ޔަމަނުގެ ހޫތީ ހަނގުރާމަވެރިން އަނެއްކާވެސް އެމެރިކާގެ ޑްރޯނެއް ވައްޓާލައިފި
މިއީ އެއް ހަފުތާގެ ތެރޭގައި ޔަމަނުގެ ހަނގުރާމަވެރިން ވައްޓާލި 35 މިލިއަން ޑޮލަރުގެ އަގުހުރި ތިންވަނަ ޑްރޯނެވެ.
ޔަމަންގެ ހަނގުރާމަވެރިން ވައްޓާލާފައިވާ އެމެރިކާގެ އަސްކަރީ ޑްރޯނެއްގެ ބައިތަކެއް
ޔަމަނުގެ ހަތިޔާރުއެޅި ބާރުތަކުން އެމެރިކާގެ އިތުރު ޒަމާނީ ޑްރޯނެއް ވައްޓާލައިފިއެވެ.
މިއީ ޣައްޒާގައި އެމެރިކާގެ އެހީތެރިކަމާއެކު އިޒްރޭލުން ހިންގަމުންދާ ނަސްލު ނައްތާލުމުގެ ހަނގުރާމައާ ދެކޮޅު ހަދާ، ފަލަސްތީނުގެ ރައްޔިތުންނަށް މަދަދުވެރިވުމުގެ ގޮތުންނާއި އެމެރިކާއިން ޔަމަނަށް ދެމުންދާ ހަމަލާތަކާ ދެކޮޅު ހެދުމުގެ ގޮތުން ހިންގާ ހަރަކާތުގެ ތެރެއިން ވައްޓާލި ޑްރޯނެއް ކަމަށް ޔަމަނުން ބުނެއެވެ.
އެމްކިއު-9 ރީޕަރ ޑްރޯން ވައްޓާލީ ހޯމަ ދުވަހު ޔަމަނުގެ ހުޅަނގު ސަރަޙައްދުގައިވާ ދަމާރު ޕްރޮވިންސްގެ މަތިން އުދުހެނިކޮށްނެވެ. މި ބޮޑު ޑްރޯން އަކީ ހަނގުރާމައާއި ޖާސޫސީ މަސައްކަތް ކުރުމަށް ބޭނުންކުރާ، 35 މިލިއަން ޑޮލަރުގެ އަގުހުރި އުޅަނދެކެވެ.
މިއީ އެއް ހަފުތާގެ ތެރޭގައި ޔަމަނުގެ ހަނގުރާމަވެރިން ވައްޓާލި މިބާވަތުގެ ތިންވަނަ ޑްރޯނެވެ. އަދި މިދިޔަ އަހަރުގެ އޮކްޓޯބަރު 7ގެ ފަހުން ވައްޓާލި 10 ވަނަ ޑްރޯނެވެ. އިޒްރޭލުން ޣައްޒާއަށް ހަމަލާ ދޭން ފެށި ދުވަހުން ފެށިގެން، ޔަމަނުގެ ބާރުތަކުން ވަނީ އިޒްރޭލާ ދެކޮޅަށް ގިނަ ހަމަލާތަކެއް ދީފައެވެ.
މިގޮތުން ދިން އެންމެ ވަރުގަދަ ހަމަލާ ދިނީ މިދިޔަ އާދީއްތަ ދުވަހުއެވެ. އާދިއްތަ ދުވަހު ހައިޕަރސޮނިކް ބެލިސްޓިކް މިސައިލަކުން ތެލްއަވީވްގައި ހުރި އިޒްރޭލުގެ އަސްކަރީ މަރުކަޒަކަށް ޔަމަންގެ ބާރުތަކުން ވަނީ ހަމަލާދީފައެވެ.
