އދ. ގެ ސަލާމަތީ މަޖިލީހަކީ ނާގާބިލް މަޖިލިހެއް ކަމަށާއި އެ މަޖިލީހުގެ ނާގާބިލުކަމުގެ ސަބަބުން، އދ.ގެ ނިޒާމަށް ދުނިޔެއިންކުރާ އިތުބާރު ގެއްލެމުންދާކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ އދ.ގެ ސަލާމަތީ މަޖިލީހުގައި ބުދަ ދުވަހު ދެއްވި ބަޔާނެއްގައެވެ.
ރައީސް މުއިއްޒުގެ ވާހަކަފުޅުގައި ސަލާމަތީ މަޖިލީހުގެ ދާއިމީ މެންބަރުންނަށް ލިބިފައިވާ ވީޓޯކުރުމުގެ ބާރު އުވާލައި، އދ.ގެ ސަލާމަތީ މަޖިލީހުގެ އޮނިގަނޑަށް މުހިއްމު އިސްލާޙުތަކެއް ގެނައުމަށް ވެސް ވަނީ ގޮވާލައްވާފައެވެ.
ޣައްޒާގައި ހިންގަމުންދާ ހަމަނުޖެހުންތަކަށް އިޝާރާތްކުރައްވާ ރައީސުލްޖުމްހޫރިއްޔާ ވިދާޅުވީ، ސަލާމަތީ މަޖިލީހަށް ފެންނަ ފަށުގައި ނަސްލުނައްތާލުމުގެ ޢަމަލުތައް ނިއުޅެމުން ދާއިރުވެސް، ބައިނަލްއަޤުވާމީ ޤާނޫނު ނެގެހެއްޓުމުގައި އެ މަޖިލިސް ނުކުޅެދިފައިވާކަމަށެވެ.
ފަލަސްޠީނުގެ ނަސްލު ނައްތާލުމަށް އިސްރާއީލުން ހިންގާ ޤަތުލުއާންމު ހުއްޓުވުމަށް ސަލާމަތީ މަޖިލީހަށް ލިބިފައިވާ ބާރު ކަނޑުވާލަނީ ވީޓޯގެ ބާރުންކަމަށާއި، އަދަބެއް ނުދެވި، އަނިޔާވެރި އިސްތިޢުމާރު ދެމެހެއްޓުމަށް އިސްރާއީލަށް ފުރުޞަތު ފަހިކޮށްދެނީވެސް ވީޓޯގެ ބާރުންކަމަށް، ޑރ. މުއިއްޒު ވިދާޅުވިއެވެ.
ފަލަސްތީނުގައި ހިންގަމުންދާ ގަތުލުއާންމު އާ ގުޅޭގޮތުން އިޒްރޭލާ ދެކޮޅަށް އދ. ގެ ސަލާމަތީ މަޖިލީހަށް ހުށަހެޅޭ މައްސަލަތަކުގައި ވީޓޯގެ ބާރު ބޭނުން ކޮށްގެން މައްސަލަތައް މުޅިންހެން ފެއިލް ކޮށްލާފައިވަނީ އެމެރިކާ އިން ކަމުގައި ވިޔަސް ރައީސް މުއިއްޒުގެ ވާހަަކަފުޅުގައި އެމެރިކާގެ ނަން ގެންނަވާފައެއް ނުވެއެވެ.
ސަލާމަތީ މަޖިލީހަށް އޮތް އިތުބާރު ގެއްލެމުންދަނީ، ހަމަހަމަކަމާއެކު ތަމްސީލުކުރުމާއި، ޖަވާބުދާރީވުމާއި، ދެފުށްފެންނަ ގޮތަށް މަސައްކަތްކުރަން ނުކުޅެދިފައިވާތީކަން ފާހަގަ ކުރައްވާ ޑރ. މުއިއްޒު ވިދާޅުވީ، ސަލާމަތީ މަޖިލީހަށް އިސްލާޙު ގެނައުމަށް ހުށަހަޅާފައިވާ އިންޓަރގަވަމެންޓަލް ޕްރޮސެސް އެއް އެބައޮތް ކަމަށާއި، ތަރައްޤީވަމުން އަންނަ ކުދި ޖަޒީރާ ޤައުމުތަކަށް ސަލާމަތީ މަޖިލީހުގައި ޚާއްސަ ޖާގައެއް ދިނުމަށް ދިވެހިރާއްޖެއިން ކުރާ އިލްތިމާސް ތަކުރާރު ކުރައްވާ ކަމުގައެވެ.
"އެ ބަޔަކަށް ޚިދުމަތް ކުރުމަށް އަޅުގަނޑުމެން އިންތިޚާބުކުރި ރައްޔިތުންގެ އިތުބާރު އަނބުރާ ހޯދުމަށްޓަކައި، އެ ރައްޔިތުންނަށް އަޅުގަނޑުމެން އިތުބާރުކުރަމާ ހިންގަވާ،" ސަލާމަތީ މަޖިލީހުގައި ރައީސް މުއިއްޒު ދެއްވި ބަޔާނުގައި ވިދާޅުވިއެވެ.
