ވެރިކަމަށް ރައީސް މުއިއްޒު އައީއްސުރެ ފެންނަނީ ރައްޔިތުންގެ ވިސްނުމުގެ މައްޗަށް އަމިއްލަ ވިސްނުން އިސް ކުރާ މަންޒަރު - މާރިޔާ
ރައީސް ކޮސްޓަ ކޮފީ ހިއްޕެވި މަންޒަރު އާއްމުކުރުމަކީ ދިވެހިންގެ ވިސްނުމާއި ދުރަށް ރާއްޖެ ޖެހުނުކަން ރަމްޒުކޮށްދޭ ކަމެއް ކަމަށް އެ ކަމަނާ ވިދާޅުވި
ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ
ވެރިކަމަށް ރައީސް ޑރ.މުހައްމަދު މުއިއްޒު އައީއްސުރެ ފެންނަނީ ރައްޔިތުންގެ ވިސްނުމުގެ މައްޗަށް އަމިއްލަ ވިސްނުން އިސް ކުރާ މަންޒަރު ކަމަށް ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
އެކަމަނާ އެފަދައިން ވިދާޅުވީ ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
މާރިޔާ ވިދާޅުވީ ރައީސް މުއިއްޒުގެ ވެރިކަމަށް ބަލާލުމުން ރައްޔިތުންގެ ވިސްނުމާއި ސަރުކާރާއި ދުރުހެލި މިންވަރު ފެނިގެންދާ ކަމަށެވެ. ރައީސް މުއިއްޒު އދ. އަށް ކުރެއްވި ދަތުރުފުޅުގައި ދައްކަވާފައިވާ ވާހަކަފުޅުތަކުންނާއި، އުޅުއްވާ ގޮތްކޮޅުތަކުން ވެސް ފެނިގެން ދިޔައީ އެ މަންޒަރުކަމަށް މާރިޔާ ފާހަގަކުރެއްވިއެވެ. ރައީސް ޑރ.މުއިއްޒު އދ. އަށް ކުރެއްވި ދަތުރުފުޅުގެ ތެރެއިން އެއީ ޣައްޒާގެ ގަތުލުއާންމަށް މަދަދުވެރިވާ ވިޔަފާރިތައް ބޮއިކޮޓްކުރުމުގެ ގޮތުން ބޮއިކޮޓް ކޮށްފައިވާ ކޮސްޓަ ކޮފީ ހިއްޕެވި މަންޒަރު އާއްމުކުރުމަކީ ދިވެހިންގެ ވިސްނުމާއި ދުރަށް ރާއްޖެ ޖެހުނުކަން ރަމްޒުކޮށްދޭ ކަމެއް ކަމަށް އެ ކަމަނާ ވިދާޅުވިއެވެ. އެއީ ރާއްޖޭގެ އިޚްތިރާމް ކުޑަވާ ކަމެއް ކަމަށާއި އެއީ ރާއްޖޭގެ އަގު ވެއްޓޭ ކަމެއް ކަމަށް މާރިޔާ ވިދާޅުވިއެވެ. އެއީ ވަރަށް ދެރަކަމެއް ކަަމަށް ފާހަގަކުރައްވާ މާރިޔާ ވަނީ އެފަދަ ޢަމަލުތަކުގެ ސަބަބުން ރާއްޖެއިން ޖެނޮސައިޑް ނުވަތަ ނަސްލު ނައްތާލުމުގެ ޢަމަލުތައް ސީރިއަސްކޮށް ނުނަގަނީ ކަމަށް ސިފަކުރުމުގެ ފުރުސަތު އެބަ އޮތް ކަމަށެވެ.
މީގެ އިތުރުން ސަރުކާރުގެ ޕޮލިސީތައް ޙުދު ސަރުކާރަށް ވެސް ސާފު ނުވާ ކަމަށް މާރިޔާ ވިދާޅުވިއެވެ. ފޮރިން ޕޮލިސީ ޤާއިމް ކުރާ އިރު ވެސް ދިވެހިން ހިތް ނޭދޭ ކަންކަން ސަރުކާރުގެ ކިބައިން ފެންނަ ކަމަށް މާރިޔާ ވިދާޅުވިއެވެ. އެގޮތުން ދިވެހިންނަކީ ހުރިހާ ޤައުމަކާއި ގުޅޭ ރަހުމަތްތެރި ބައެއްގެ ގޮތުގައި އޮތް އޮތުން ސަރުކާރުގެ ޢަމަލުތަކުގެ ސަބަބުން ބަދަލުވަމުންދާ ކަމަށާއި އެހެން އެކަން ވަނީ އަމިއްލަ ވިސްނުން އިސްކުރާތީ ކަމަށް މާރިޔާ ވިދާޅުވިއެވެ. އަދި އދ.ގެ ދަތުރުފުޅުގައި ހުރިހާ ރަށެއް ތަރައްޤީ ނުވާނެ ކަމަށް ރައީސް ވިދާޅުވެފައިވާތީ އެކަމާއޮ މެދު މާރިޔާ ވަނީ ކަންބޮޑުވުން ފާޅުކުރައްވާފައެވެ.
ރާއްޖޭގެ 186 ރަށުގައި މީހުން ދިރިއުޅޭ ކަމަށާއި އެ ހުރިހާ ރަށެއް ތަރައްގީ ނުކުރެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އެމެރިކާގެ ޕްރިންސްޓަން ޔުނިވަރސިޓީގެ ދަރިވަރުންނާ ބައްދަލު ކުރައްވާ ރައީސް މުއިއްޒު ދެއްކެވި ވާހަކަފުޅުގައި ވިދާޅުވެފައެވެ. ރައީސް ވިދާޅުވީ ރާއްޖޭގައި 1100 ރަށް އޮންނަ އިރު, އޭގެތެރެއިން 186 ރަށުގައި މީހުން ދިރިއުޅުމަކީ އެއީ ނިސްބަތުން ބޮޑު އަދަދެއް ކަމަށެވެ.
