އެމްޑީޕީގެ ޕާލިމެންޓަރީ ގްރޫޕުގެ ލީޑަރު މަޖިލިސް ރައީސް އަބްދުއްރަހީމް އާ ބައްދަލު ކުރައްވައިފި
ވަރަށް ގިނަ ކަންކަމާ މަޝްވަރާ ކުރެވުނު ކަމަށް ނާޒިލް ވިދާޅުވި
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ
މޯލްޑިވިއަން ޑިމޮކޮރަޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕް ގެ ލީޑަރު ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ އާ ބައްދަލު ކުރައްވައިފިއެވެ.
އަންގާރަ ދުވަހު މެންދުރު މި ބައްދަލުވުން ބޭއްވިކަން އެމްޑީޕީގެ ޕާލިމެންޓަރީ ގްރޫޕްގެ ލީޑަރ އިބްރާހިމް ނާޒިލް ވަނީ ކަށަވަރު ކޮށްދެއްވާފައެވެ.
ހިތަދޫ ދެކުނު ދާއިރާގެ މެމްބަރުކަންވެސް ކުރައްވާ، އިބްރާހިމް ނާޒިލް އަބްދުއްރަހީމް އާ ބައްދަލު ކުރެއްވި މި ދަނޑިވަޅަކީ ވެރިކަން ކުރާ ޕީއެންސީ ގެ ރައީސް އަދި ރައީސުލް ޖުމްހޫރިއްޔާ މުހައްމަދު މުއިއްޒު އާއި ޕާޓީގެ ސެކްރެޓަރީ ޖެނެރަލްގެ މަގާމު ވެސް އަދާކުރައްވަމުން ގެންދަވާ އަބްދުއްރަހީމް އާ ދެމެދު ގުޅުން ވަރަށް ގޯސްވެފައިވާ ދަނޑިވަޅެއްގައިކަން ފާހަގަ ކުރެވެއެވެ.
ބައްދަލު ކުރެއްވުމާ ބެހޭ ގޮތުން އެމްޑީޕިގެ ޕާލިމެންޓަރީ ގްރޫޕްގެ ލީޑަރު ނާޒިލް އާ ރާއްޖެޓީވީގެ ފަރާތުން ގުޅާލުމުން ބައްދަލު ކުރެއްވި ކަން ވަނީ ކަށަވަރު ކޮށްދެއްވާފައެވެ.
"ވަރަށް ގިނަ ކަންކަމާ ބެހޭ ގޮތުން މަޝްވަރާ ކުރެވުނު" ނާޒިލް ވިދާޅުވިއެވެ.
އެހެން ނަމަވެސް ދެކެވުނު ވާހަކަތަކާ ބެހޭ އިތުރު ތަފްސީލެއް ނާޒިލް ނުދެއްވައެވެ.
ރައްޔިތުންގެ މަޖިލިސް މި އަހަރަށް ހުޅުވުން އޮންނާނީ ފެބްރުއަރީ 6 ވާ ބުރާސްފަތި ދުވަހު ހެނދުނު 9:00 ގައި މަޖިލިސް ކުރާ ގޭގައެވެ.
މެމްބަރުންނަށް އެ ދުވަހުގެ އެޖެންޑާ މަޖިލިސް އިދާރާ އިން ފޮނުވާފައިވާއިރު އެ ދުވަހުގެ މަޖިލީހުގެ ރިޔާސަތު ބަލަހައްޓަވާ ގޮތައް އެޖެންޑާގައި ވަނީ މަޖިލިސް ރައީސް އަބްދުއްރަހީމެވެ.
ކޮންމެ އަރަހަރަކަށް މަޖިލިސް ހުޅުވާ ޖަލްސާގައި ކުރިއަށް އޮތް އަހަރަށް ސަރުކާރުން ކުރިއަށް ގެންދަން ރާވާފައިވާ ކަންކަމާއި ގައުމުގެ ހާލަތާ ބެހޭ ގޮތުން ރައީސުލްޖުމްހޫރިއްޔާ ރިޔާސީ ބަޔާން އިއްވެވުން އޮންނާނެއެވެ.
