ސަރުކާރުގެ ސިޔާސީ މަގާމުތަކުގެ އަދަދާއި މުސާރަ ހާމަކުރަން އެމްޑީޕީން ހުށަހެޅި މައްސަލަ ބޭރުކޮށްލައިފި
މައްސަލައަށް ބަހުސް ކުރަން ފެންނަކަމަށް 11 ވޯޓު ލިބުނު
މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް
ސަރުކާރުގެ ސިޔާސީ މަގާމުތަކުގެ އަދަދު ހާމަކުރަން އެމްޑީޕީން ހުށަހެޅި މައްސަލަ ބޭރުކޮށްލައިފިއެވެ.
މި މައްސަލަ ހުށައެޅުއްވީ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމެވެ.
މައްސަލައަށް ބަހުސް ކުރަން ފެންނަކަމަށް 11 ވޯޓު ލިބުނުއިރު، ސަރުކާރުގެ މެމްބަރުން ވޯޓު ދެއްވީ ދެކޮޅަށެވެ. އެގޮތުން 56 މެމްބަރުން ވަނީ ދެކޮޅަށް ވޯޓު ދެއްވާފައެވެ.
ބުދަ ދުވަހުގެ ޖަލްސާގައި މީކާއިލް ހުށަހެޅުއްވި މައްސަލައިގައި ބުނެފައިވަނީ ސިޔާސީ އެކި މަޤާމުތަކަށް އައްޔަނު ކޮށްފައިވާ މީހުންގެ އަދަދާއި، ސަރުކާރު ހިއްސާވާ ކުންފުނިތަކުން މުސާރައިގެ ގޮތުގައި ހޭދަކުރަމުންދާ އަދަދު ހާމަ ކުރުމަށް ސަރުކާރުން އިންކާރު ކުރަމުންދާ ކަމަށެވެ.
އޭގެ އިތުރުން، ސަރުކާރުގެ އިދާރާތަކަށް ބޭނުންވާ ވަރަށްވުރެ އިތުރަށް އަދި އެއްވެސް ހައްދެއް ނެތި ސިޔާސީ މަޤާމުތަކަށް މީހުން އައްޔަނު ކުރަމުން ދިއުމުގެ ސަބަބުން ކުންފުނިތަކުންވެސް މާލީ ޙާލަތާ ނުބައްދަލު ޚަރަދު ކުރަން ޖެހިފައިވާކަން މީކާއީލް ހުށަހެޅުއްވި މައްސަލައިގައި ބަޔާންކޮށްފައިވެއެވެ.
މީކާއީލް ވަނީ ސިޔާސީ މަޤާމުތަކަށް ރައީސުލްޖުމްހޫރިއްޔާ އައްޔަނު ކުރައްވާފައިވާ މީހުންގެ ރަސްމީ އަދަދު ސާފުކޮށްދިނުމަށް މަޖިލީހުގެ މާލިއްޔަތު ކޮމިޓީން ފިނޭންސް މިނިސްޓަރުގެ އަރިހުގައި އެދެމުންވެސް އެ މައުލޫމާތު ކޮމިޓީއާވެސް ހިއްސާ ނުކުރެއްވިކަން ފާހަގަ ކުރައްވާފައެވެ. އަދި މިއީ ވެރިކަން ހިންގުމުގެ ބާރު ޖަވާބުދާރީ ކުރުވުމަށް މަޖިލީހަށް މަތިކޮށްފައިވާ ދުސްތޫރީ ވާޖިބު އަދާ ކުރުމަށް ހުރަސް އެޅޭ ކަމެއްކަންވެސް ފާހަގަކޮށްފައިވެއެވެ.
