އަމިއްލަފުޅަށް މުސާރާތައް ކުޑަކުރައްވައިގެން ގައުމު ބަދުނާމު ނުކުރައްވާށެވެ!

ބުރާސްފަތި ދުވަހު ހެނދުނު ހޭލިއިރު، ރައީސް ޑރ މުޙައްމަދު މުއިއްޒުގެ ޕޯސްޓެއް އަނެއްކާވެސް އެކްސް އިން ފެނިއްޖެއެވެ. އިގްތިސާދީ އިސްލާހީ އެޖެންޑާގެ ދަށުން ޚަރަދު ކުޑަކުރެއްވުމަށް އިތުރު ފިޔަވަޅެއް އެޅުއްވި ވާހަކަ އެވެ. ރައީސް ހިމެނިވަޑައިގަންނަވާ ގޮތަށް އެތައް ބައެއްގެ މުސާރަ އުނިކުރައްވަން ނިންމެވިވާހަކަ އެވެ. ރައީސްގެ މުސާރައިން 50 ޕަސެންޓެވެ. 12،000 ރުފިޔާއިން މަތީގެ މުސާރަ ލިބޭ އެންމެންގެ މުސާރައިން 10 ޕަސެންޓެވެ.

މީހަކު ހައިރާނެއް ނުވާނެތޯއެވެ. ގައުމަށް މިއުޅެނީ ކީއްވެގެންތޯއެވެ. ލައިގަނެގެން މިއުޅެނީ ކޮން ކަމެއްތޯއެވެ. ޖެހިގެން މިއުޅެނީ ކޮން ގިލަންވެރިކަމެއްތޯއެވެ. ގައުމު މިއޮތީ ކޮވިޑް19 ގެ ހާލަތުގައިތޯ އެވެ. ބޯޑަރުތައް ހުރީ ބަންދުކޮށްފައިތޯއެވެ. ނުވަތަ ގައުމަށް ބަޔަކު ހަމަލާދީ ގައުމު ހަނގުރާމައިގެ ހާލަތަކަށް ވެއްޓުނީތޯއެވެ. ނުވަތަ ސުނާމީ ކަހަލަ ގުދުރަތީ ކާރިސާއެއް ގައުމަށް ދިމާވީތޯއެވެ؟ ނޫނެކެވެ.

ވިސްނާ ވިސްނާ ވިސްނުން ކޮޅުން ލިއިރުވެސް ވެގެން އުޅޭ ގޮތެއް ނުވިސްނުނެވެ. ތަފާސް ހިސާބު އެހުރީ ދިމާއަށް ފެންނާށެވެ. ފަތުރުވެރިން އަންނަލެއް ވީ އިތުރެވެ. އާމްދަނީ ލިބޭ އެހެން ވަސީލަތްތަކެއް ބަންދެއް ނުވެއެވެ. މަސް އެބަ ބާނަ އެވެ. ބޭރުގެ އެހީ އެބަލިބެއެވެ. ޓެކްސް ދައްކާ މިންވަރު ވީ އިތުރެވެ. ޖުރިމާނާ އާއި ނުދައްކާ ހުރި ފައިސާ ދައުލަތައް ލިބޭލެއްވީ އިތުރެވެ. ސަރުކާރުތަކުން ބޮޑެތި ޚަރަދުތަކެއް ކުރަމުން އައި ޕީއެސްއައިޕީ ހުރިހާ ޕްރޮޖެކްޓްތަކެއް ހުރީ ހުއްޓާލާފައެވެ. ވި އިރު މަދުވީ ކޮން އެއްޗެއްތޯއެވެ. ބޮޑުވީ ކޮން ޚަރަދެއްތޯއެވެ. ހަމަ ނުޖެއްސިގެން މިއުޅެނީ ކޮންކަމެއްތޯއެވެ. ސިޔާސީ މަގާމުތައް 2000ށް ވުރެ މަތިވެ، ރިކަރެންޓް ޚަރަދު އިންތިހާއަށް ބޮޑުވުން އެއީ ބޮޑުވި ޚަރަދޭ ބުނާނަމަ އެއީ ކާކުގެ މައްސަލައަކުން ދިމާވި ކަމެއްތޯއެވެ. 700ށް ވުރެ އިތުރު ނުކުރާނަމޭ ވިދާޅުވި، ސިޔާސީ މަގާމުތަކުގެ އަދަދު 2000ން މައްޗަށް ގެންދިއައީ ކާކުތޯއެވެ. ރައީސްގެ މުނިފޫހިފިއްލެވުމަށް އާ ރަށަށް ކުރައްވާ ޚަރަދު ލައްކަ ލައްކައިން ބޮޑުވެގެން ދިއުން އެއީ ބޮޑުވި ޚަރަދޭ ބުނާނަމަ އެއީ ކާކުގެ ސަބަބުން ބޮޑުވި ޚަރަދެއްތޯއެވެ. ކުޅިވަރާ މަޖާކުރުމަށް ދައުލަތުގެ ބަޖެޓުން ޚަރަދު ކުރައްވައިގެން އާ ރަށަށް ކުޅިވަރު ކުޅެން ދަނީ ރައްޔިތުންނެއް ނޫނެއް ނޫންތޯއެވެ. އިންޑިއާ ދެކެ ރުޅި އައިސްގެން ތުރުކީއަށް ވަޑައިގެން 500 މިލިއަން ރުފިޔާ ޚަރަދު ކުރައްވާ ޑްރޯން އެއް ބައްލަވައިގަތުން އެއީ ބޮޑުވި ޚަރަދެއް ކަމަށް ބުނާނަމަ އެކަން ކުރަން ބުނީ ކޮން ރައްޔިތަކުތޯއެވެ.

