ވަކި ކުރި ކަމަށް ބުނި ސިޔާސީ މީހުންގެ މައުލޫމާތު ސިއްރު
ރައީސް މުއިއްޒު ވިދާޅުވެފައިވަނީ އެމަނިކުފާނުގެ ސަރުކާރެއްގައި 700 ށް ވުރެ ގިނަ ސިޔާސީ މުވައްޒަފުން ނުތިބޭނެ ކަމަށް
ރައީސް މުއިއްޒު: ސަރުކާރުގެ އެކި ފެންވަރުގެ މަގާމުތަކުގައި ތިބި ފަރާތްތަކާއެކު ޖަލްސާ އެއްގައި
ސަރުކާރުގެ ޚަރަދު ކުޑަކުރަން ސިޔާސީ މަގާމުތަކުން ވަކިކުރި ކަމަށް ސަރުކާރުން ބުނި 228 މީހުންގެ މައުލޫމާތު ރައީސް އޮފީހުން ސިއްރު ކޮށްފިއެވެ.
"ފޮރުވާނެ އެއްވެސް އެއްޗެއް ނޯންނާނެ" ކަމަށް ރިޔާސީ ކެމްޕޭންގައި ވިދާޅުވި ރައީސް މުއިއްޒުގެ ސަރުކާރުގައި ސިޔާސީ މަގާމުތަކުގައި މިހާތަނަށް ތިބީ ކިތައް މީހުން ކަންވެސް ތަކުރާރު ކޮށް ނޫސްވެރިން ސުވާލު ކުރުމުންވެސް ހާމަ ކޮށްފައެއް ނުވެއެވެ.
އޮކްޓޯބަރު މަހުގެ 15 ވަނަ ދުވަހު އެކްސް ގައި ކުރެއްވި ޕޯސްޓެއްގައި 15 ދުވަހުގެ ތެރޭގައި 228 ސިޔާސީ މުވައްޒަފުން ވަކި ކުރަން ނިންމެވި ކަން ވަނީ އިއުލާނު ކުރައްވާފައެވެ.
އޭގެ ފަހުން ރައީސް އޮފީހުގެ ތަރުޖަމާނު އެކްސް ގައި ކުރެއްވި ޕޯސްޓެއްގައި ރައީސް ވިދާޅުވި ގޮތައް ސިޔާސީ މުވައްޒަފުން ވަކިކޮށް ނިމިއްޖެ ކަމަށް ވިދާޅުވިއެވެ.
އެހެން ނަމަވެސް ވަކި ކުރި މީހުންނާ ބެހޭ އެއްވެސް ތަފްސީލެއް ހާމަ ކޮށްފައެއް ނުވެއެވެ.
ސިޔާސީ މަގާމުތަކުން ވަކި ކުރި މީހުންގެ މައުލޫމާތު ހާމަ ކުރަން ރައީސުލް ޖުމްހޫރިއްޔާގެ އޮފީހުން ދެކޮޅު ހެދީ އެ މައުލޫމާތު ހޯދުމަށް މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަހްމަދު އަފްރާހް އިސްމާއީލް 15 އޮކްޓޯބަރު 2024 ގައި ރައީސް އޮފީހަށް ހުށަހެޅުއްވުމުން އެ ކަމަށް ރައީސް އޮފީހުން ދިން ޖަވާބުގައެވެ.
އަފްރާހް ރައީސް އޮފީހަށް މި މައުލޫމާތު ހޯދުމަށް އެދި ހުށަހެޅި ފޯމުގެ ޖަވާބު ދެމުން ރައީސް އޮފީހުން ބުނީ، ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމަށް ޓަކައި، އަޅަމުން ގެންދާ ފިޔަވަޅު ތަކުގެ ދަށުން، ސަރުކާރުގެ އެކި ވުޒާރާ ތަކުގައި މަސައްކަތް ކުރައްވާ ސިޔާސީ މުވައްޒަފުން މަދުކުރައްވަން ނިންމަވާ 2024 އޮކްޓޯބަރު 31 ގެ ނިޔަލަށް 228 މުވައްޒަފުން ވަޒީފާ ތަކުން ވަކި ކޮށްފައިވާ ކަމަށެވެ.
"ހޯއްދެވުމަށް އެދިވަޑައިގެންފައިވާ މައުލޫމާތުގެ ތެރެއިން، ސިޔާސީ މުވައްޒަފުންގެ ނަމަކީ ޒާތީ މައުލޫމާތައް ވެފައި، އެ ފަރާތްތައް މަސައްކަތް ކުރެއްވި ވުޒާރާތަކުގެ ނަންތައް ހާމަކޮށްފި ނަމަ، އެ ފަރާތްތަކުގެ ޒާތީ މައުލޫމާތު ހާމަވެދާނެ ކަމަށް ގަބޫލު ކުރެވޭތީ، އެ މުވައްޒަފުންގެ ނަމާއި، އެ ވުޒާރާތަކުގެ ނަންތަކުގެ މައުލޫމާތަކީ، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ދޫކުރެވޭނެ މައުލޫމާތެއް ނޫން ކަމުގައި ދަންނަވަމެވެ." ރައީސް އޮފީހުގެ ޖަވާބުގައި ވެއެވެ.
ރައީސް މުއިއްޒު ވިދާޅުވެފައިވަނީ އެމަނިކުފާނުގެ ސަރުކާރެއްގައި 700 ށް ވުރެ ގިނަ ސިޔާސީ މުވައްޒަފުން ނުތިބޭނެ ކަމަށެވެ.
ސިޔާސީ މަގާމުތަކުގެ އަދަދު ސަރުކާރުން ހާމަ ކޮށްފައި ނުވި ނަމަވެސް، ބައެއް މިނިސްޓްރީ ތަކުގައި އިށީންނާނެ ގޮނޑި މޭޒު ނެތް މިންވަރަށް ސިޔާސީ މަގާމުތަކަށް މީހުން ވަނީ ލާފައެވެ. އަދި ބައެއް ފަރާތްތަކުން ކުރާނެ މަސައްކަތެއް ނޯންނަ ކަމަށާއި، އޮފީހަށް ވަދެލާފައި ދަނީ ކޮފީ އަށް ކަމަށް މައުލޫމާތު ލިބިފައިވެއެވެ.
