ރައީސް ޑރ. މުހައްމަދު މުއިއްޒުގެ މި ސަރުކާރުން ގައުމު ބިނާކުރުމުގެ އެއްވެސް މަސައްކަތެއް ކުރައްވާ ކަމަށް ގަބޫލު ނުކުރައްވާ ކަމަށާއި މި ސަރުކާރުން މިހާރު ކުރާ ހަމަ އެކަނި ކަމަކީ އިންތިޚާބުތައް ކާމިޔާބު ކުރުމަށް ފޯމިއުލާ އެއް ހޯދުން ކަމަށް ހުޅުމާލޭ ދެކުނު ދާއިރާގެ މެންބަރު ޑރ.އަހްމަދު ޝަމްހީދު ވިދާޅުވެއްޖެއެވެ.

ޑރ. ޝަމްހީދު މިފަދައިން ވިދާޅުވެފައި ވަނީ ރާއްޖެ ޓީވީގެ ފަލަ ފަލަސުރުޚީ ޕްރޮގްރާމުގައި ވާހަކަދައްކަވަމުން ނެވެ.

ގައު އެޅުމާއި ކާސްޓިންގގެ މަސައްކަތްތަކާއި އެއާ ގުޅުންހުރި ކަންކަން ކުރުމަށް ހާއްސަ ކުންފުންޏެއް ރައީސް ޑރމުޢިއްޒު ވަނީ އުފައްދަވާފައެވެ.

ރައީސް މުއިއްޒު ނެރުއްވި ގަރާރަކުން އުފެއްދެވި "އިންފްރާސްޓްރަކްޗަރ ޑިވެލޮޕްމަންޓް ސޮލިއުޝަން ކޮމްޕެނީ ލިމިޓެޑް" ގެ ނަމުގައި ކުންފުންޏެއް އުފައްދަވާފައިވަނީ މިދިއަ މެއި މަހުގައެވެ.

ދިވެހި ސަރުކާރުގެ ސައްތައިންސައްތަ ހިއްސާ އެކުލެވިގެންވާ، މި ކުންފުނި އުފެއްދެވުމުގެ މައިގަނޑު މަގުސަދަކީ، ދިވެހި ސަރުކާރުގެ އިޤްތިޞާދީ ސިޔާސަތުތަކާ އެއްގޮތްވާ ގޮތުގެ މަތީން، ދިވެހިރާއްޖޭގައި ބޮޑަށް އާބާދުވެފައިވާ އާރބަން ސަރަހައްދުތަކާއި، މަދުން އާބާދުވެފައިވާ ރޫރަލް ސަރަހައްދުތަކުގެ ޢުމްރާނީ ތަރައްޤީ ފުޅާކުރުމުގެ މަގުސަދު ހާސިލުކުރުމަށްޓަކައި، ދުނިޔެއަށް އަލަށް އީޖާދުވާ ޓެކްނޮލޮޖީ ބޭނުންކޮށްގެން، ގައު އެޅުމާއި ކާސްޓިންގގެ މަސައްކަތްތަކާއި އެއާ ގުޅުންހުރި ކަންކަން ކުރުމަށާއި، އެ މަސައްކަތްތަކާ ގުޅޭ އެންމެހައި ކަންކަން ތަންފީޒުކުރުމަށް ކަމަށް ރައީސް އޮފިހުން ވަނީ ބުނެފައެވެ.

އަދި އެ ކުންފުންޏަކީ އަމިއްލަ ނަމުގައި ދަޢުވާކުރުމާއި، ދަޢުވާ ލިބިގަތުމުގެ ޙައްޤު ލިބިގެންވާ، ވަކި ސިއްކައެއް އޮންނަ، ޤާނޫނީގޮތުން އަމިއްލަ ޝަޚްޞެެއް ކަމަށްވެސް ރައީސް އޮފީހުން ބުނެފައި ވެއެވެ.