މުސާރަ ކުޑަ ނުކުރައްވާނެ ކަމަށާއި، ވަޒީފާއިން މީހުން ނުކަޑާނެ ކަމަށާއި، ރަށްރަށުގައި ހިނގާ ތަރައްގީގެ އެއްވެސް މަޝްރޫޢު އެއް ހުއްޓަވާނުލައްވާނެ ކަމަށާއި، ފައިސާ ހުރީ ހަމަޖެހިފައި ކަމަށާއި، އެއްވެސް ދައްޗެއް ނެތް ކަމަށާއި، ހާސްވާން ނުޖެހޭ ކަމަށް ވިދާޅުވެ، ވައުދުވެވަޑައިގަތީ ކާކުތޯއެވެ. އެ ވައުދުތައް އެގޮތަށް ވާން އެއްވެސް މީހެއް ރައީސް އަރިހުގައި ދެންނެވިތޯއެވެ.

ވީއިރު ވެރިކަމަށް އަހަރެއް ނުވަނީސް އަމިއްލަފުޅު މުސާރައިން 50 އިންސައްތަ އުނިކުރައްވާ ދެން ތިބި މީހުންގެ މުސާރައިން 10 އިންސައްތަ އުނިކުރައްވައިގެން ސާބިތުކޮށްދެއްވަން ބޭނުންފުޅުވަނީ ކޮން ކަމެއްތޯއެވެ. ދިވެހިރާއްޖެ އަކީ ތިޔަ ހީފުޅުކުރައްވާ ކަހަލަ ނިކަމެތި ގައުމެއް ނޫނެއް ނޫންތޯއެވެ. މިއީ މިގައުމުގެ ރައީސަކަށް ހުންނަ ބޭފުޅަކަށް މުސާރަ ނުދެވޭވަރުގެ ބަލިކަށި ގައުމެއްވެސް ނޫނެއްނޫންތޯއެވެ. މީއީ ފަޚުރުވެރި ގައުމެކެވެ. މި ގައުމުގައި ރައީސްކަން ކުރެއްވި ރައީސަކަށް ގައުމު ދުވަހަކު ވެސް ދަރާފައެއް ނެތެވެ. ވީއިރު، އެ ބަދުނާމު ގައުމުގެ ބޮލުގައި އަޅުއްވަން ތިޔަ އުޅުއްވަނީ ކީއްވެގެންތޯއެވެ. ރައްޔިތަކު ދައްކަން އޮތް ޓެކްސް ފައިސާއެއް ނުދައްކައެއް ނެތެއް ނޫންތޯއެވެ. ކިތައްމެ ދައްޗަސް، ކިތައްމެ ނިކަމެއްޗަސް، ދިވެހިން އުޅެނީ ދައްކަންޖެހޭ ކޮންމެ ޓެކުހެއް ދައްކައިގެންނެވެ. ކުރި ކޮންމެ ޖޫރިމަނާއެއް ވެސް ދައްކައިގެންނެވެ. ސަރުކާރުން ހޯދި ކޮންމެ ޚިދުމަތަކަށް ދައްކަން ޖެހުނު ކޮންމެ ފީއެއް ބަރާބަރަށް ދައްކައިގެންނެވެ. ވިއްކި ކޮންމެ އަގެއްގައި ކާބޯތަކެތި ގަނެގެންނެވެ.

ވީއިރު، އަމިއްލަފުޅަށް ހެއްދެވުނު އެތައް ގޯހެއްގެ އަގު މުވައްޒަފު މީހާ ދައްކަން ތިޔަ ޖައްސަވަނީ ކީއްވެތޯއެވެ. ކުޑަ މުސާރަ ލިބޭ މީހާގެ ވާނޮޅި ބުރިކޮށްލައްވަން ތިޔަ ދިމާކުރެއްވީ ކީއްވެތޯއެވެ. ގައުމަށް އެފަދަ ހާލަތެއް މެދުވެރިވުމުން އެކަން ދިވެހިން ގަބޫލުކުރާނެ އެވެ. އެއްބާރުލުން ވެސް ދޭނެއެވެ. މީގެ ކުރިން ވެސް އެފަދަ ދަނޑިވަޅުތަކުގައި ދިވެހިން އޮންނާނީ އެކަން ސާބިތުކޮށްދީފައެވެ. އެކަމަކު މިއަދު މިއީ އެހާލަތެއް ނޫނެއްނޫންތޯއެވެ. ރައީސަށް ގައުމުގެ އިޤްތިސާދު މެނޭޖް ނުކުރެއްވުމުގެ އަގު ދިވެހިން ދައްކަންޖެހޭ ހާލަތެއް ނޫނެއްނޫންތޯއެވެ.