ސަރުކާރުގެ ސިޔާސީ މަގާމުތަކުގެ އަދަދާއި މުސާރަ ހާމަކުރަން ގޮވާލައި އެމްޑީޕީން މަޖިލީހަށް ހުށަހެޅި މައްސަލަ ބޭރުކޮށްލާފައިވަނީ މި ސަރުކާރުން ވެފައިވާ ރިޔާސީ ވައުދުތަކާ ޚިލާފުވެވިފައިވާތީކަމަށް އެމްޑީޕީގެ ޗެއަރ ޕަރސަން ފައްޔާޒު އިސްމާއިލް ވިދާޅުވެއްޖެއެވެ.
މި ހިނގަމުންދާ ސަރުކާރުގެ ސިޔާސީ މަގާމުތަކުގެ އަދަދާއި މުސާރަ ހާމަކުރަން ގޮވާލައި ބުދަ ދުވަހުގެ ޖަލްސާއަށް އެމްޑީޕީން ހުށަހެޅި މައްސަލަ ސަރުކާރު ނިސްބަތްވާ ޕާޓީގެ މެޖޯރިޓީ ވޯޓާއެކު ވަނީ ބޭރުކޮށްލާފައެވެ.
އެ މައްސަލައިގައި ސަރުކާރަށް ފާޑުކިއުންތައް ދަނީ އަމާޒުވަމުންނެވެ.
އެކަމާ ގުޅިގެން ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ، އެމްޑީޕީގެ މެމްބަރު މީކާއިލް އަހުމަދު ނަސީމް އެ މައްސަލަ ހުށަހެޅުއްވީވެސް ސިޔާސީ މަގާމްތަކަށް އައްޔަންކޮށްފައިތިބި މީހުންގެ އަދަދު މި ސަރުކާރުން ވަންހަނާކުރާތީ ކަމަށެވެ.
ފައްޔާޒު ވިދާޅުވި ގޮތުގައި ސަރުކާރުގެ ބާރުން ކުއްލި މައްސަލަ ބޭރުކޮށްލީވެސް ރިޔާސީ އިންތިހާބުގައިވީ ވައުދާ ހިލާފަށް، ސިޔާސީ މަގާމްތަކުގެ އަދަދު އިތުރުވެ ދައުލަތުގެ ހަރަދު ނުތަކާ ވަރަށް ގޮސްފައިވާތީއެވެ.
އޭގެ އިތުރުން، ގައުމުގެ އިގްތިސާދު މިދާ މިސްރާބަކީ އިގްތިސާދު މެނޭޖުކުރަން މިސަރުކާރަށް ނޭނގި، ރައްޔިތުންނަށް ކަންކަން އޮޅުވާލާ ދޮގުހެދުމުގެ ސަބަބުން ކުރިމަތިވާ ކަމެއްކަމަށްވެސް ފައްޔާޒު ވިދާޅުވިއެވެ.
އަދި މި ސަރުކާރުން ހާމަނުކުރާނެ އެއްވެސް ކަމެއް ނޯންނާނެކަމަށް ވައުދުވިކަންވެސް ފައްޔާޒު ވަނީ ހަނދާން ކޮށްދެއްވާފައެވެ.
ރިޔާސީ ބަޔާން އިއްވަވަމުން ރައީސް މުއިއްޒު ވަނީ ކޮންމެހެން ޒަރޫރީ ޙާލަތެއްގައި މެނުވީ ސިޔާސީ މަޤާމުތަކަށް މީހުން އައްޔަނު ނުކުރައްވާނެ ކަމަށް ވިދާޅުވެފައެވެ. ނަމަވެސް އޭގެ ފަހުންވެސް އެތައް ބަޔަކަށް ސިޔާސީ ވަޒީފާތައް ދީފައިވެއެވެ.
ނަމަވެސް ފަހުން އައްޔަން ކުރާ ފަރާތްތަކުގެ މައުލޫމާތުވެސް އާންމު ނުކުރާއިރު، އެއީ ވެބްސައިޓް މައްސަލައެއް ދިމާވެގެންކަމަށް ރައީސް އޮފީހުން ބުނެފައިވެއެވެ.