މި ކަމަށް އޮތް ކަންބޮޑުވުމާއި ގުޅިގެން ޝަމްހީދު ވިދާޅުވީ މި ސަރުކާރުގެ ސިޔާސަތުތަކަކީ ކޮބައިކަން މިހާރު އެންމެންނަށް ވެސް އެނގޭ ކަމަށާއި މި ސަރުކާރުގެ ސިޔާސަތަކީ ގައުމު ބިނާކުރުން ނޫން ކަމަށެވެ. އަދި އޭގެ ބަދަލުގައި މި ސަރުކާރުން ގެންގުޅޭ ސިޔާސަތަކީ އިންތިޚާބުތައް ކާމިޔާބު ކުރުމުގެ ފޯމިއުލާއެއް ހޯދުންކަމަށް ޝަމްޙީދު ވިދާޅުވިއެވެ.

ޝަމްހީދު ވިދާޅުވީ ރައީސް މުއިއްޒުގެ މި ސަރުކާރަށް ދޮޅު އަހަރުވެގެން ދިއައިރުގައި ވެސް ގައުމަށް ހެޔޮ ބަދަލެއް ގެނެވިފައި ނުވާކަމަށާއި އޭގެ ބަދަލުގައި މަސައްކަތް ކުރައްވަނީ އަމިއްލަ މަންފާ ހޯއްދެވުމަށް ކަމަށެވެ.

ޝަމްހީދު ވިދާޅުވީ ދުނިޔޭގެ ގައުމުތަކުގައި އިންތިޚާބު ކާމިޔާބު ކުރުމަށް ވަރަށް ގިނަ ކަންކަން ކުރާ ކަމަށާއި އޭގެ ތެރެއިން ފުރަތަމަ ކަމަކީ ގައުމުގެ އެންމެހާ ރައްޔިތުން ފަގީރު ކުރުން ކަމަށެވެ. އެގޮތުން ގައުމުގެ ރައްޔިތުންގެ ދިރިއުޅުން ސަރުކާރަށް ބައްޓަން ކުރުވައި ސަރުކާރުން ދިނިއްޔާ ނޫނީ ރައްޔިތުންނަށް އެއްވެސް ކަމެއް ނުކުރެވޭ ގޮތް ހެދުމަކީ މި ސަރުކާރުން ކުރަމުން އަންނަ މަސައްކަތް ކަމުގައެވެ.

ޝަމްހީދު ވިދާޅުވީ މިއަދު ރާއްޖޭގެ ހާލަތަށް ބަލާއިރު، ފެންނަނީ ވެނެޒުއެލާ ފަދަ ގައުމުތަކުގެ އުސޫލުތަކަށް ރާއްޖެ ބަންޓަން ކުރުމަށް މި ސަރުކާރުން މަސައްކަތް ކުރަމުން ގެންދާތަން ކަމަށެވެ.

ޝަމްޙީދު ވިދާޅުވީ މިހާރު މިއޮތް ސަރުކާރުން މަސައްކަތް ކުރަމުން ގެންދަނީ 2008 ގައި ގެނައި ފެހި ގާނޫ އަސާސީގައި އޮންނަ ގޮތަށް ނޫން ކަމަށާއި ފެނިގެން މިދަނީ މައުމޫނުގެ 30 އަހަރުގެ ވެރިކަމަށް ވުރެވެސް ފަހަތަށް ދާ މޮޑެލްއަކަށް ގައުމު ހިންގަން މަސައްކަތް ކުރާ ތަންކަމަށެވެ.

އެގޮތަށް ކަންތައް ވުމުން ދެން ވެގެންދާނެ ގޮތަކީ ރައްޔިތުންނާއި ގައުމުގެ މުޅި ހުރިހާ ވިޔަފާރިތަކެއް ވެސް ސަރުކާރުގެ ބާރުގެ ދަށަށް އައުން ކަމަށް އޭނާ ވިދާޅުވިއެވެ.

އަދި މި ސަރުކާރުން މިގޮތަށް ކަންކޖުރަން މަސައްކަތް ކުރުމަކީ ވަރަށް ކަންބޮޑުވާން ޖެހޭ ކަމެއް ކަމަށް ޝަމްހީދު ވިދާޅުވިއެވެ.