ޤާނޫނީ ތަރަހައިގެ ތެރެއިން ކަންކަން ނުކުރެވޭނަމަ ރައްޔިތުންގެ ބާރު ދެއްކޭނީ މަގުމަތިން - މާރިޔާ
31 ޖެނުއަރީގައި އެމްޑީޕީން ޤާނޫނުއަސާސީގެ ދިފާއުގައި ބާއްވާ ހިނގާލުން ކުރިއަށް ގެންދަނީ ޤާނޫނުއަސާސީގެ ދިފާއުގައި އަދި ސަރުކާރުން ކުރާ ނުރަނގަޅު ކަންކަމާއި ދެކޮޅަށް އަޑު އުފުލުމުގެ ގޮތުން
އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ރާއްޖެޓީވީގެ ފުދިއްޖެ ފުނޑިއްޖެ ކަވަރޭޖްގައި ވާހަކަދައްކަވަނީ
ޤާނޫނީ ތަރަހައިގެ ތެރެއިން ކަންކަން ނުކުރެވޭނަމަ ރައްޔިތުންގެ ބާރު ދެއްކޭނީ މަގުމަތިން ކަމަށް ރަައްޔިތުންގެ މަޖިލީހުގެ ކުރީގެ މެމްބަރު އަދި އެމްޑީޕީގެ ކުރީގެ ޗެއަރޕަރސަން މާރިޔާ އަހުމަދު ދީދީ ވިދާޅުވެއްޖެއެވެ.
މާރިޔާ އެފަދައިން ވިދާޅުވީ ރާއްޖެޓީވީގެ ފުދިއްޖެ ފުނޑިއްޖެ ކަވަރޭޖްގައި ވާހަކަދައްކަވަމުންނެވެ.
އޭނާ ވިދާޅުވީ ޤާނޫނުއަސާސީ އަށް އިސްލާހު ގެނައި އިރު އެ ޤާނޫނުއަސާސީ އަށް ކިޔަމުން ވެސް އައީ މުޒާހަރާ ޤާނޫނުއަސާސީ ކަމަށެވެ. މުޒާހަރާކުރުމާއި ޚިޔާލުފާޅުކުރުމަކީ ޤާނޫނުއަސާސީ އިން ލިބިދޭ މުހިންމު ހައްްގެއް ކަމަށް ވާއިރު އެ ހައްގުގެ ބޭނުންކޮށް އާއްމުން ނުރުހޭ ކަންކަން ސަރުކާރަށް ސާފުކޮށް އިއްވަންވީ ދަނޑިވަޅަކީ މިއީ ކަމަށް މާރިޔާ ވަނީ ވިދާޅުވެފައެވެ. މާރިޔާ ވިދާޅުވީ ބާރުތައް މަސްހުނިވެފައި އޮތް ނިޒާމަކުން އަރައިގަނެވުނީ ވެސް މުޒާހަރާކުރުމުގެ ހައްގު އާއްމުންނަށް ލިބޭ ގޮތަށް ޤާނޫނުއަސާސީ އަށް ގެނައި އިސްލާހުތަކުގެ ސަބަބުން ކަމަށެވެ. އެހެންނަމަވެސް ޤާނޫނުއަސާސީ އަށް މިފަހުން މަޖިލީހުން ބަދަލުގެނެސް ޕާޓީ ބަދަލުކުރުމުން ޕާޓީ އަށް މެމްބަރުން ވަކިކުރެވޭ ގޮތަށް ހަމަޖެއްސުމަކީ އަނެއްކާވެސް ބާރުތައް މަސްހުނިވުން ކަމަށް މާރިޔާ ވިދާޅުވިއެވެ.
އެކަމުގެ ސަބަބުން ބާރުތައް މަސްހުނިވެފައިވާ ކަަމަށާއި ޤާނޫނީ ވެރިކަމެއް ހިނގާ ގޮތަކީ އެއީ ނޫންކަމަށް އޭނާ ވަނީ ވިދާޅުވެފައެވެ. އެއްވެސް މީހަކީ ޤާނޫނަށް ވުރެ މަތީގައި ހުންނާނެ މީހެއް ނޫންކަމަށާއި ވެރިކަން ހިންގަން ވާނީ އެކަން ދަނެގެން ކަމަށް އޭނާ ވަނީ ވިދާޅުވެފައެވެ. މާރިޔާ ވަނީ މަގުމައްޗަށް ނުކުމެ އަޑު އުފުލުމަކީ އެއީ ވެރިކަން ވައްޓާލަން އުޅުންކަމަށް ސިފަކުރާތީ ކަންބޮޑުވެވަޑައިގަންނަވާކަމަށެވެ.
މާރިޔާ ވަނީ ކުއްލިއަކަށް ޤާނޫނުއަސާސީ އަށް ބަދަލުގެނައުމާއި ނިޒާމް އޮޅުވާލުމަކީ ރައީސަކު އިސްވެހުންނަވައިގެން ކުރާ ޒާތުގެ ކަންކަން ނޫންކަމަށް ވިދާޅުވެފައެވެ. ރައްޔިތުންގެ ފައިސާ ހޭދަކުރަންވާނީ ރައްޔިތުންގެ ބަހާއި ޚިޔާލު ހިމަނައިގެން ކަމަށް މާރިޔާ ވަނީ ވިދާޅުވެފައެވެ. ޤާނޫނުއަސާސީ އިސްލާހު ކުރީ ހައްގުތައް ހިމާޔަތްކުރެވޭނެ ނިޒާމަކަށް ފަހިކޮށްދިނުމަށް ކަމަށާއި އެކަން އެހެން ނުހިނގާ ނަމަ އެކަމާއި މެދު އަޑު އުފުލާ ޒިންމާދާރުކުރުވަން އާއްމުން މަގުމައްޗަށް ނުކުންނާނެ ކަމަށް މާރިޔަ ވަނީ ވިދާޅުވެފައެވެ. މި ޖީލުގެ ދަރިންނާއި ދަރިންގެ ދަރިންނަށްޓަކާ މަސައްކަތް ކުރާ ނަމަ އާއްމުންގެ ހައްގުތައް ވާ ކޮށްލަން ދޫކޮށްލެވެން ނެތްކަމަށް މާރިޔާ ވިދާޅުވިއެވެ.
މާރިޔާ ވަނީ 31 ޖެނުއަރީގައި ބާއްވާ އެއްވުމަށް ވީހާވެސް ގިނަ އާއްމުން ދިއުމަށް މާރިޔާ ވަނީ ގޮވާލައްވާފައެވެ. 31 ޖެނުއަރީގައި އެމްޑީޕީން ޤާނޫނުއަސާސީގެ ދިފާއުގައި ބާއްވާ ހިނގާލުން ކުރިއަށް ގެންދަނީ ޤާނޫނުއަސާސީގެ ދިފާއުގައި އަދި ސަރުކާރުން ކުރާ ނުރަނގަޅު ކަންކަމާއި ދެކޮޅަށް އަޑު އުފުލުމުގެ ގޮތުންނެވެ.
