ޝެޒްނީ ބާސެލޯނާ އަށް
28 ސެޕްޓެމްބަރު 2024 | ހޮނިހިރު 06:17ބާސެލޯނާ އިން ޝެޒްނީ ހޯދަނީ އެއް އަހަރު ދުވަހުގެ މުއްދަތަކަށެވެ.
ވޮޒްޝިއޭ ޝެޒްނީ
ބާސެލޯނާގެ އެއް ނަންބަރު ގޯލު ކީޕަރު މާކް އަންދްރޭ ޓާ ސްޓެގެން އަށް އަނިޔާވެ ކުޅުމާ ދުރަށް ދާން ޖެހުމުގެ ސަބަބުން، އޭނާގެ ބަދަލު ކީޕަރެއްގެ ގޮތުގައި ޕޮޮލެންޑުގެ ވޮޒްޝިއޭ ޝެޒްނީ ގެންނަން ބާސެލޯނާ އިން ކުރި މަސައްކަތް ކާމިޔާބު ކޮށްފި އެވެ.
ލީގުގައި ބާސެލޯނާ އިން ވިޔަރެއާލާ ދެކޮޅަށް ކުޅުނު މެޗުގައި ލިބުނު އަނިޔާގެ ސަބަބުން، އެ ޓީމުގެ އެއް ނަންބަރު ގޯލު ކީޕަރު މާކް އަންދްރޭ ޓާ ސްޓެގެން ވަނީ ކުޅުމާ ދުރަށް ދާން ޖެހިފަ އެވެ. އެ އަނިޔާގެ ސަބަބުން ގާތް ގަނޑަކަށް އަށް މަސް ދުވަހުގެ މުއްދަތަކަށް ސްޓެގެން ކުޅުމާ ދުރުގައި ހުންނަން ޖެހޭނެ އެވެ. އޭގެ ފަހުން ލީގުގައި ބާސެލޯނާ އިން ގެޓާފޭއާ ދެކޮޅަށް ކުޅުނު މެޗުގައި އެ ޓީމުގެ ގޯލު ބެލެހެއްޓީ އިނާކީ ޕެނާ އެވެ.
އުމުރުން 34 އަހަރުގެ ޝެޒްނީ މިއަހަރުގެ އޯގަސްޓު މަހުގެ ތެރޭގައި ފުޓުބޯޅަ އިން ރިޓަޔާވާން ނިންމައިފަ އެވެ. އޭރު އޭނާ ކުޅެމުން އައީ އިޓަލީގެ ޔުވެންޓަސް އަށެވެ. ނަމަވެސް، ބާސެލޯނާ އިން ޝެޒްނީ ހޯދުމަށް ކުރި މަޝްވަރާގައި އޭނާ ވަނީ އެ ކުލަބަށް ބަދަލުވާން އެއްބަސްވެފަ އެވެ. ބާސެލޯނާ އިން ޝެޒްނީ ހޯދަނީ އެއް އަހަރު ދުވަހުގެ މުއްދަތަކަށެވެ. ދެ ފަރާތް މިހާރު އެއްބަސްވުމަކަށް އައިސްފައިވާއިރު، މިހަފުތާގެ ތެރޭގައި އޭނާ ބާސެލޯނާ އަށް ސޮއި ކުރާނެ ކަމަށް ރިޕޯޓުތައް ބުނެ އެވެ.
ޕޮލެންޑުގެ ޤައުމީ ޓީމުގެ ގޯލު ވެސް ގިނަ ދުވަސްތަކެއް ވަންދެން ބަލަހައްޓާފައިވާ ޝެޒްނީ އަކީ ތަޖުރިބާކާރު ގޯލު ކީޕަރެކެވެ. އޭނާ ވަނީ އާސެނަލްގެ އިތުރުން ބްރެންޓްފޯޑް، ރޯމާ އަދި ޔުވެންޓަސް އަށް ވެސް ކުޅެފަ އެވެ. މީޑިއާ ތަކުގައި ބުނެފައިވާ ގޮތުން، ޝެޒްނީ ބާސެލޯނާ އަށް ގެނައުމަށް ޕޮލެންޑުގެ ފޯވާޑް ރޮބާޓް ލެވަންޑޯސްކީ ވެސް ވަނީ އޭނާއާ މަޝްވަރާކޮށް، ވާހަކަ ދައްކައިފަ އެވެ.
