ހޮނިހިރު ދުވަހު ހިޒްބުﷲ އިން އިޒްރޭލުގެ އުތުރުގައިވާ އަސްކަރީ މަރުކަޒަކަށް ރޮކެޓް ހަމަލާދީފި ކަމަށް އެ ޖަމާއަތުން ބުނެފިއެވެ. އެއާއެކު އިޒްރޭލުން ބުނެފައިވަނީ ހިޒްބުﷲ ގެ ޓާގެޓްތަކަށް އިތުރު ހަމަލާތައް އިޒްރޭލުން ދެމުންދާ ކަމަށެވެ.
ހިޒްބުﷲ ގެ ރޮކެޓް ހަމަލާތަކެއް އިޒްރޭލުގެ އުތުރަށް އަމާޒުވި ކަމަށް އިޒްރޭލުންވެސް ބުނެފައިވެއެވެ. އިޒްރޭލުގެ އަސްކަރިއްޔާ އިން އޭއެފްޕީ އަށް މައުލޫމާތުގައި ބުނެފައިވަނީ ހިޒްބުﷲ އިން އިޒްރޭލަށް 90 ވަރަކަށް ރޮކެޓް ހަމަލާ ފޮނުވި ކަމަށެވެ.
ހިޒްބުﷲ އާއި އިޒްރޭލާ ދެމެދު ބަދަލު ކުރެވޭ ހަމަލާތައް އިތުރުވެ މަސްރަހް ހޫނުވަމުންދާއިރު ފުރިހަމަ ހަނގުރާމައަކަށް މި ހަމަނުޖެހުންތައް ބަދަލުވުމުގެ ބިރު ހީވެފައިވާ ކަމަށް ރިޕޯޓްތައް ބުނެއެވެ.
ހިޒްބުﷲ ގެ އެހެން ބަޔާނެއްގައި އިޒްރޭލްގެ ދެ ބެރަކްސް އަށް ކަޓްޔޫޝާ ރޮކެޓް ހަމަލާތަކެއް ދިން ކަމަށްވެސް ބުނެފައިވެއެވެ. މިއީ ލުބުނާންގެ ދެކުނުގެ ސަރަހައްދުތަކަށާއި، އާންމުން ދިރިއުޅޭ އިމާރާތްތަކަށް އިޒްރޭލުން ދިން ހަމަލާގެ ބަދަލު ހިފުމުގެ ގޮތުން ދިން ހަމަލާއެއް ކަމަށްވެސް ހިޒްބުﷲ ގެ ބަޔާނުގައި ވެއެވެ.
އޭ.އެފް.ޕީގެ ނޫސްވެރިން ރިޕޯޓުކޮށްފައިވަނީ ދެކުނު ލުބުނާނުގެ އެކި ސަރަޙައްދުތަކަށް އިސްރާއީލުން ގަދަފަދަ ހަމަލާތަކެއް ހޮނިހިރު ދުވަހު ދީފައިވާ ކަމަށެވެ.
