އަބްދުލް މަޖީދު މާހިރު އަވަހާރަވެއްޖެ

ދައުލަތައް ގިނަ ދުވަސްތަކެއް ވަންދެން ޚިދުމަތް ކުރައްވާފައިވާ އަބްދުލް މަޖީދު މާހިރު އުމުރުފުޅުން 96 އަހަރުގައި އަވަހާރަވެއްޖެއެވެ.

އޭނާ އަވަހާރަވީ ބުރާސްފަތި ދުވަހުގެ ހަވީރުގެ ވަގުތެއްގައި މާލޭގައެވެ.

ރާއްޖޭގެ ސިޔާސީ ދާއިރާގައި ފާހަގަ ކުރެވުނު އަދި ރާއްޖޭގެ ސިޔާސީ އިސްލާހީ ހަރަކާތުގައި ވެސް ފާހަގަ ކުރެވުނު ޝަޚްސިއްޔަތެކެވެ.

އަބްދުލް މަޖީދު މާހިރަކި ރާއްޖޭގެ ކުރީގެ ރައީސް މަރްހޫމް އިބްރާހިމް ނާސިރުގެ ބޮޑުބޭބެއެވެ.

އަބްދުލްމަޖީދު މާހިރަކީ ވެލާނާގޭ މުހައްމަދު ދީދީގެ ބޭފުޅެކެވެ.

އެމަނިކުފާނުގެ މަންމާފުޅަކީ ފުވައްމުލަކު ފުނާޑު، ގަނޑުވަރު އައިސާ ދީދީ އެވެ.

ދިގުމުއްދަތަކަށް ސަރުކާރަށް ޚިދުމަތް ކުރެއްވި އަބްދުލް މަޖީދު މާހިރު، ރައީސް އިބްރާހިމް ނާސިރުގެ ވެރިކަމުގައި، މަހަކަމަތުލް މާލިއްޔަތުގެ ނައިބު ކަމާއި، މަހަކަމަތުލް އަމަންއާންމުގެ ވެރިޔާގެ ނައިބު ކަމާއި 1960-1961 ށް މާލޭ މުނިސިޕަލް ކައުންސިލްގެ ރައީސްކަން އަދާކުރެއްވުން ހިމެނެއެވެ.

ރައީސް މައުމޫނުގެ ވެރިކަމުގައި މޯލްޑިވްސް ވޯޓަރ އެންޑް ސެނިޓޭޝަން އޮތޯރިޓީގެ ޑިރެކްޓަރުކަން އަދާ ކުރެއްވިއެވެ.

ރާއްޖޭގެ ފުރަތަމަ ޖުމްހޫރިއްޔާގެ ރައީސް މުހައްމަދު އަމީންގެ ދަރިކަނބަލުން އަމީނާ މުހައްމަދު އަމީން އާ ކައިވެނި ބައްލަވައިގެން މާހިރަށް ލިބިވަޑައިގެން ބޭފުޅުންގެ ތެރޭގައި ކުރީގެ ޑިފެންސް މިނިސްޓަރ އަމީން ފައިސަލް އާއި އިނގިރޭސިވިލާތަށް ރާއްޖެއިން ކަނޑައަޅާފައި ހުންނަވާ ސަފީރު ކަމުގެ މަގާމު ކުރިން އަދާކުރެއްވި ޑރ. ފަރަހްނާޒް ފައިސަލް ހިމެނިވަޑައިގަންނަވައެވެ.

މީގެ އިތުރުން ފަތުރުވެރިކަމުގެ ދާއިރާގައި ފާހަގަކޮށްލެވޭ އަހްމަދު މާހިރު އާއި މުހައްމަދު މާހިރަކީވެސް އަބްދުލް މަޖީދު މާހިރުގެ ދެ ބޭފުޅުންނެވެ. އެއީ ކޮލިގޭ ފާތުމަތު ނާސިރާ އާ ކައިވެނިބައްލަވައިގެން ލިބިވަޑައިގެންނެވި ދެ ބޭފުޅުންނެވެ. މީގެ ތެރެއިން މުހައްމަދު މާހިރު ވަނީ ނިޔާވެފައެވެ.

އަބްދުލް މަޖީދު މާހިރު ތިން ކައިވެނި ކުރެއްވި އިރު، ހީރާ ޔޫސުފްފުޅުގެ ސައީދާ އާ ކައިވެނި ބައްލައިވަގެން ތިން ބޭފުޅުން ލިބިވަޑައިގެންފައިވެއެވެ.

މާހިރަކީ ސަގާފީ ބޭސްވެރިކަމުގެ ތަޖުރިބާކާރެކެވެ. އެ ރޮނގުން އޭނާވަނީ ފޮތްވެސް ލިޔުއްވާފައެވެ.

އަބްދުލް މަޖީދު މާހިރު އަވަހާރަވުމުގެ ހިތާމައިގައި ރައީސުލް ޖުމްހޫރިއްޔާ ޑރ. މުހައްމަދު މުއިއްޒު ވަނީ ތައުޒިޔާ ވިދާޅުވެފައެވެ.

އަބްދުލް މަޖީދު މާހިރަކީ ދިވެހި ރާއްޖޭގެ އިސްރަށްވެެހިންގެ ތެރެއިން ނުހަނު ގަދަރުވެރި، ޚިދުމަތްތެރި، ތަޖުރިބާކާރު، ހަރުދަނާ ޝަޚްސިއްޔަތެއްގެ ގޮތުގައި ޑރ. މުއިއްޒުގެ ތައުޒިޔާގެ މެސެޖްގައި ފާހަގަ ކުރެއްވިއެވެ.

އަބްދުލް މަޖީދު އަވަހާރަ ވުމާއި ގުޅިގެން "ދިވެހިންނަށް ވަކިވެ އެ ދިޔައީ ރާއްޖޭގެ އެންމެ އަގުހުރި އެއް ހަޒާނާ،" ކަމަށް ކުރީގެ ރައީސް މުހައްމަދު ނަޝީދު އެކްސްގައި ކުރެއްވި ޕޯސްޓްގައި ވިދާޅުވިއެވެ.

އަބްދުލް މަޖީދު މާހިރު ފަސްދާނުލުން އޮންނާނީ ގަލޮޅު ސަހަރާގައެވެ. ކަށު ނަމާދު އޮންނާނީ ބުރާސްފަތި ދުވަހުގެ ރޭ އިޝާ ނަމާދަށް ފަހުގައެވެ.

މަރުހޫމް އަބްދުލް މަޖީދު މާހިރުގެ މޫނުދެއްކުން އޮތީ އިސްލާމީ މަރުކަޒުގައެވެ.