ބޭނުންކުރުމާއި، އެތެރެކުރުން އަދި ވިއްކުން މަނާކުރުމަށް ނިންމާފައިވާ ވޭޕުން ނަގާ ޑިއުޓީ ބޮޑު ކުރަން މަޖިލީހަށް ބިލެއް ހުށަހަޅައިފިއެވެ.

ވޭޕް ބޭނުންކުރުމާއި، އެތެރެކުރުން އަދި ވިއްކުން މަނާކުރާ އިސްލާހު މި ހަފްތާގެ ތެރޭގައި މަޖިލީހަށް ފޮނުވާނެކަމަށް ސަރުކާރުން ވަނީ ކުރިން ބުނެފައެވެ.

އެހެންކަމަށް ވުމާއި އެކު ދުންފަތުގެ އުފެއްދުންތަކާއި ވޭޕުން ނަގާ އިމްޕޯޓް ޑިއުޓީ ބޮޑުކުރުމަށް ރައްޔިތުންގެ މަޖިލީހަށް ހުށަހަޅާފައިވާތީ އާއްމުން ދަނީ އެކަމާއި މެދު ސުވާލު އުފައްދަމުންނެވެ.މައްޗަންގޮޅި އުތުރު ދާއިރާގެ މެމްބަރު އިބްރާހިމް މުހައްމަދު (އިއްބެ ޖަނާބު)، ދިވެހިރާއްޖޭގެ އިމްޕޯޓް އެކްސްޕޯޓްގެ ގާނޫނަށް އިސްލާހު ގެނައުމަށް ހުށަހަޅުއްވާފައިވާ ބިލުގެ ފުރަތަމަ ކިޔުން އިއްވުން އޮތީ ހޯމަ ދުވަހުއެވެ.

ބިލުގައި ބުނާގޮތުން މިއީ ދިވެހިރާއްޖޭގެ އެކްސްޕޯޓް އިމްޕޯޓްގެ ޤާނޫނުގެ ދަށުން ދުންފަތާއި ދުންފަތުން ތައްޔާރުކޮށްފައި ހުންނަ ބާވަތްތަކުން ނަގާ އިމްޕޯޓް ޑިއުޓީ އިތުރުކުރުމަށާއި، ދުފަތް ކޮންޓްރޯލް ކުރުމާއި ބެހޭ ޤާނޫނުގެ ދަށުން އިލެކްޓްރޯނިކް ސިގިރެޓާއި ވޭޕް ބޭނުން ކުރުން ފަދަ އާލާތްތައް އެތެރެކުރުން މަނާކުރެވެންދެން، އެފަދަ ތަކެތިން ނަގާ އިމްޕޯޓް ޑިއުޓީ އިތުރުކުރުމަށް ހުށަހަޅާފައިވާ ބިލެކެވެ. އަދި އެކްސްޕޯޓް އިމްޕޯޓްގެ ޤާނޫނުގެ ދަށުން ނެގޭ އިމްޕޯޓް ޑިއުޓީ އާއި ރޯޔަލްޓީ ރެވެނިއު ފީ މާފުކުރެވޭނެ ހާލަތުތައް ބަޔާންކުރުމަކީ ވެސް މި ބިލުގެ މަޤްސަދެކެވެ.

އެ ބިލުގައި ހިމަނާފައި ވަނީ ސިނގިރޭޓުން ނަގާފީ 50 އިންސައްތަ އަދި ކޮންމެ ސިނގިރޭޓަކުން 8 ރުފިޔާ ބޮޑުކުރުމަށެވެ. އަދި ބިޑިން 50 އިންސައްތަ އަދި ކޮންމެ ބިޑިއަކުން 8 ރުފިޔާ އިތުރުކުރުމަށާއި، އީސިނގިރޭޓަށް ނުވަތަ ދުންފަތުގެ އިސްތިއުމާލު ކުރަން ބޭނުންކުރާ އާލާތްތަކަށް އަޅާ ފްލޭވާ: އިން 50 އިންސައްތަ އަދި މިލިލީޓަރަކަށް 8 ރުފިޔާ ބޮޑުކުރުމަށް ވަނީ ހިމަނާފައވެެ. ހަމައެހެންމެ ހީޓެޑް ޓޮބޭކޯ ޕްރޮޑަކްޓްސް ނުވަތަ ރޯކުރުމަކާ ނުލައި ހޫނުކޮށްގެން ބޭނުންކުރެވޭ ގޮތަށް އުފައްދާފައި ހުންނަ ދުންފަތުގެ އުފެއްދުންތަކުން 50 އިންސައްތަ އަދި ކޮންމެ ސްޓިކަކުން 8 ރުފިޔާ އިތުރުކުރުމަށް ވަނީ ހިމްނާފައެވެ.

އެ އިސްލާހުގައި ބުނާ ގޮތުން މި ރޭޓުގެ ދަށުން އިމްޕޯޓު ޑިއުޓީ ނަގަން ހަމަޖެހިފައި ވަނީ ނޮވެމްބަރު މަހުުގެ ފުރަތަމަ ދުވަހުން ފެށިގެންނެވެ.

ރައީސް ޑރ. މުހައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024ން ފެށިގެން މަނާ ކުރުމަށް އަންގަވާފައިވާ ކަމަށެވެ. ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024ން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށެވެ.