ސްލޮވަން ބްރަޓިސްލާވާ ބަލިކޮށް ސިޓީން އަށް ފުރަތަމަ މޮޅު

ޔުއެފާ ޗެމްޕިއަންސް ލީގުގައި ސްލޮވަން ބްރަޓިސްލާވާއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީން ފުރަތަމަ މޮޅު ހޯދައިފި އެވެ.

ސްލޮވަން ބްރަޓިސްލާވާގެ ދަނޑުގައި އަންގާރަ ދުވަހުގެ ރޭ ކުޅުނު މެޗު ސިޓީން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ސިޓީން ދެ ލަނޑު ޖެހިއިރު، ފަހު ހާފުގައި ވެސް ވަނީ ދެ ލަނޑު ޖަހައިފަ އެވެ.

މެޗު ފަށައިގެން އަށް ވަނަ މިނެޓުގައި ސިޓީ އަށް ލީޑު ނަގައިދިނީ ޖަރުމަނުގެ އިލްކާއީ ގުންޑޮގާން އެވެ. މިއީ ދެ ވަނަ ފަހަރަށް ސިޓީ އަށް ބަދަލުވީ ފަހުން އެ ޓީމަށް ގުންޑޮގާން ޖަހައިިދިން ފުރަތަމަ ލަނޑެވެ. އޭގެ ފަހުން މެޗުގެ 15 ވަނަ މިނެޓުގައި ސިޓީގެ ދެ ވަނަ ލަނޑު ޖެހީ ފިލް ފޮޑެން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޖެރެމީ ޑޮކޫ އެވެ.

ދެ ވަނަ ހާފު ފަށައިގެން މެޗުގެ 58 ވަނަ މިނެޓުގައި ސިޓީގެ ތިން ވަނަ ލަނޑު ޖެހީ ނޯވޭގެ އާލިން ހާލަންޑު އެވެ. އެ ލަނޑު އޭނާ ޖެހީ ރިކޯ ލެވިސް ތަނަވަސްކޮށްދިން ފުރުސަތެއްގަ އެވެ. މެޗުގައި ސިޓީގެ ހަތަރު ވަނަ ލަނޑު 74 ވަނަ މިނެޓުގައި ޖެހ ޖޭމްސް މެކްއަޓީ އެވެ. އެއީ ފޮޑެން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެވެ.

މޮޅާއެކު ސިޓީ ހަތަރު ވަނައިގައި އޮތީ ހަތަރު ޕޮއިންޓާއެކު އެވެ. އެ ޓީމު ކުޅުނު ފުރަތަމަ މެޗުގައި ވަނީ އިންޓަ މިލާންއާ އެއްވަރުވެފަ އެވެ.