ގެދޮރުވެރިކަމުގެ ބިނާރުތައްވެސް އަތުލުން ނޫން ކަމެއް މިއަދުގެ ސަރުކާރުން ނުކުރޭ: ވައްޑެ
މި ސަރުކާރުން ވެރިކަމަށް އައީ އެމްޑީޕީގެ ސަރުކާރުން ސިޔާސީ މުވައްޒަފުން ގިނަކަމަށް ބުނެ ފާޑުކިޔުމަށްފަހު
އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑެ)
ގެދޮރުވެރިކަމުގެ ބިނާރުތައްވެސް އަތުލުން ނޫން ކަމެއް މިއަދުގެ ސަރުކާރުން ނުކުރާކަމަށް އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި ވާހަކަ ދައްކަވަމުން ވަހީދު ވިދާޅުވީ، ގެދޮރުވެރިކަމާއި ބިނާރާ އުމްރާނީ ތަރައްޤީއާ ބެވޭ ވުޒާރާއެއްވެސް އޮންނަ ކަމަށާއި، ނަމަވެސް ގެދޮރުވެރިކަމުގެ "ބިނާރުތައްވެސް" އަތުލުން ނޫން ކަމެއް މިއަދުގެ ސަރުކާރުން ނުކުރާ ކަމަށެވެ.
ނުވިތާކަށް، ކެބިނެޓާއި ވުޒާރާތަކުގައި އެތައް މަޤާމުތަކެއް އަލަށް އުފައްދާފައިވާކަމަށްވެސް ވަހީދު ވިދާޅުވިއެވެ.
އޭގެ އިތުރުން، ސިޔާސީ މުވައްޒަފުންގެ އަދަދުވެސް އެތައް ގުނައެއް އިތުރުކަން ފާހަގަ ކުރައްވައި ވަހީދު ވިދާޅުވީ، ކިތަންމެ މުވައްޒަފުން ގިނަ ނަމަވެސް ޚިދުމަތްތަކަށް ކުރިއެރުމެއް ނާންނަ ކަމަށެވެ.
ވަހީދު ވިދާޅުވީ، އެގޮތަށް ޚިދުމަތް ނުކުރެއްވުންވެސް މާ ރަނގަޅުވާނެ ކަމަށެވެ.
މި ސަރުކާރުން ވެރިކަމަށް އައީ އެމްޑީޕީގެ ސަރުކާރުން ސިޔާސީ މުވައްޒަފުން ގިނަކަމަށް ބުނެ ފާޑުކިޔުމަށްފަހުގައި 700ށް ވުރެ ސިޔާސީ މުވައްޒަފުންގެ އަދަދު އިތުރުނުކުރާނެކަމުގެ ވައުދާއެކުއެވެ. ނަމަވެސް ސިޔާސީ މުވައްޒަފުންގެ އަދަދު ހާހަކަށްވުރެ އިތުރުވެފައިވާއިރު، އެ އަދަދު ހާމަކުރަން ސަރުކާރުން ދަނީ ދެކޮޅު ހަދަމުންނެވެ.
ގިނަ މިނިސްޓްރީ ތަކުގައި 40ށް ވުރެ ގިނައިން ސިޔާސީ މަގާމުތަކުގައި މީހުން އެބަތިއްބެވެ. އެމީހުންގެ މަހު މުސާރައަށް އެކަނިވެސް މިނިސްޓްރީ އަކުން މިލިއަނަކަށް ވުރެ ގިނަ ފައިސާ ކޮންމެ މަހަކު ޚަރަދުކުރާ ކަމަށް ވެއެވެ.
