ކުރީގެ ނައިބު ރައީސް އަހްމަދު އަދީބުގެ މިނިސްޓަރު ކަމުގަ އާއި ނައިބު ރައީސްކަމުގައި ރައީސް އަބްދުﷲ ޔާމިން އެންގެވި ކަމެއް ނޫން ކަމެއް ކުރަން ފުރުސަތު ނުލިބޭ ކަމަށް މައްޗަށްގޮޅި އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި އިންތި ވަނީ އަދީބާ މެދު ރައީސް ޔާމިން ގެންގުޅުއްވި ގާތްކަމުގެ މައްޗަށް ވާހަކަ ދައްކަވާފަ އެވެ.
އެގޮތުން ޑރ. މުހައްމަދު ވަހީދުގެ ސަރުކާރުގައި ޓޫރިޒަމް މިނިސްޓަރަކަށް ޕީޕީއެމް އިން އައްޔަން ކުރުމަށް ފަހު އޭނާ މިނިސްޓަރު ކަމުން ވަކިކޮށްފި ނަމަ އެ ސަރުކާރުގެ ކޯލިޝަނުން ވަކިވާނެކަމުގެ އިންޒާރުދީފައިވާކަން ފާހަގަ ކުރެއްވި އެވެ. އަދި އޭގެ ފަހުން ރައީސް ޔާމިން ވެރިކަމަށް ވަޑައިގަތުމަށް ފަހު ޓޫރިޒަމް މިނިސްޓަރު ކަމާއި ނައިބު ރައީސްކަން ދެއްވީ ރައީސް ޔާމިން އަމިއްލަފުޅަށް ބޭނުންވެގެންކަން ވެސް އިންތި ފާހަގަ ކުރެއްވި އެވެ.
ވައްކަމުގެ މައްސަލައެއްގައި އަދީބު ހައްޔަރުކޮށްފައިނުވާ ކަމަށް ފާހަގަ ކުރައްވައި، އިންތި ވިދާޅުވީ އެއްވެސް އިރެއްގައި އަދީބު ކުރި ވައްކަމަކާ ގުޅިގެން ރައީސްޔާމިނާ ގުޅުން ކެނޑިފައިނުވާ ކަމަށެވެ.
ރައީސްގެ އިއުތިރާފުތަކާ އެކު ވެސް ފުލުހުންނާއި ކޯޓުތަކުން ބަލަން ތިބޭތީ ކަންބޮޑުވުން ފާޅުކުރައްވައި، އިންތި ވަނީ މިއީ ދައުލަތެއްތޯ ސުވާލު އުފައްދަވާފަ އެވެ. އަދި ވެރިމީހާގެ ގެއަށް ފައިސާގެ ދަބަސް ގެންދިއުމަކީ މާފިޔާތައް ހިންގާ ގުރޫޕެއްގެ ސިފަ ކަމަށާއި އެއީ ސަރުކާރު ސިފައެއް ނޫން ކަމަށް ވެސް އިންތި ވިދާޅުވި އެވެ.
"ސަރުކާރު ގެތަކަށް ފައިސާ ވަންނަ އޮންނާނެ އުސޫލެއް. އޮޑިޓް ކުރެވިގެން ސަރުކާރުގެ މުވައްސަސާތަކަށް. އަޅުގަނޑު ފިލްމްތަކުން ފެންނަނީ މާފިޔާ އޮޕަރޭޓްކުރާ އުސޫލުން ދަބަސް ދަބަހުގައި ޓާސްކް ނިމުމަށް ފަހު ބޮހަށް ފައިސާ ގެންދާތަން،" އިންތި ވިދާޅުވި އެވެ.
ދޫވެއްސަށް ފައިސާ ވެއްދި ކަމަށް އިއުތިރާފުވެވަޑައިގެން ރައީސް ޔާމިން ދެއްކެވި ވާކަތަކަކީ އަމިއްލައަށް ވެވޭނެ އެންމެ ބޮޑު އިއުތިރާފު ކަމަށް ވެސް އިންތި ވިދާޅުވި އެވެ.
"އަލްފާސިލް މި ފައިސާ ވާހަކަ ދައްކަވާއިރު މި ވިދާޅުވަނީ ތިމަންނަގެ މި ސަރުކާރަށޭ އެންމެ ބޮޑު ވައްކަމުގެ ތުހްމަތު އެޅުވިފައިވަނީ. އެންމެ ބޮޑު ހިޔާނާތް މި ރައްދުވަނީ ތިމަން މަނިކުފާނަށޭ. އެންމެ ބޮޑު ހިޔާނާތް އެންމެ ބޮޑު ވައްކަން ރައްދު މި ވަނީ ތިމަން މަނިކުފާނުގެ ސަރުކާރަށޭ،" އިންތި ވިދާޅުވި އެވެ.
ވައްކަމާއި ކޮރަޕްޝަނުގެ އަމަލުތަކަށް މަގު ފަހިވާނެ ގޮތައް ރޭވި އިންތިޒާމް ކުރެވި ގާނޫނުތައް ވެސް ވަނީ ބަދަލުކޮށްފައި ކަމަށް ވެސް އޭނާ ވިދާޅުވި އެވެ.
