1 މާރިޗު 2025 ވާ ހޮނިހިރު ދުވަހަކީ 1446 ވަނަ އަހަރުގެ ރަމަޟާން މަހުގެ ފުރަތަމަ ދުވަސް

1 މާރިޗު 2025 ވާ ހޮނިހިރު ދުވަހަކީ 1446 ވަނަ އަހަރުގެ ރަމަޟާން މަހުގެ ފުރަތަމަ ދުވަސްކަމަށް އިސްލާމީކަންތައްތަކާ ބެހޭ ވުޒާރާއިން ކަނޑައަޅައިފިއެވެ.

އިސްލާމީ ކަންތައްތަކާ ބެހޭ ވުޒާރާއިން މިކަން ކަނޑައަޅާފައިވަނީ 28 ފެބްރުއަރީ 2025 ވަނަ ދުވަހުގެ ރޭ ހަނދު ސާބިތުކުރުމަށްޓަކައި އިސްލާމީ މަރުކަޒުގައި ބޭއްވި ޖަލްސާގައެވެ.

މި ޖަލްސާގައި ހަނދު ސާބިތުވިކަން އިޢުލާންކުރައްވާ، އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ސޮއިކުރެއްވި ހަނދާބެހޭ ބަޔާން އިއްވަމުން ވިދާޅުވީ ޙިޖްރީ ސަނަތުން 1446 ވަނަ އަހަރުގެ ޝަޢުބާން މަހުގެ 29 ވީ ބުރާސްފަތި ދުވަހުގެ އިރު އޮއްސުމުގެ ފަހުން، ބައެއް އިސްލާމީ ޤައުމުތަކަށް 1446 ވަނަ އަހަރުގެ ރަމަޟާން މަހުގެ ހަނދު ފެނުނުކަން ޝަރްޢީ ހަމަތަކުން ސާބިތުވާތީ ރަމަޟާން މަހާއި ޝައްވާލް މަހުގެ ހަނދު ސާބިތު ކުރުމަށް ދިވެހިރާއްޖޭގައި ޢަމަލް ކުރުމަށް ހަމަޖެހިފައިވާ އުސޫލުގައި ވާ ގޮތުގެ މަތީން މާރިޗު މަހުގެ 1 ވާ ހޮނިހިރު ދުވަހަކީ 1446 ވަނަ އަހަރުގެ ރަމަޟާން މަހުގެ ފުރަތަމަ ދުވަސްކަމުގައި ކަނޑައަޅާފައިވާކަމަށެވެ.

ހަނދު ފެނުމާއެކު ސައުދީ އަރަބިއްޔާ އިން ވަނީ ހޮނިހިރު ދުވަހަކީ ރޯދަ މަހުގެ ފުރަތަމަ ދުވަސް ކަމަށް ކަނޑައަޅާފައެވެ.

ސައުދީ އަރަބިއްޔާ އިން ހަނދު ފެނުކަން ހުކުރު ދުވަހު އިއުލާނު ކުރީ، ތަމީރު އަދި ހުތާތު ސުދައިރު އޮބްޒަވޭޓަރީ ތަކަށް ހަނދު ފެނުމުން ކަމަށް ސައުދީ ރޯޔަލް ކޯޓުން ކުރި އިއުލާނުގައި ވެއެވެ.

ޔުނައިޓެޑް އެރަބް އެމިރޭޓްސް ގައި ހުންނަ އިންޓަރނޭޝަނަލް އެސްޓްރޮނޮމީ ސެންޓަރުން ބުނެފައިވަނީ ހުޅަނގު އޭޝިއާގެ ބައެއް ސަރަހައްދުތަކަށާއި، އެފްރިކާގެ ބޮޑު ބަޔަކަށާއި، ޔޫރަޕްގެ ދެކުނު ސަރަހައްދަށް ޓެލެސްކޯޕް މެދުވެރިކޮށް ހަނދު ފެންނަން ހުރި ކަމަށާއި، އެމެރިކާގެ ސަރަހައްދަށް ހުކުރު ދުވަހު ހަމަ ލޮލަށް ހަނދު ފެންނަން ހުރި ކަމަށެވެ.

އެ ސެންޓަރުން ބުނެފައިވާ ގޮތުގައި އިސްލާމީ ދުނިޔޭގެ ގިނަ ގައުމުތަކަށް ހުކުރު ދުވަހު ހަނދު ފެނުމުގެ ފުރުސަތު އޮތުމާއެކު މާޗް މަހުގެ 1 ވަނަ ދުވަހަކީ އިސްލާމީ ގިނަ ގައުމުތަކަށް މި އަހަރުގެ ރަމަޟާން މަހުގެ ފުރަތަމަ ދުވަހަށް ވުމުގެ ފުރުސަތު ބޮޑު ކަމުގައެވެ.