މަތި ބަރު ވެގެން އެޗްޑީސީ އަށް ފާޑުކިޔުއްވި މެންބަރު ހުސެއިން ޝަރީފު ގެ އަންހެނުންނަށް، އެކުންފުނިން 55،000 ރުފިޔާގެ މަގާމެއް
މެންބަރު ހުސެއިން ޝަރީފުގެ އަންހެނުން ހަމަ ޖައްސާފައިވަނީ 55،000 ރުފިޔާގެ މަހު މުސާރަ އެއް ލިބޭ މެނޭޖިން ޑިރެކްޓަރުގެ ބިއުރޯގެ ޗީފްގެ މަގާމަށް
ޕީއެންސީ ގެ މަޖްލިސް މެމްބަރު ހުސެއިން ޝަރީފް ގެ ދެމަފިރިން
ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަކީ މަތި ބަރު ކުންފުންޏެއް ކަމަށް ބުނެ އެ ކުންފުންޏަށް ވަރަށް ބޮޑަށް ފާޑު ކިޔުއްވި، ރައްޔިތުންގެ މަޖިލީހުގެ ހުޅުމާލެ އުތުރު ދާއިރާގެ ޕީއެންސީ މެންބަރު ހުސެއިން ޝަރީފުގެ އަންހެނުންނަށް އެ ކުންފުނިން ބައިލައްކަ ރުފިޔާއަށް ވުރެ ބޮޑު މަހު މުސާރަ އެއް ލިބޭ މަގާމެއް ދީފައިވާ ކަން ހާމަވެއްޖެ އެވެ.
މައުލޫމާތު ލިބިފައިވާ ގޮތުގައި، މެންބަރު ޝަރީފުގެ އަންހެނުން ޝިނާ ވަޖީހު އައްޔަން ކުރީ އެޗްޑީސީގެ މެނޭޖިން ޑިރެކްޓަރުގެ ބިއުރޯގެ ޗީފްގެ މަގާމަށެވެ. އޭނާ އައްޔަން ކުރީ ޑިރެކްޓަރެއްގެ ފެންވަރުގައި ކަމަށާއި، މަހު މުސާރައަކީ 55،000 ރުފިޔާ ކަމަށް މައުލޫމާތު ލިބިފައިވެ އެވެ.
ދާދި ފަހުން އެ ވަޒީފާއަށް ނިކުންނަން ފެށި ޝިނާ ވަނީ ސްރީ ލަންކާއަށް އެހީވުމަށް ޕީއެސްއެމްއިން ކުރިޔަށް ގެންދިޔަ ޓެލަތޯނުގައި، އެޗްޑީސީގެ ފަރާތުން ފައިސާ ހަދިޔާ ކުރަން އެ ކުންފުނީގެ މެނޭޖިން ޑިރެކްޓަރު އަލީ ޒުހައިރު އާއެކު ވެސް ބައިވެރިވެފަ އެވެ.
ގިނަ ބަޔަކު ފާހަގަ ކުރާ ގޮތުގައި އޭރު މެމްބަރު ޝަރީފު އެޗްޑީސީ އަށް އެހާ ބޮޑަށް ފާޑު ކިޔުއްވީ އަންހެނުންގެ ވަޒީފާ ހަމަޖެހިފައި ނުވުމުންނެވެ. ނަމަވެސް ސަރުކާރަށް އެކި ގޮތް ގޮތުން ޕްރެޝަރ ކުރުމަށް ފަހު މެމްބަރު ޝަރީފް ވަނީ އަންހެނުންގެ ވަޒީފާ ކަށަވަރުކޮށްފަ އެވެ. އަދި އެޗްޑީސީ އަށް ފާޑުކިޔުން ވެސް ވަނީ ހުއްޓާލާފަ އެވެ.
މި ސަރުކާރުގެ ސިޔާސީ މަގާމުތައް އެހެން ހުރިހާ ސަރުކާރަކަށް ވުރެ އިތުރުވެފައި ވާއިރު، ސިޔާސީ ނުފޫޒުން ސަރުކާރުގެ ކުންފުނިތަކަށް އައްޔަން ކުރާ މީހުންގެ އަދަދު ވެސް ވަނީ ވަރަށް ބޮޑަށް އިތުރުވެފަ އެވެ.
ސަރުކާރުގެ ސިޔާސީ މަގާމުތައް 700 އަށް ވުރެ އިތުރު ނުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ރިޔާސީ ކެމްޕޭނުގައި ރައީސް މުއިއްޒު ވަނީ ސަރުކާރުގެ ހަރަދުތައް ކުޑަ ކުރައްވާނެ ކަމަށާއި، ސިޔާސީ މަގާމުތައް މަދު ކުރައްވާނެ ކަމަށް ވައުދުވެވަޑައިގެންފަ އެވެ. ނަމަވެސް މިހާތަނަށް ފެންނަމުންދާ ތަސްވީރަކީ އެއާ ޚިލާފު ތަސްވީރެކެވެ.
ސަރުކާރުން މިދިޔަ ޖުލައި މަހު ހާމަކުރި ހިސާބުތަކުން އެނގޭ ގޮތުގައި، ސަރުކާރުގައި އޭރު ތިބީ 922 ސިޔާސީ މުވައްޒަފުންނެވެ. އިދިކޮޅު ފަރާތްތަކުން ތުހުމަތު ކުރައްވާ ގޮތުގައި މި ސަރުކާރުގެ ސިޔާސީ މަގާމުތައް 3000 އަށް ވުރެ ގިނަ އެވެ.
