ރައީސް މުއިއްޒު ކުރައްވާ މަސައްކަތަކީ ރައްޔިތުން އަޅުވެތިކޮށް، ވެރިކަން ދިފާއު ކުރެއްވުމުގެ މަސައްކަތް: ބިގޭ
ރައްޔިތުންނަށް ލިބެންޖެހޭ ހައްގުތައް ވަރަށް ބޮޑަށް ދަނީ ހަނިކުރަމުން
''ޓީވީޓޯކް ޕްރޮގްރާމް''ގައި އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސައްކަތް ކުރައްވަނީ ރައްޔިތުން އަޅުވެތިކޮށް، ވެރިކަން ދިފާއު ކުރެއްވުން ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
ރާއްޖެޓީވީގެ ''ޓީވީޓޯކް ޕްރޮގްރާމް''ގައި ބިގޭ ވިދާޅުވީ ރައީސް މުއިއްޒު މަސައްކަތް ކުރައްވަނީ ރައްޔިތުން އަޅުވެތި ކުރަން ކަމަށާއި، ރައްޔިތުންނަށް ލިބެންޖެހޭ ހައްގުތައް ވަރަށް ބޮޑަށް ހަނިކުރަމުންދާ ކަމަށެވެ.
ވެރިކަން ދިފާއު ކުރެއްވުމަށް، އެމަނިކުފާނުގެ އަރިހުގައި ބޮޑެތި މުސާރަދީގެން ބޭފުޅުން ބައިތިއްބާ ކަމަށާއި، ރައްޔިތުންނަށް ރަނގަޅު ޚިދުމަތެއް ފޯރުކޮށްދިނުމަށް މަސައްކަތް ނުކުރައްވާ ކަމަށް ބިގޭ ވިދާޅުވިއެވެ. އަދި އެބޭފުޅުންނަށް ގަދަބާރު ދައްކަވައި، އެބޭފުޅުން ވެސް ގެންގުޅުއްވަނީ ބަނދެ ތަޅު އަޅުވާގެން ކަމަށް އޭނާ ވިދާޅުވިއެވެ.
މިސަރުކާރުގެ ސިޔާސީ ވަޒީފާތަކަށް އިޝާރާތް ކުރައްވައި ބިގޭ ވިދާޅުވީ އެއަދަދު ރައީސް މުއިއްޒަށް ވެސް އެނގިވަޑައިނުގަންނަވާ ކަމަށާއި، ސިޔާސީ މަގާމުތައް އިތުރު ކުރަމުންދަނީ ރައްޔިތުން ކޮންޓްރޯލް ކުރުމަށް ކަމަށެވެ.
އެހެންވާންޖެހޭ މައިގަނޑު ސަބަބަކީ މިހާރުގެ ރައީސުލްޖުމްހޫރިއްޔާއަކީ އަމިއްލަފުޅު ސިޔާސީ ޕާޓީއެއް އޭގެ ޒާތުގައި އޮތް ބޭފުޅެއް ނޫން. އެކި ފަހަރު އެކި ޕާޓީގެ ތެރެއިން ވަޒީރުކަމުގެ ތެރެއިން މިހިސާބަށް ވަޑައިގެންނެވި ބޭފުޅެއް ވީމަ ވަށައިގެން ރައީސުލްޖުމްހޫރިއްޔާ ހިމާޔަތް ކުރާނެ އެއްވެސް ކަހަލަ ބޭފުޅުން ކޮޅެއް ކައިރީގައި އޭޒާތުގައި އަމިއްލައަށް އުފައްދާފައި ނެތް. އެހެން ދިމަ ދިމާލުން ވަޒީފާތައް ދީގެން އަގާގައި ތަޅު އަޅުވައިގެން މަޖުބޫރުކޮށްގެން ކައިރީގައި މި ގެންގުޅުއްވަނީ އެނގޭތޯ. އެހެންވީމަ މިވާ ގޮތަކީ ކައިރީގައި ބޭފުޅަކު ނެތުނީމަ ބޭފުޅުންތައް ކައިރީގައި ބޭއްތިއްބުމުގެ ބޭނުމުގައި ވަޒީފާތައް މިދެނީ. ވެރިކަން ދެމެހެއްޓެން އޮތީ ވެސް ކައިރީގައި ބަޔަކު ބައިތިއްބައިގެން. އެހެންވީމަ އެވިސްނުމުގައި ގިނަ ވަޒީފާތައް އުފެމުންދަނީ.އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)
ބިގޭ ވިދާޅުވީ މި ސަރުކާރުން ރައްޔިތުންގެ އަސާސީ ހައްގުތައް އުނިކުރަމުންދާ ކަމަށެވެ.
އެގޮތުން ސަރުކާރުގެ ލޯނުގެ ދަށުން ކިޔަވަމުންދާ ދަރިވަރުންނަށް ފައިސާ ލިބުމުގައި ދަތިވެފައިވާ ކަމަށާއި، ކަރަންޓު ބިލުތައް ބޮޑުވެ، ބޭސް ނުލިބި، އާސަންދަ ޚިދުމަތް ނުލިބި އަދިވެސް ދިވެހި އާއްމު ރައްޔިތުން އުފަލުގައި ދިރިއުޅުމަށްޓަކައި ބޭނުންވާ ޚިދުމަތްތަކުން މަހުރޫމްކޮށް ދަތިކުރަމުންދާ ކަމަށް އޭނާ ވިދާޅުވި އެވެ.
މީގެ އިތުރުން ބިގޭ ވިދާޅުވީ ސަރުކާރާ އިދިކޮޅުވާނަމަ، ވިޔަފާރިތަކަށް ހުރަސްއަޅަމުންދާ ކަމަށާއި، ބިރު ދެއްކުން އިސްކުރަމުންދާ ކަމަށެވެ. މިހާރު ޕްރައިވެޓް ސެކްޓަރއަށް ވަރަށް ބޮޑަށް ދަތިކޮށްފައިވާ ކަމަށް އޭނާ ވިދާޅުވިއެވެ. އަދި ގައުމުގައި ފައިސާ ހުރި ނަމަވެސް ފައިސާ ހިފަހައްޓައި ރައްޔިތުންނަށް ދަތި ކުރަމުންދަނީ ވެރިކަން ދިފާއު ކުރެއްވުމަށް ކަމަށް ބިގޭ ވިދާޅުވި އެވެ.
