"2028ގެ ޕީއެންސީގެ ރިޔާސީ ކެނޑިޑޭޓަކީ ރައީސް މުއިއްޒު، ޕްރައިމަރީ އެއް ނުބާއްވާނެ"

2028ގެ ޕީއެންސީގެ ރިޔާސީ ކެނޑިޑޭޓަކީ ރައީސް ޑރ.މުހައްމަދު މުއިއްޒު ކަމަށާއި ރިޔާސީ އިންތިޚާބަށް ޕީއެންސީގެ ޕްރައިމަރީ އެއް ނުބާއްވާނެ ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.

ހޮނިހިރު ދުވަހު ކުރިއަށް ދިޔަ އެ ޕާޓީގެ އެތެރޭގެ އިންތިހާބުތަކާ ގުޅޭގޮތުން ބޭއްވި ނޫސްވެރިންގެ ބައްދަލުވުމެއްގައި އަބްދުއްރަހީމް ވަނީ އެކަން އެގޮތަށް ކުރައްވަނީ ޕީއެންސީގެ އަސާސީ ޤަވާއިދުގެ ދަށުން ރިޔާސީ ޓިކެޓް ލިބިވަޑައިގަންނަވާނީ ރައީސްކަމުގައި ހުންނެވި މުއިއްޒު އަށް ކަމަށް ވާތީ ކަމަށް ވިދާޅުވެފައެވެ. އެހެންނަމަވެސް އެކަން އެގޮތަށް ހިނގާނީ ރައީސް މުއިއްޒު ދެވަނަ ވެރިކަމަށް ކުރިމަތިލާން ބޭނުންވެވަޑައިގަންނަވާ ހާލަތުގައެވެ. އެ ހާލަތުގައި ޕްރައިމަރީ އަށް ކުރިމަތިލާން އެހެން ބޭފުޅުން ތިއްބެވިއަަސް އެކަމަށް ފުރުސަތު ނުލިބޭނެކަން އަބްދުއްރަހީމްގެ ވާހަކައިން ދޭހަވެއެވެ.

ނޫސްވެރިންގެ ސުވާލުތަަކަށް ޖަވާބުދެއްވަމުން އަބްދުއްރަހީމް ވަނީ ރާއްޖޭގެ ވެރިކަން ކުރުމުގެ އެއްވެސް ވިސްނުމެއް ނެތްކަމަށް ވިދާޅުވެފައެވެ. އެއީ އެއްވެސް އިރެއްގައި ގެންގުޅުއްވި ވިސްނުމެއް ނޫން ކަމަށާއި ކުރިއަށް އޮތްތަނުގައި ވެސް އެ ވިސްނުން ނުގެންގުޅުއްވާނެ ކަަމަށް އަބްދުއްރަހީމް ވަނީ ވިދާޅުވެފައެވެ. މީގެ އިތުރުން އެ ނޫސްވެރިންގެ ބައްދަލުވުމުގައި އޭނާ ވަނީ ރައީސް މުއިއްޒު އާއި އެ މަނިކުފާނާއި މެދު ޚިޔާލުތަފާތުވުންތައް އޮތް ކަމަށާއި ސިޔާސީ ނުތަނަވަސްކަން ބޮޑުވެފައިވާ ކަމަށް ތުހުމަތުކޮށް ދެކެވޭ ވާހަކަތައް ވެސް ދޮގުކުރައްވާފައެވެ. މި ވެރިކަމުގެ ކުރިން ވެސް ރައީސް މުއިއްޒު އާއި އެ މަނިކުފާނާއި ދެމެދު ގާތް ގުޅުމެއް އޮންނަކަމަށް ފާހަގަކުރައްވާ އަބްދުއްރަހީމް ވަނީ އެ ގުޅުން މިހާރުވެސް ބަދަހިވަމުންކަމަށް ވިދާޅުވެފައެވެ. މަޖިލީހުގެ ރައީސްކަމަށް އަބްދުއްރަހީމްގެ ނަން ރައީސް މުއިއްޒު ހުށަހެޅުއްވުމަކީ އެ ގާތް ގުޅުމުގެ ހެއްކެއް ކަމަށް އަބްދުއްރަހީމް ސިފަކުރެއްވިއެވެ.

2023 ވަނަ އަހަރު ރައީސް މުއިއްޒު ރިޔާސީ އިންތިހާބުގައި ވާދަކުރެއްވީ ފަހު ވަގުތު އެހެން ގޮތެއް ނެތުމުން ކަމަށް ޕީޕީއެމް ޕީއެންސީން އައީ ބުނަމުންނެވެ.

ނިމިދިޔަ ރިޔާސީ އިންތިޚާބުގައި ޕީޕީއެމްގެ ރިޔާސީ ޓިކެޓް ރައީސް އަބްދުﷲ ޔާމީނަށް ޕްރައިމަރީއަކީ ނުލާ ހަވާލުކުރުމުގައިވެސް އިސްކޮށް ހުންނެވީ އަބްދުއްރަހީމެވެ. މިކަން މިގޮތައް ކުރެއްވި ނަމަވެސް އޭނާ ފަހުން ވިދާޅުވީ، މުއިއްޒު ވެރިކަމަށް ގެނައުމަށް މާކުރިން ރޭވުންތައް ރާވާފައިވާނެ ކަމަށެވެ.