ރައީސް އަމީންއަށް ވީގޮތް ރައީސް މުއިއްޒުއަށް ވެދާނެ ކަމަށް ބުނެ، ވާހަކަ ދައްކާފައިވާތީ އެކަން ތަހުގީގު ކުރުމަށް ގޮވާލާ ކުއްލި މައްސަލަ އެއް މަޖިލީހަށް ހުށަހަޅައިފި
މިއީ ޓެރަރިޒަމް މަނާކުރުމުގެ ޤާނޫނުގައި ކުށެއް ކަމަށްވާތީ، މިކަން ސަރުކާރުގެ ސަމާލުކަމަށް ގެނައުމަށާއި މިކަން ތަހުގީގުކޮށް ފިޔަވަޅު އެޅުމަށް ކަމާ ބެހޭ އިދާރާތަކަށް ގޮވާލާފައިވޭ
20 ވަނަ މަޖިލީހުގެ މެމްބަރުން
ރާއްޖޭގެ ފުރަތަމަ ރައީސް މުހައްމަދު އަމީންއަށް ވީގޮތް ރައީސް ޑރ. މުހައްމަދު މުއިއްޒުއަށް ވެދާނެ ކަމަށް ބުނެ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) އެކި އެކި ޕޯޑިއަމްތަކުގައި ވާހަކަ ދައްކާފައިވާތީ އެކަން ތަހުގީގު ކުރުމަށް ގޮވާލާ ކުއްލި މައްސަލަ އެއް މަޖިލީހަށް ހުށަހަޅައިފިއެވެ.
މި ކުއްލި މައްސަލަ މަޖިލީހަށް ހުށަހެޅުއްވީ، މިލަންދޫ ދާއިރާގެ ސަރުކާރުގެ މެމްބަރު ޙަސަން މުފީދު ޢަބްދުލްޤާދިރެވެ.
އަންގާރަ ދުވަހު ހުށަހެޅުނު މި ކުއްލި މައްސަލައިގައި ބުނެފައިވަނީ، ރައީސުލްޖުމްހޫރިއްޔާ ޑރ މުޙައްމަދު މުއިއްޒަކީ، ޖުމްހޫރިއްޔާގެ ޤާނޫނުއަސާސީގައިވާ ގޮތުގެ މަތިން ރައްޔިތުންގެ ތަނަވަސް އަޣްލަބިއްޔަތަކުން އިންތިޚާބު ކުރެވިފައިވާ ރާއްޖޭގެ ރައީސުލްޖުމްހޫރިއްޔާ ކަމަށާއި، އަދި ރައީސުލްޖުމްހޫރިއްޔާގެ މަޤާމު ނިމޭނެ ހާލަތު ދިވެހި ޖުމްހޫރިއްޔާގެ ޤާނޫނުއަސާސީގައި ސާފުކޮށް ބަޔާން ކޮށްފާވާއިރު، ޤާނޫނުއަސާސީގައި ކަނޑައެޅި ބަޔާންކޮށްފައިވާ ގޮތާ ޚިލާފަށް، ރައީސް މުއިއްޒަށް ހަދަން ޖެހޭނީ އަމީނަށް ހެދި ގޮތް ކަމަށް ބުނެ ޓެރަރިޒަމްގެ އަމަލެއް ކުރުމަށް ހިތްވަރުދީ އެމްޑީޕީން އެކި އެކި ޕޯޑިއަމްތަކުގައި ވާހަކަ ދައްކާފައިވާތީ ޓެރަރިޒަމް މަނާ ކުރުމުގެ ޤާނޫނުގެ 8 ވަނަ މާއްދާގެ (ހ) ގައި ސީދާ ގޮތުން ނުވަތަ ނުސީދާގޮތުން ވިއަސް ޓެރަރިޒަމްގެ އަމަލެއް ކުރުމަށް ހިތްވަރު ދިނުމަކީ ކުށެއް ކަމަށެވެ.
އަދި އެ މާއްދާގެ (ށ) ގައި ހިތްވަރު ދިނުން މަނާ ކޮށްދީފައިވާ، މަނާ ކުރުމަށް ބަލާއިރު، މީހަކު ބުނާ ބުނުމަކުން ނުވަތަ ދޭ ބަޔާނަކުން އެއީ ޓެރަރިޒަމްގެ އަމަލެއް ކުރުމަށް ރޭވުމަށް ނުވަތަ މަގުފަހިކުރުވާ ކަމެއް ކަމަށް އާއްމުންގެ ބަޔަކަށް ފެންނަ ފެނުން ކަން އިނގޭއިރު ރައީސް މުއިއްޒަށް ހަދަން ޖެހޭނީ އަމީނަށް ހެދިގޮތް ކަމަށް ބުނެ ޓެރަރިޒަމްގެ އަމަލެއް ހިންގުމަށް ހިތްވަރުދީ ދައްކާފައިވާ ވާހަކަތަކަކީ ވަކި ސިޔާސީ ފިކުރެއް ކުރިއެރުވުމަށްޓަކައި އަދި އާއްމުންގެ ބައެއްގެ މެދުގައި ބިރުވެރިކަން އުފެއްދުމަށް އަދި އެހެން މީހެއްގެ ފުރާނައަށް ނުރައްކަލެއް ކުރިމަތި ކުރުމުގެ މަގުސަދުގައި ދައްކާފައިވާ ވާހަކަތަކެއް ކަމަށްވާތީ ޓެރަރިޒަމް މަނާކުރުމުގެ ޤާނޫނުގައި ކުށެއް ކަމަށްވާތީ، މިކަން ސަރުކާރުގެ ސަމާލުކަމަށް ގެނައުމަށާއި މިކަން ތަހުގީގުކޮށް ފިޔަވަޅު އެޅުމަށް ކަމާ ބެހޭ އިދާރާތަކަށް ގޮވާލާ ރައްޔިތުންގެ މަޖިލީހުގެ 192 ވަނަ މާއްދާގެ ދަށުން ކުއްލި މައްސަލަ ހުށަހަޅާ ކަމަށެވެ.
މި މައްސަލާގެ ބަހުސްގައި ސަރުކާރަށް ނިސްބަތްވާ ގިނަ މެމްބަރުން ވަނީ ވާހަކަފުޅު ދައްކަވާފައެވެ. އަދި ކަމާ ގުޅުން ހުރި އިދާރާތަކުން މި މައްސަލަ ބަލާ ތަހުގީގުކުރުމަށް ގޮވާލާފައިވެއެވެ.
ކުޅުދުއްފުށީގައި އެމްޑީޕީން ބޭއްވި ޖަލްސާގައި ވާހަކަ ދެއްކި މިހާ ބުނެފައިވަނީ، " މުހައްމަދު އަމީން ކުޅުނީ ދުންފަތާ ކަމަށާއި، މީނާ މިކުޅެނީ ޤާނޫނުއަސާސީއާއި ކަމަށާއި، އެހެން އެޅެނިކޮށް ކެއްސެއް ލިބިދާނެ" ކަމަށެވެ. އެވާހަކަތަކާ ގުޅުވައި އެމްޑީޕީން ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޗެއަރޕާސަން ފައްޔާޒު އިސްމާއިލް ވިދާޅުވީ، ކުޅުދުއްފުށީ ޕޯޑިއަމްގައި އެ ބޭފުޅަކު އެހެން އެ ވިދާޅުވީ ރައީސުލްޖުމްހޫރިއްޔާއަކަށް މިހާރު އެ ހުންނެވި ރައީސް ޑރ. މުއިއްޒުއަށް ނަސޭހަތުގެ ގޮތުގައި ކަމަށެވެ.
