މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފުލެޓު ދިނުމަށެވެ. ނަމަވެސް އެ ވެރިކަން ނިމުނުއިރު، ކޮންޓްރެކްޓު ކޮށް، މަސައްކަތް ފަށާފައި ވަނީ 4000 ފުލެއްޓެއްގެ އެވެ.

ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އިއުލާންކުރި ފްލެޓު ލިސްޓުގެ ބޮޑު ޕަސެންޓެއް ޝަރުތު ހަމަނުވާކަން އެންޓި ކޮރަޕްޝަން ކޮމިޝަން (އޭސީސީ)އިން އިއުލާން ކުރީ 5 ފެބްރުއަރީ 2024 ގައެވެ. މައްސަލައެއް ނެތް ފަރާތްތަކަށް ފްލެޓުތައް ދޫކުރުމުގެ މަސައްކަތްތައް ކުރިއަށް ގެންދިއުމަށް ހައުސިންގ މިނިސްޓްރީއަށް ހަވާލުކޮށްފައިވާއިރު، މިހާތަނަށް އެމަސައްކަތް ކޮށްފައިނުވެއެވެ. މިދިޔަ ދުވަސްތަކުގައި ފްލެޓުތައް ދޫކުރާނެ ދުވަހެއް ނޭނގޭތީ ގިނަ އަދަދެއްގެ އާއްމު ރައްޔިތުން ވަނީ މިނިސްޓަރު ހައިދަރުގެ އިސްތިއުފާއަށް ގޮވާލާ ލޮނުޒިޔާރަތްކޮޅުގައި މުޒާހަރާވެސް ކޮށްފައެވެ.

އެންމެ ފަހުން ސަރުކާރުން މުޒާހަރާތައް ފިނި ކުރުމަށް ހައުސިންގ ޔޫނިއަންތަކުގެ ބޭފުޅުންނާ ބައްދަލުކުރިއެވެ.

އަދި އެއަށްފަހު ގެދޮރުވެރިޔާ ސްކީމުގެ ދަށުން ފުލެޓު ލިބޭ މީހުންގެ ފައިނަލް ލިސްޓު މިއަންނަ އޮކްޓޯބަރު މަސްތެރޭގައި އާއްމުކުރާނެ ކަމަށް ހައުސިން މިނިސްޓަރު ޑރ. އަލީ ހައިދަރު ވަނީ ވިދާޅުވެފައެވެ. ހައުސިންގ ޔޫނިއަންތަކުގެ ބޭފުޅުންވެސް ވިދާޅުވަނީ ސަރުކާރުން އެ ނިންމުމާ އެއްގޮތަށް އަމަލު ކުރަންދެން ބަލަ ބަލާ ތިބި ކަމަށެވެ.

މިނިސްޓަރ ހައިދަރު ވިދާޅުވާ ގޮތުގައި ފްލެޓު ލިސްޓު އޮކްޓޯބަރު މަސްތެރޭގައި އާއްމުކުރާނެއެވެ. އެގޮތުން 32 ޓަވަރުގެ މަސައްކަތްތައް ކުރިއަށްދާއިރު، ފުރަތަމަ 6 ޓަވަރުގެ މަސައްކަތް ނިމޭނީ އޮކްޓޫބަރު މަސް ތެރޭގައި ކަމަށް މިނިސްޓަރ ވިދާޅުވެއެވެ.

އެހެންކަމުން އެ އެޓަވަރުތަކުގެ މަސައްކަތް ނިމުމާއެކު ލިސްޓު ވެސް އާއްމުކުރާނެ ކަމަށާއި، ފްލެޓުތައް ހުސްކޮށް ނުބަހައްޓާނެ ކަމަށް މިނިސްޓަރު ހައިދަރު ވަނީ ވިދާޅުވެފައެވެ.

އެހެންނަމަވެސް ފްލެޓު ލިބުނު އާންމު ރައްޔިތުންގެ ކަންބޮޑުވުންތަކާއި، ޝައްކުތަކަށް ކުޑަވެސް ލުޔެއް ނުލިބެއެވެ. އެހެން ނުވާންވީ ސަބަބެއްވެސް ނެތެވެ.

ބައެއް ބޭފުޅުން ވިދާޅުވާ ގޮތުގައި ސަރުކާރު ހިންގާ ޕާޓީ ޕީއެންސީގެ ދާއިރާތަކުގެ އިންތިޚާބެއް އޮކްޓޯބަރު މަހަށް ތާވަލު ކުރެވިފައި ވުމާއެކު، ފްލެޓު ލިސްޓު އާންމު ކުރުމުގެ މަސައްކަތް ހިނގިޔަސް ހިނގާނީ އެއަށްފަހުއެވެ. އެއީ ފްލެޓު ލިސްޓުގެ ވާހަކައަކީ ސަރުކާރުން ކޮންމެ އިންތިޚާބަކާ ދިމާކޮށް ދައްކަމުން އަންނަ ވާހަކައަކަށްވާތީވެސް މެއެވެ.

ގޯތި އަދި ފްލެޓު ލިބޭނެކަމަށް ފައިނަލް ލިސްޓުގައި ހިމެނި، ގެޒެޓު ކޮށްފައިވާ ފަރާތްތަކަށް ދެ ހަފްތާ ތެރޭގައި ރަޖިސްޓްރީ ޙަވާލުކުރުމަށް މަސައްކަތް ކުރަމުންދާކަމަށް ރައީސުލްޖުމްހޫރިއްޔާވެސް ވިދާޅުވެފައިވެއެވެ. އެއީ މިއަހަރުގެ ޖެނުއަރީ މަހުގައެވެ.

އެހެންކަމުން އެ ދެ ހަފްތާ 10 މަހަށް ވެގެންދާއިރު، އޮކްޓޯބަރު މަހު ވަކި ލިސްޓު އާންމު ކުރާނެ ކަމާމެދު ރައްޔިތުންގެ އުއްމީދު ކުޑައެވެ.