އަބްދުލްރަހީމް ނޫސްވެރިންނަށް ފިއްލަވައިގެން މާލެ ވަޑައިގެންފި

އަންގާރަ ދުވަހުގެ ރޭ ރައްޔިތުންގެ މަޖިލީހުގެ ރައީސް އަބްދުލްރަހީމް އަބްދުﷲ ރާއްޖެ ވަޑައިގެންފިއެވެ.

އަބްދުލްރަހީމް ވަޑައިގަންނަވާ ގަޑިއަށް ރާއްޖޭގެ ގިނަ މީޑިއާ ތަކުން އެމަނިކުފާނާ ބައްދަލު ކުރުމަށް ވެލާނާ އިންޓަރނޭޝަނަލް އެއަރޕޯޓަށް ގޮސް ތިއްބެވެ.

އެހެން ނަމަވެސް އަބްދުލްރަހީމް އެއަރޕޯޓުން މާލެ އަށް ވަޑައިގަތީ ނޫސްވެރިންނަށް ފިއްލަވައިގެންނެވެ.

އެއަރޕޯޓަށް ދިޔަ ރާއްޖެޓީވީގެ ނޫސްވެރިޔާ ބުނިގޮތުގައި އަބްދުލްރަހީމް ބޭރަށް ނުކުންނެވުމުގެ ބަދަލުގައި އޭނާ ބަލައި ވެހިކަލްތައް އޭޕްރަން އަށް ވަދެފައި ތިބިކަން އެނގުނީ އަބްދުއްރަހީމް އިންނެވި ވެހިކަލު ހިމެނޭ ގޮތުން ވެހިކަލްތަކެއް ވަރަށް ބާރަށް ދުއްވާފައި ނުކުތުމުން ކަމުގައެވެ.

މިއީ އާއްމުކޮށް ދައުލަތުގެ އިސް ވެރިން މާލެ ވަޑައިގަންނަވާ އިރު އަމަލުކުރާ ގޮތް ނޫންކަން ފާހަގަކުރެވެއެވެ.

އެ ސަރަހައްދުގައު ހުރި ރާއްޖެ ޓީވީގެ ނޫސްވެރިޔާ ބުނިގޮތުގައި މީޑިއާތަކުން މަޖިލީހުގެ ރައީސް ރާއްޖެ ވަޑައިގަންނަވާ ގަޑި ސާފުކުރުމަށް ސުވާލުކުރުމުން އެކަމާ ގުޅޭ މައުލޫމާތު އެެއާޕޯޓް ސްޓާފުން ވަނީ މީޑިއާތަކަށް ފޯރުކޮަށްދީފައެވެ. އެހެންކަމުން މީޑިއާތަކުން ތިބީ އެއާޕޯޓުގެ ވީއައިޕީ އޭރިއާގެ ބޭރުގައި މަޑުކޮށްގެންނެވެ. އަދި ސުވާލުކުރުމަށް ފުރުސަތު ލިބޭނެތޯ ނޫސްވެރިން ސުވާލުކުރުމުން އަބްދުލްރަހީމްގެ ސެކިއުރިޓީ އާއި އެއަރޕޯޓް ސްޓާފުން ވެސް އެކަމަށް އިންކާރުކޮށްފައި ނުވާ ކަމަަށް އެ ނޫސްވެރިޔާ ބުނެފައިވެއެވެ.

އަބްދުލްރަހީމްގެ އިސްތިޤްބާލަަށް ރައްޔިތުންގެ މަޖިލީހުގެ އޮފިޝަލެއްވެސް އަދި މެމްބަރެއް ވެސް ވަޑައެއް ނުގަންނަވައެވެ.

ވެރިކަންކުރާ ޕީއެންސީގެ ޗެއާޕާސަން ގެ މަގާމުވެސް ފުރުއްވަމުން ގެންދަވާ އަބްދުއްރަހީމް މާލެ ވަޑައިގެންނެވި އިރު، ރައްޔިތުންގެ މަޖިލީހުގެ ރައީސް ކަމުގެ މަގާމުން އޭނާ ދުރުކުރުމުގެ މަސައްކަތް ކުރަމުންދާ ކަމާއި އަދި ޕީއެންސީ ހިންގުމުން އޭނާ އެކަހެރި ކޮށްފައިވާ އަޑުތައްވެސް ވަނީ ފެތުރިފައެވެ. އޭގެ އިތުރުން އެކިއެކި ކަންކަމުގައި އަބްދުލްރަހީމް ގެ މަޝްވަރާ ހޯއްދެވުން ރައީސް ޑރ. މުހައްމަދު މުއިއްޒު ހުއްޓާލައްވައިފި ކަމަށްވެސް މީޑިއާ ރިޕޯޓުތަކުގައިވެއެވެ.

ރައީސް މުއިއްޒުގެ ކެބިނެޓުގައި ޓޫރިޒަމް މިނިސްޓަރު ކަމުގެ މަގާމުގައި ހުންނެވި އަބްދުލްރަހީމް ގެ ދަރިކަލުން އިބްރާހީމް ފައިސަލް ކުއްލި ގޮތަކަށް އަންގާރަ ދުވަހު ވަނީ ރައީސް މުއިއްޒު ވަކި ކުރައްވާފައެވެ.

ކުއްލި ގޮތަކަށް ފައިސަލް މަޤާމުން ދުރުކުރި ސަބަބު ސަރުކާރުން ސާފުކޮށްދީފައެއް ނުވެއެވެ.

އެކަމާ ގުޅިގެން މެލޭޝިޔާގައި ހުންނަވައި ފޯނުން 'ދައުރު' ނޫހަށް ދެއްވި އިންޓަވިއުގައި އަބްދުލްރަހީމް ވިދާޅުވީ ފައިސަލް ވަކިކުރަން ޖެހޭ އެއްވެސް ސަބަބެއް ނެތް ކަމަށާއި ރައީސް މުއިއްޒު އާ ގުޅުން ރަނގަޅު ނަމަ އެފަދަ ފިޔަވަޅެއް ރައީސް ނާޅުއްވާނޭ ކަމަށެވެ.

ފައިސަލް ވަކިކުރުމަކީ "ވަރަށް ދެރަވަރުކޮށް" ރައީސް ކުރެއްވި ކަމެއް ކަަމަށް ވެސް އަބްދުލްރަހީމް ވިދާޅުވިއެވެ.