލާތައް ދެމުން ދިޔަ ނަމަވެސް، ހިޒްބުﷲ އިން ގެންދަނީ އުތުރު އިޒްރޭލުގެ ސަރަހައްދުތަކަށް ކޮންމެ ދުވަހަކު ކަހަލަ ގޮތަކަށް މިސައިލް ހަމަލާތައް ދެމުންނެވެ. ހިޒްބުﷲ އިން ބުނެފައިވަނީ އިޒްރޭލުން ޣައްޒާގައި ކުރަމުންދާ ހަނގުރާމަ ހުއްޓާލަންދެން އަދި ލުބުނާނަށް ދެމުންދާ ހަމަލާތައް ހުއްޓަންދެން އެ ޖަމާއަތުން އިޒްރޭލަށްދޭ ހަމަލާތައް ކުރިއަށް ގެންދާނެކަމަށެވެ.

އިޒްރޭލުން ޣައްޒާ އާއި ފަލަސްތީނުގެ އެހެން ސަރަހައްދުތަކަށް ދެމުންދާ ހަމަލާތަކަށް އެއް އަހަރު ފުރިފައިވާއިރު، މިހާތަނަށް ޣައްޒާގައި 41،800ށް ވުރެ ގިނަ ފަލަސްޠީން މީހުން ވަނީ ޝަހީދުވެފައެވެ. އޭގެ ތެރެއިން ގިނައީ އަންހެނުންނާއި ކުޑަކުދިންނެވެ.

ލުބުނާނުގެ ހަނގުރާމަވެރިން އިޒްރޭލުގެ ހައިފާ އަށް މި ދިން ހަމަލާއަކީ ފާހަގަކުރެވޭ ފަދަ ހަމަލާއެއް ކަމަށް ރިޕޯޓްތައް ބުނެއެވެ. އެއީ އެތަނަކީ އިޒްރޭލުގެ އުތުރުގައި އޮންނަ އެންމެ ބޮޑު ސިޓީ އަށް ވުމުގެ އިތުރުން އެތަނަކީ މުހިންމު ބަނދަރު ސިޓީއެއް ވެސް މެއެވެ. އެ ސިޓީގެ އާބާދީގައި ގާތްގަނޑަކަށް 300،000 މީހުން ދިރިއުޅޭއިރު އިޒްރޭލުގެ އަސްކަރިއްޔާގެ މުހިންމު ތަންތަންވެސް ހައިފާގައި ހުންނަ ކަމަށް ޚަބަރުތައް ބުނެއެވެ.

އަދި މިފަދަ ނުރައްކަލެއް ހައިފާ ފަދަ ސިޓީއެއްގެ މެދުތެރޭގައި ހިނގުމަކީ އިޒްރޭލަށް ވަރަށް ބޮޑަށް ނުރައްކާތެރިކަން އޮތްކަން އިހުސާސްކުރެވޭނެ ކަމެއްކަމަށް ތަޖުރިބާކާރުން ބުނެއެވެ. ޚާއްސަކޮށް ފަލަސްތީނަށާއި ލުބުނާނަށް އަދި ސީރިއާ އާއި ޔަމަނަށް ދެމުންދާ ހަމަލާތަކުގެ ސަބަބުން އިޒްރޭލަށް ރައްކއުތެރިކަން އިތުރުވެއްޖެ ކަމަށް އިޒްރޭލުގެ ބޮޑުވަޒީރާއި އެހެން ސިޔާސީވެރިން ބުނަމުންދަނިކޮށް މިފަދަ ހަމަލާއެއް އައުމުން އެފަރާތްތަކުން ބުނާއެއްޗަކާ މެދު ސުވާލު އުފެދޭ ކަމަށް ޚަބަރުތަކުގައި ފާހަގަ ކޮށްފައިވެއެވެ.

އަނެއްކޮޅުން ޙިޒްބުﷲ ހަނގުރާމަވެރިންގެ ހިތްވަރުގަދަ ހަމަލާތަކުގެ ސަބަބުން މިހާތަނަށް އިޒްރޭލުން ލުބުނާނުގެ ސަރަޙައްދަށް އެއްގަމު މަގުން ވަނުމަށް ކުރި މަސައްކަތްތައް ވަނީ ނާކާމިޔާބުވެފައެވެ.

ހިޒްބުﷲ ނެރުނު ބަޔާނެއްގައި ބުނެފައިވަނީ އިޒްރޭލުން ދެކުނު ލުބުނާނަށް ވަދެ ޙަމަލާދޭން ފެށީއްސުރެ މަދުވެގެން 17 އިޒްރޭލުގެ އަސްކަރީން މަރުވެފައިވާ ކަމަށެވެ.

ބުރާސްފަތި ދުވަހުގެ ފަތިހުން ފެށިގެން، ލުބުނާނުގެ ދިފާއީ ހަނގުރާމަވެރިން ވަނީ ދެކުނު ލުބުނާނުގެ އެކި ސަރަޙައްދުތަކަށް އިޒްރޭލު ސިފައިން ވަންނަން ކުރި މަސައްކަތްތަކަށް ހުރަސް އަޅާފައެވެ. މިކަމުގެ ސަބަބުން އިޒްރޭލުގެ ފައުޖުތަކަށް ބޮޑެތި ގެއްލުންތަކެއް ވަނީ ލިބިފައެވެ.