މި ސަރުކާރުން ހެޔޮ ނިޔަތެއް އޮވެގެން އިންޑިޔާއެކު މަސައްކަތެއް ނުކުރާނެ: ޑރ.ޑީޑީ
ރައްޔިތުންނަށް އިންޑިޔާއާ ގުޅޭގޮތުން ނުރަނގަޅު މައުލޫމާތުދީފައިވޭ
ފަލަސުރުހީ ޕްރޮގްރާމްގައި އެމްޑީޕީގެ ކުރީގެ ރައީސް ޑރ.އިބްރާހިމް ދީދީ ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން އިންޑިޔާ ސަރުކާރުގެ އެހީތެރިކަން ހޯދަމުންދަނީ އިންޑިޔާއާއެކު ގާތްގުޅުމެއް ބޭއްވުމުގެ ހެޔޮ ނިޔަތުގައި ނޫން ކަމަށް އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޑރ.ޑީޑީ ވިދާޅުވީ މިއަދުގެ ރައީސް މުއިއްޒަކީ އިންޑިޔާ އައުޓް ކެންޕޭންގައި ވަރަށް ބުރަކޮށް މަސައްކަތް ކުރެއްވި ބޭފުޅެއް ކަމަށާއި، މިސަރުކާރުގެ ބޭފުޅުންނަކީ އިންޑިޔާއާ ގުޅޭގޮތުން ހަގީގަތާ ހިލާފު ގިނަ ވާހަކަތައް ދައްކައި ރައްޔިތުންނަށް އިންޑިޔާއާ ގުޅޭގޮތުން ނުރަނގަޅު މައުލޫމާތުދީފައިވާ ކަމަށެވެ. އަދި ރައީސް މުއިއްޒު އިންޑިޔާއާ ގުޅޭގޮތުން ދެއްކެވި ވާހަކަފުޅުތަކަކީ ދޮގުކަން މިއަދު ހާމަވަމުންދާ ކަމަށް ޑރ.ޑީޑީ ވިދާޅުވިއެވެ.
ޑރ.ޑީޑީ ވިދާޅުވީ ރައީސް މުއިއްޒު ހުވައި ކުރައްވައި ގައުމާ މުޚާތަބު ކުރެއްވިއިރު ވެސް އިންޑިޔާއަށް ބަހުގެ ހަމަލާތައް އަމާޒު ކުރެއްވި ކަމަށެވެ. މިއަދު މިސަރުކާރަށް ގޮތް ހުސްވުމުން ވެލްކަމް އިންޑިޔާ ކެންޕޭން ކުރިއަށް ގެންދިޔަ ނަމަވެސް އެކަމާ ސުވާލު އުފެދޭ ކަމަށް ޑރ.ޑީޑީ ވިދާޅުވިއެވެ.
ރާއްޖެއާއި އިންޑިޔާއަކީ ޒަމާނުއްސުރެ ގާތްގުޅުމެއް އޮތް ދެގައުމުކަން ފާހަގަކުރައްވައި ޑރ.ޑީޑީ ވިދާޅުވީ އިންޑިޔާއާ އޮތް ގުޅުން ހީނަރުކޮށްލީ މިސަރުކާރުން ކަމަށާއި، އެކަމުގެ ގެއްލުން ރާއްޖޭގެ ރައްޔިތުންނަށް ލިބުނު ކަމަށެވެ. މިސަރުކާރުން އިންޑިޔާއާ މިހާރު ގާތް ގުޅުމެއް އުފެއްދުމަށް މަސައްކަތް ކުރަނީ ގޮތް ހުސްވެ، ބޭރުގެ އެއްވެސް ގައުމަކުން އެހީތެރިކަން ނުލިބި ރާއްޖެ ބަގުރޫޓްވާ ހިސާބަށް ދިއުމުން ކަމަށް ޑރ.ޑީޑީ ވިދާޅުވިއެވެ. އަދި ވިދާޅުވީ މިސަރުކާރުން އިންޑިޔާއެކު ގާތް ރަހުމަތްތެރިކަމުގެ ގުޅުމެއް އުފެއްދުމުގެ ހެޔޮ ނިޔަތުގައި މަސައްކަތް ނުކުރާނެ ކަަމަށެވެ.
ޑރ.ޑީޑީ ވިދާޅުވީ އިންޑިޔާގެ މައްސަލާގައި މި ސަރުކާރުގެ ބޭފުޅުންގެ މެދުގައި މިހާރު ވެސް ހިޔާލު ތަފާތުވުންތައް އުފެދިފައިވާ ކަމަށާއި، އިންޑިޔާއިން ކޮށްދޭ ކަންކަމުގައި ޝުކުރުގެ ބަހެއް އެބޭފުޅުން ނުބުނާ ކަމަށެވެ. އެއީ އެންމެ ގަދައަށް އިންޑިޔާ އައުޓް ކެންޕޭންގެ ހަރަކާތްތަކުގައި އުޅުނު ބޭފުޅުން ކަަމަށް އޭނާ ވިދާޅުވިއެވެ.
ޑރ.ޑީޑީ ވިދާޅުވީ ރާއްޖެއަށް މާލީ ގޮތުން އެންމެ ދަތިވެ އުދަނގޫވި ދުވަސްވަރު ވެސް އެންމެ ބޮޑު އެހީތެރިކަމެއް ފޯރުކޮށްދެނީ އިންޑިޔާއިން ކަމަށާއި، އެކަން މިއަދު ސާބިތުވަމުންދާ ކަމަށެވެ.
