"އދ އަށް ވަޑައިގެން ރައީސް ޑރ.މުއިއްޒު ޢަމަލުކުރެއްވީ ދިވެހިންގެ މޫނުމަތި އިސްލާމީ ދުނިޔޭގެ ކުރިމަތީގައި ހުތުރުވާ ގޮތަށް"
ފައިސަލް ވަނީ ރާއްޖެއިން ސެކިއުރިޓީ ކައުންސިލްގައި އަމަލުކުރީ ވަރަށް ބޭއަދަބީކޮށް ކަމަށާއި އެއީ ރާއްޖޭގެ ރީތި ނަން ކިލަނބުވާ ކަމެއް ކަމަށް ވިދާޅުވެފަ
ޔޫއޭއީގެ ކުރީގެ ޑެޕިއުޓީ އެމްބެސެޑަރ މުހައްމަދު ފައިސަލް
އދ އަށް ވަޑައިގެން ރައީސް ޑރ.މުހައްމަދު މުއިއްޒު ޢަމަލުކުރެއްވީ ދިވެހިންގެ މޫނުމަތި އިސްލާމީ ދުނިޔޭގެ ކުރިމަތީގައި ހުތުރުވާ ގޮތަށް ކަމަށް ޔޫއޭއީގެ ކުރީގެ ޑެޕިއުޓީ އެމްބެސެޑަރ މުހައްމަދު ފައިސަލް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ. އދގެ ސެކިއުރިޓީ ކައުންސިލްގައި ވެސް އަދި ހަވާސާގައި ބޭއްވި ބައްދަލުވުންތަކުގައި ވެސް މުސްލިމުންނާއި ދެކޮޅަށް ހިންގާ ނަފްރަތުގެ އަމަލުތަކާއި މެދު ރައީސް އެއްވެސް އެއްޗެއް ވިދާޅުވެފައި ނުވާތީ ފައިސަލް ކަންބޮޑުވުން ފާޅުކުރެއްވިއެވެ. އަދި ފަލަސްތީނުގެ މައްސަލަ އާއި ގުޅޭ ގޮތުން ތަފްސީލީ ގޮތެއްގައި ވާހަކަދައްކާ ފަލަސްތީނާއި އިސްރާއީލާއި ދެމެދު އުފެދިފައިވާ މައްސަލައިގެ ތާރީހާއި މެދު ވެސް އެ މަނިކުފާނު އެއްޗެއް ދަންނަވާފައި ނުވުމަކީ ވަރަށް ބޮޑު ކަންބޮޑުވުމެއް ކަމަށް ފައިސަލް ވިދާޅުވިއެވެ.
މީގެ އިތުރުން އދ އަށް ރައީސް ކުރެއްވި ދަތުރުފުޅުގެ ތެރެއިން އިސްރާއީލުގެ ޕްރޮޑަކްޓެއް ކަމަށްވާ ކޮސްޓާ ކޮފީ ހިތްޕަވާ ފޮޓޯ އާއި ވީޑިއޯ އާއްމު ވުމާއި އެކު އެކަމަށް ވަރަށް ބޮޑަށް އާއްމުންގެ ފާޑުކިޔުން ވަނީ އަމާޒުވެފައެވެ. އެއީ ފަލަސްތީނަށް ތާއީދުކުރުމުގެ ގޮތުން ބޮއިކޮޓްކޮށްފައިވާ ޕްރޮޑަކްޓްތަކުގެ ތެރޭގައި ހިމެނޭ ޕްރޮޑަކްޓަކަށް ވާތީ ރައީސްގެ އެ ޢަމަލުފުޅާއި މެދު އާއްމުން ވަނީ ކަންބޮޑުވުން ފާޅުކުރައްވާފައެވެ. އެކަމަށް އިޝާރާތްކުރައްވާ ފައިސަލް ވިދާޅުވީ އެފަދަ ވީޑިއޯ އާއި ފޮޓޯތަކެއް ރައީސް އޮފީހުގެ ޓްވިޓަރ އެކައުންޓުން އާއްމުކުރުމަކީ ކަންބޮޑުވެވަޑައިގަންނަވާ ކަމެއް ކަމަށެވެ. އެއިން އެނގެނީ ރާއްޖެއިން ފަލަސްތީނަށް ތާއީދު ނުކުރާ ކަން ކަމަށާއި، ސަރުކާރުން ފަލަސްތީނަށް ތާއީދު ނުކުރާކަން އަމަލުން ފެނިގެންދާ ކަމަށް ފައިސަލް ވިދާޅުވިއެވެ. އެހިސާބުން އެކަމުގައި މަތިއަޅާ ކަންކަން އޮމާންކުރުމަށް ރައީސާއި ސަރުކާރުން މަސައްކަތް ކުރެއްވި ކަމަށް ފައިސަލް ވަނީ ވިދާޅުވެފައެވެ.
ފައިސަލް ވަނީ ރާއްޖެއިން ސެކިއުރިޓީ ކައުންސިލްގައި އަމަލުކުރީ ވަރަށް ބޭއަދަބީކޮށް ކަމަށާއި އެއީ ރާއްޖޭގެ ރީތި ނަން ކިލަނބުވާ ކަމެއް ކަމަށް ވިދާޅުވެފައެވެ. އަދި ރައީސް މުއިއްޒު ދެއްކެވި ވާހަކަފުޅުތައް ދައްކަވާފައި ވަނީ ރަނގަޅަށް ދިރާސާ ނުކޮށް ކަމަށާއި އޭގެ ސަބަބުން ވެއްޓެނީ ރާއްޖޭގެ އަގު ކަމަށް އޭނާ ވިދާޅުވިއެވެ. މީގެ އިތުރުން ރައީސްގެ ވާހަކަފުޅުގައި ވަރަށް ބޮޑެތި އިތުރުފުޅުތައް ހައްދަވާފައިވާ ކަމަށާއި އެއީ ވަރަށް ހުތުުރުކަމެއް ކަމަށް އޭނާ ވިދާޅުވިއެވެ. އެ ވާހަކަތައް ދައްކަވަނީ ރައީސްގެ ހަރުދަނާކަމެއް ނެތުމުން ކަމަށް ވެސް ފައިސަލް ވަނީ ވިދާޅުވެފައެވެ. އެ ވާހަކަތައް ދައްކަވަނީ ރައްޔިތުންގެ ލޮލުގައި އަނދުން އަޅުވަން ކަމަށް އޭނާ ވަނީ ވިދާޅުވެފައެވެ.
