އާސެނަލް ދޫކޮށްލުމަށްފަހު ޝެޒްނީ ޔުވަންޓަސް އަށް ސޮއިކޮށްފި

ކްލަބް އާސެނަލް ދޫކޮށްލުމަށްފަހު ޕޮލެންޑުގެ ކީޕަރު ޝެޒްނީ ޔުވަންޓަސް އަށް ސޮއިކޮށްފި އެވެ.

ހަތަރު އަހަރު ދުވަހުގެ އެއްބަސްވުމެއްގެ ދަށުން ޝެޒްނީ ޔުވަންޓަސް އަށް ސޮއިކޮށްފައިވާއިރު، އޭނާ އެ ކްލަބަށް ބަދަލުވީ 12.2 މިލިއަން ޔޫރޯގެ އަގަކަށެވެ.

ޔުވަންޓަސްއާ އެކު އަންގާރަ ދުވަހު މެޑިކަލް ހެދުމަށްފަހު އޭނާ އެ ކްލަބަށް ބަދަލުވާން އެއްބަސްވުމުގައި ސޮއިކުރީ ބުދަ ދުވަހު އެވެ.

މިދިޔަ ދެ ސީޒަނުގައި ލޯން އެއްބަސްވުމެއްގެ ދަށުން އިޓަލީގެ ރޯމާ އަށް ކުޅުނު ޝެޒްނީ އެ ކްލަބަށް 80 އަށްވުރެ ގިނަ މެޗު ކުޅެދީފައެވެ. އޭނާ ވަނީ އެ ކްލަބުގައި މޮޅު ކުޅުމެއް ފާއިތުވެދިޔަ ދެ ސީޒަނުގައި ދައްކާފައެވެ.

ޔުވަންޓަސްއަށް ބަދަލުވުމަށްފަހު ނޫސްވެރިންނަށް މައުލޫމާތު ދެމުން ޝެޒްނީ ބުނީ ޔުވަންޓަސް އަށް ބަދަލުވުމުން ވަރަށް އުފާވެފައިހުރި ކަމަށާއި، ކްލަބަށް ބަދަލުވުމުގެ ކުރިން އެއްވެސް ކަމަކާ ވިސްނަން އޭނާ ނުޖެހުނު ކަމަށެވެ.

ޝެޒްނީ ބުނީ ޔުވަންޓަސް އަކީ އޭނާގެ ކެރިޔަރަށް އެންމެ ރަނގަޅު ޗޮއިސް ކަމަށާއި، އުމުރުން 27 އަހަރުގައި މިފަދަ ކްލަބަކަށް ބަދަލުވެވުމުން ގިނަ ކާމިޔާބީތައް ހޯދަން މިހާރުވެސް ކެތްމަދުވެފައި ހުރި ކަމަށެވެ.

އާސެނަލް އިން 2009 ވަނަ އަހަރު ކެރިޔަރު ފެށި ޝެޒްނީ ވަނީ އެ ކްލަބަށް 180 އަށްވުރެ ގިނަ މެޗު ކުޅެފައެވެ. އޭނާ ވަނީ އެ ކްލަބާއެކު އެފްއޭކަޕް ދެފަހަރު އަދި އެފްއޭ ކޮމިއުނިޓީ ޝިލްޑް ކާމިޔާބުކޮށްފައެވެ.

މީގެއިތުރުން ޕޮލެންޑް ގައުމީ ޓީމަށް 28 މެޗު ކުޅެ 14 ކްލީން ޝީޓެއް ހޯދާފައިވާ ޝެޒްނީ ވަނީ 2013 ވަނަ އަހަރުގެ ސީޒަނުގައި ޕްރިމިއާ ލީގުގެ ގޯލްޑެން ގްލޯވް ހޯދާފައެވެ.