މަޖިލީހުގެ ރައީސް އަބްދުއްރަހީމް އަބްދުﷲ އަކީ ''ދަތް ނެތް ސިންގާ'' އެއް: ތަޒްމީލް
ހުރިހާ ބާރެއް މުށުތެރެއަށް ލެއްވުމުގެ ސިޔާސަތުގެ ދަށުން މަޖިލިސް ކާމިޔާބުކަމާއެކު ވަނީ ހިސޯރުކޮށްފައި
މަޖްލިސް އަބްދުލްރަހީމް އަބްދުالله (ކ) ރައީސް ޑރ. މުހައްމަދު މުއިއްޒު (ވ) އާއެކު
ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ އަކީ ''ދަތް ނެތް ސިންގާ'' އެއް ކަމަށް އެމްޓީޑީސީގެ ކުރީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ތަޒްމީލް ވަނީ ރާއްޖެ މިހާރު ދާ މިސްރާބާ ގުޅޭގޮތުން ކަންބޮޑުވުންފާޅުކޮށް ވާހަކަދައްކަވާފައެވެ. އަދި ރައްޔިތުން ވަރަށް ބޮޑަށް ނިކަމެތިކުރަމުންދާ ކަމަށާއި، ރައްޔިތުންގެ ހައްގުގައި ވަކާލާތު ކުރާނެ ރައްޔިތުންގެ މަޖިލީހެއް ނެތްކަން ފާހަގަކުރައްވާފައެވެ.
މަޖިލީހުގެ ރައީސްއަށް އިޝާރާތް ކުރައްވައި ތަޒްމީލް ވިދާޅުވީ މިދާކަށް ދުވަހު އެބޭފުޅާ ފެނިގެންދިޔައީ ވަރަށް ބާރުގަދަ މަޖިލީހުގެ ރައީސްއެއްގެ ގޮތުގައި ކަމަށާއި، ނަމަވެސް ރައީސް ޑރ.މުހައްމަދު މުއިއްޒު ގެންގުޅުއްވާ ސިއްރު ވިސްނުންފުޅުގެ ތެރެއިން މަޖިލީހުގެ ރައީސް ހިމެނޭ ގޮތަށް ސަރުކާރުގެ ހުރިހާ މެންބަރުންގެ ބާރުތައް ނަގައި، ކުދިކުދި ކޮށްފައިވާ ކަމަށެވެ.
ހުރިހާ ބާރެއް މުށުތެރެއަށް ލެއްވުމުގެ ސިޔާސަތުގެ ދަށުން މަޖިލިސް ކާމިޔާބުކަމާއެކު ހިސޯރުކޮށްފައިވާ ކަމަށާއި، މިއަދުގެ މަޖިލީހުގެ ރައީސްއަކީ ދަތް ނެތް ސިންގާއެއް ކަމަށް އޭނާ ވިދާޅުވިއެވެ. އަދި މަޖިލީހުގެ ރައީސްކަމުގެ ގޮނޑީގައި އިންނެވުމުގެ ޝަރަފަށްޓަކައި ބަހެއް ބުނުއްވަން ކެރިވަޑައިނުގަންނަވާ ކަމަށް ތަޒްމީލް ވިދާޅުވިއެވެ.
އެންމެ ރީތި މިސާލަކީ ދަތް ނެތް ސިންގާއެއް. އޭގެ އެންމެ ރީތި މިސާލެއް ފެނުނީ އިއްޔެ އެންމެފަހުން ރާއްޖެއިން ބޭރަށް ވަޑައިގެން ކޮންފަރެންސް ނިންމަވާފައި ވަޑައިގަތީމަ އެތާގައި ހުންނެވީ ރައްޔިތުން މަޖިލީހުގެ އިދާރީ އިސް މުވައްޒަފަކާއި، އިދާރީ އިތުރު ތިން މުވައްޒަފުން. އެހެންނަމަވެސް އޭގެ ކުރިން ވަޑައިގެންނެވި ޖަލްސާތަކަށް ރާއްޖެއިން ބޭރަށް ވަޑައިގެން ރައްޔިތުން މަޖިލީހުގެ ބޮޑެތި ދާއިރާތަކުގެ މެންބަރުން ސަފު ހަދާފައި ރައްޔިތުން މަޖިލީހުގެ ރައީސް ސަލާން ކޮށް ނިމެން ގަޑިއިރެއްހާއިރު ނަގާ. މިހުރިހާ ބޭފުޅުން ވަޑައިގެން. އެދުވަހު ވަރަށް ބާރުގަދަ ބޭފުޅެއް. އެކަމަކު މިއަދުގެ ހާލަތަކީ ރައްޔިތުން މަޖިލީހުގެ ރައީސް އެބޭފުޅުންގެ އެބޭފުޅުންގެ ވެރިމީހާ. އެ ބޭފުޅުންގެ މުއައްސަސާގެ އެންމެ އިސް ފަރާތް. އެހެންނަމަވެސް ރާއްޖެއިން ބޭރުގެ އެވަރުގެ ކޮންފަރެންސްއެއް ނިންމާފައި ވަޑައިގެންނެވީމަ ސަލާން ކޮށްލަން އިހުތިރާމް އަދާކުރުމުގެ ގޮތުން ސަލާންކޮށްލަން ދިއުމުގެ ބާރު އަމިއްލަ ނަފްސުގެ ނެތް މެންބަރުން އަދި ރައްޔިތުން މަޖިލީހުގެ ސްޕްކާރގެ ހާލަތަކީ އަމިއްލަ ދަރިފުޅު ޓޫރިޒަމް މިނިސްޓަރުކަމުން ނަގާ އެއްލާލިއިރު އެކަމާ ދެކޮޅަށް އެއްޗެއް ބުނަން ބަހެއް ބުނެލަން ކެރިވަޑައިގެން ނުގެން މިއަދު އެއިންނެވީ ހަމައެކަނި މިއަދު ތި ވިދާޅުވި ފަދައިން އޮގޮޑީގައި އިދެލުމުގެ ޝަރަފަށްޓަކައި.އެމްޓީޑީސީގެ ކުރީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު
ތަޒްމީލް ވިދާޅުވީ މިއަދު ރައްޔިތުންގެ މަޖިލީހުގައި ތިއްބެވި ސަރުކާރުގެ މެންބަރުންނަކީ ރައްޔިތުންގެ ހައްގުގައި ވަކާލާތު ކުރާ ބައެއްނޫން ކަމަށާއި، އެ މަންޒަރު މަޖިލީހުގެ ޖަލްސާތަކުން ފެންނަމުންދާ ކަމަށެވެ.
އެގޮތުން ޚާއްސަ އެހީއަށް ބޭނުންވާ ފަރާތްތަކަށް އިނާއަތް ނުލިބޭ މައްސަލައާ ގުޅިގެން މަޖިލީހަށް ހުށަހެޅި ކުއްލި މައްސަލަ ބޭރުކޮށްލިކަން ތަޒްމީލް ފާހަގަކުރެއްވިއެވެ. އަދި މިއީ ދިމްޔާތު ނުވަތަ ރައީސް އޮފީހުން އަންނަ ފޯނު ކޯލަށް މެންބަރުން ބޯލާބައި މަސައްކަތް ކުރުމުގެ ނަތީޖާ ކަމަށް އޭނާ ވިދާޅުވިއެވެ.
