މި ސަރުކާރުގައި ކޮރަޕްޝަންގެ ތުހުމަތު ކުރެވޭ މީހުން މުޖުތަމައު ތެރޭގައި އުޅެމުންދަނީ ހުދު ކާފޫރުހެން: ޔާމީން
އެއްވެސް ސަރުކާރަކުން ކޮރަޕްޝަންގެ މައްސަލަތަކަށް އަހައްމިއްޔަތުންދީ މައްސަލަތައް ބަލައިތޯ ޔާމީން ސުވާލު އުފެއްދެވި
ރ ފުއްގިރި ހިޔާނާތުގެ މައްސަލައިގެ އަޑުއެހުމުގެ ތެރެއިން
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ މި ސަރުކާރުގައި ކޮރަޕްޝަންގެ ތުހުމަތު ކުރެވޭ މީހުން ނުކުމެ މުޖުތަމައު ތެރޭގައި އެޅެމުންދަނީ ހުދު ކާފޫރުހެން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
މިދިޔަ ބުރާސްފަތި ދުވަހުގެ ރޭ ޕީއެންއެފްއިން ކުރިއަށް ގެންދިޔަ ޖަލްސާގެ އޯޑިއަންސްގައި އިންނަވާ ޔާމީން ވިދާޅުވީ ރާއްޖޭގައި ކޮރަޕްޝަންގެ މައްސަލަތައް ބޮޑު ކަމަށެވެ. އެއްވެސް ސަރުކާރަކުން ކޮރަޕްޝަންގެ މައްސަލަތަކަށް އަހައްމިއްޔަތުންދީ މައްސަލަތައް ބަލައިތޯ ޔާމީން ސުވާލު އުފެއްދެވިއެވެ.
ޔާމީން ވިދާޅުވީ ކުރީގެ ސަރުކާރަށް ކޮރަޕްޝަންއާ ގުޅޭގޮތުން މި ސަރުކާރުން ބޮޑެތި ތުހުމަތުތަކެއް ކޮށްފައިވާ ކަމަށެވެ. އެގޮތުން ކޮވިޑް-19ގެ ތެރޭގައި ނޭވާ ހޮޅިން ވައްކަންކޮށްފައިވާ ކަމަށް މިސަރުކާރުގެ ބޭފުޅުން ވިދާޅުވެފައިވާކަން ޔާމީން ވިދާޅުވިއެވެ.
ޔާމީން ވިދާޅުވީ ރައީސް ޑރ.މުހައްމަދު މުއިއްޒު ރިޔާސީ އިންތިޚާބުގެ ކެންޕޭންގެ ތެރޭގައި އަދި ކުރީގެ ރައީސް އިބްރާހިމް މުހައްމަދު ސާލިހު ވެސް ކޮރަޕްޝަންގެ މައްސަލަތަކަށް ވަރަށް ބޮޑަށް އަހައްމިއްޔަތުދީ، ކޮރަޕްޝަން ނައްތާލުމަށް މަސައްކަތް ކުރާނެ ކަމަށް ވިދާޅުވި ކަމަށެވެ. ކޮރަޕްޝަނާއި ދެކޮޅަށް ރައީސް ސާލިހުގެ ސަރުކާރުގައި ވެސް އެކަށީގެންވާ މަސައްކަތްތަކެއް ނުކުރެވޭ ކަމަށާއި، މިސަރުކާރުގައި ވެސް ފެނިގެންދަނީ ކޮރަޕްޝަންގެ ތުހުމަތު ކުރެވޭ މީހުން މުޖުތަމައު ތެރޭގައި ހުދު ފޮތިގަނޑެއްގެ ހެން އަދި ހުދު ކާފޫރުހެން އުޅެމުންދާ މަންޒަރު ކަމަށެވެ.
ރައީސް މުއިއްޒުގެ ސަރުކާރުން ކޮރަޕްޝަން ނައްތާލުމަށް އަހަމިއްޔަތުކަން ނުދޭ ސަބަބާއި ގުޅޭގޮތުން ޔާމީން ސުވާލު އުފެއްދަވާ ވިދާޅުވީ ބޮޑު ވައްކަމެއް ކޮށްފައިވާ ކުރީގެ ނައިބު ރައީސް އަހުމަދު އަދީބާއި މިސަރުކާރުގެ އިސްބޭފުޅުން ގުޅުން ބާއްވާ ކަމަށެވެ.
އެމްއެމްޕީއާރްސީގެ ހިޔާނާތަށް އިޝާރާތް ކުރައްވައި ޔާމީން ވިދާޅުވީ މި ހިޔާނާތް އިންސާފުވެރިކަމާއެކު ބަލައި ތަހުގީގު ކުރާނެ ކަމަށް މިސަރުކާރުން ބުނި ނަމަވެސް މި މައްސަލަ ސަރުކާރުން ބަލަން ބޭނުން ނުވާ ކަމަށް ޔާމީން ވިދާޅުވިއެވެ.
ޔާމީން ވިދާޅުވީ ކޮރަޕްޝަންގެ މައްސަލައަކީ ހަމައެކަނި ދައްކާލާ ވާހަކައަކަށް މިސަރުކާރުން ހަދާފައިވާ ކަމަށެވެ.
ރައީސް މުއިއްޒު ދައްކާ ވާހަކައާއި އަމަލު ދިމާނުވާތީ ރައްޔިތުން މިސަރުކާރާއި މެދު ހިތްހަމަ ނުޖެހޭ ކަމަށާއި، ރައްޔިތުން މިއަދު ތިބީ ރައީސް މުއިއްޒުގެ ފަޅީގައި ނޫން ކަމަށް ޔާމީން ވިދާޅުވިއެވެ.
