އިސްލާމްދީނުގެ ހަޟާރަތް ކުރިއެރުވުމަށް މަސައްކަތް ކުރާ ސަރުކާރެއް ގާއިމްވެފައި އޮތުމަކީ ލިބުނު ނަސީބެއް
ރާއްޖެ އިސްލާމްވި ދުވަހުގެ ޖަލްސާގެ ތެރެއިން
ރާއްޖޭގައި އިސްލާމީ ހަޟާރަތް ދެމިގެންދިޔައީ އެކިއެކި ވެރިން ކުރި ބުރަ މަސައްކަތުން ކަމަށާއި، މި ދައުރުގައި ކުރެވޭ މަސައްކަތްތަކުގެ ސަބަބުން ކުރިއަށް އޮތް ގަރުނަށް އިސްލާމީ އަގީދާ ވަރުގަދަ ކަމާއެކު ފޯރުކޮށްދެވޭނެ ކަމަށް އިސްލާމިކް މިނިސްޓަރު ޑރ.ޝަހީމް އަލީ ސައީދު ވިދާޅުވެއްޖެއެވެ.
ރާއްޖެ އިސްލާމްވި ދުވަހުގެ ޖަލްސާގައި މިނިސްޓަރު ޝަހީމް ވިދާޅުވީ އުންމަތެއް ދެމިއޮތުމުގެ އެންމެ ވަރުގަދަ އަސާސަކީ ހެޔޮ ބަސް ބުނުން ކަމަށެވެ.
މިއަދު ރާއްޖޭގެ އިސްލާމީ ހަޟާރަތަށް 898 އަހަރު ވެގެންދިޔައިރު، އިސްލާމް ދީނުގެ ހަޟާރަތް ކުރިއެރުވުމަށް އަޒުމާއެކު މަސައްކަތް ކުރާ ސަރުކާރެއް ގާއިމްވެފައި އޮތުމަކީ ލިބުނު ވަރަށް ބޮޑު ނަސީބެއް ކަމަށް މިނިސްޓަރު ޝަހީމް ވިދާޅުވިއެވެ.
އެކިއެކި ވެރިންގެ މަސައްކަތުގެ ސަބަބުން އިސްލާމީ ހަޟާރަތް ދެމިގެން ދިޔަކަން ފާހަގަކުރައްވައި މިނިސްޓަރު ޝަހީމް ވިދާޅުވީ އެކިއެކި ޒަމާންތަކުގައި އެކި ފެންވަރުގައި އެކި ބޭފުޅުން މި ހަޟާރާތް ދަމަހައްޓައި ކުރިއެރުވުމަށް މަސައްކަތް ކޮށްފައިވާ ކަމަށެވެ. އަދި ރައީސް ޑރ.މުހައްމަދު މުއިއްޒުގެ މިދައުރުގައި ކުރެވޭ މަސައްކަތްތަކުގެ ސަބަބުން ކުރިއަށް އޮތް ގަރުނަށް ދިވެހި ގައުމުގައި އިސްލާމީ އަގީދާ ވަރުގަދަ ކަމާއެކު ފޯރުކޮށްދެވޭނެ ކަމަށް މިނިސްޓަރު ޝަހީމް ވިދާޅުވިއެވެ.
އެހެންކަމުން ހެޔޮކަންތައްތަކަށް އަމުރުކޮށް ނުބައި ކަންތައްތައް ނަހީ ކުރުމުގެ މަތިވެރި އަސާސް މުޖުތަމައުގައި ދަމަހައްޓަންޖެހޭ ކަމަށް މިނިސްޓަރު ޝަހީމް ވިދާޅުވިއެވެ.
ކެތްތެރިކަން އިސްކުރަންޖެހޭކަން ފާހަގަކުރައްވައި މިނިސްޓަރު ޝަހީމް ވިދާޅުވީ އާއިލީ ދިރިއުޅުމުގައި ދިމާވާ ކަންކަމާއި، ގައުމަށް އަންނަ އިގްތިސާދީ ފުދުންތެރިކަމާ ގުޅިގެން އަންނަ ދަތިތަކާއި، ދިރިއުޅުމަށް އަންނަ ހިތާމަތާކާއި، އުދަނގޫތަކަށް ކެތްތެރިވާންޖެހޭ ކަމަށެވެ. ކެތްތެރިކަމަކީ ވެސް ހިފަހައްޓަންޖެހޭ ވަރުގަދަ އަސާސެއް ކަމަށާއި، އުންމަތެއް ދެމިގެންދިއުމުގައި އަދި އުންމަތެއް ވަރުގަދަކަމާއި ސާބިތުކަމާއެކީ އޮތުމުގައި ނަސްރާއީ ނަސީބާއި ކާމިޔާބު ހޯދުމަށް އެ އަސާސްގައި ހިފަންޖެހޭ ކަމަށް މިނިސްޓަރު ޝަހީމް ވިދާޅުވިއެވެ.
