ރައީސް މުއިއްޒު ވަނީ މަޖިލިސް ޕެރަލައިޒް ކޮށްފައި: އަހުމަދު އީސަ

ރައީސުލްޖުމްހޫރިއްޔާ ޑރ.މުހައްމަދު މުއިއްޒު 20 ވަނަ ރައްޔިތުންގެ މަޖިލިސް ޕެރަލައިޒް ކޮށްފައިވާ ކަމަށް ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަ ވިދާޅުވެއްޖެއެވެ.

ހޯމަ ދުވަހުގެ ރޭ އެމްޑީޕީން ކުރިއަށް ގެންދިޔަ 'ހަވަރު ބެރު' ޕެނަލްގައި ވާހަކަ ދައްކަވަމުން އަހުމަދު އީސަ ވިދާޅުވީ ސިޔާސީ ޕާޓީއެއްގެ ޓިކެޓުގައި ރައްޔިތުންގެ މަޖިލީހަށް އިންތިޚާބުވި ނަމަވެސް މެންބަރުން ރައްޔިތުންގެ މައްޗަށް އަދާކުރަންޖެހޭ ޒިންމާތަކެއްވާ ކަމަށެވެ. ގާނޫނު އަސާސީގައި އެކަން ފާހަގަކޮށްފައިވާ ކަމަށް އަހުމަދު އީސަ ވިދާޅުވިއެވެ.

އެގޮތުން ދައުލަތުގެ ތިން ބާރު ވަކިން ޖަވާބުދާރީ ކުރުވުން ހިމެނޭ ކަމަށް އަހުމަދު އީސަ ވިދާޅުވިއެވެ. އަދި ވިދާޅުވީ ގައުމުގައި ހިނގާ ކަންކަން ނުވަތަ މަޝްރޫއުތަކާއި ގުޅޭގޮތުން ވަޒީރުންނާ ސުވާލު ކުރުމާއި، ވަޒީރުން މަޖިލީހަށް ހާޒިރު ކުރުމާއި، އަދި ރައްޔިތުން މަޖިލީހުގެ ކޮމެޓީތަކަށް ހާޒިރުކުރަން ޖެހޭ ކަމަށެވެ.

މީގެ އިތުރުން މަޖިލިސް ގިނަ މެންބަރުން ރައީސް މުއިއްޒު ރިޝްވަތުގެ ކަޅު ފައިސާ ބަހާ ކަމަށާއި، އެ ފައިސާގައި ގިނަ މެންބަރުން ޖެހިފައިވާ ކަމަށް އަހުމަދު އީސަ ތުހުމަތު ކުރެއްވިއެވެ. އެހެންކަމުން މަޖިލީހުގެ ގިނަ މެންބަރުންނަށް ޒިންމާ އަދާނުކުރެވޭ ކަމަށް އޭނާ ވިދާޅުވިއެވެ. އަދި ވިދާޅުވީ ރައީސް މުއިއްޒު ވަނީ މަޖިލިސް އެކޮށް ޕަރަލައިޒްކޮށް، ހައިޖެކްކޮށްފައިވާ ކަމަށެވެ.

ސަރުކާރުން ހުށަހެޅި ކުންފުންޏާބެހޭ ގާނޫނަށް އިސްލާހު ގެނައުމުގެ ބިލު މަޖިލީހުން ބަލައިގަނެ، ކޮމިޓީންވެސް ބިލު ހޯމަ ދުވަހު ފާސްކޮށްފައިވާތީ އެކަމަށް އިޝާރާތް ކުރައްވައި އަހުމަދު އީސަ ވިދާޅުވީ ރާއްޖެ މިހާރު ވެސް އޮތީ އިގްތިސާދީ ބޮޑު މައްސަލަތަކެއްގެ ތެރޭގައި ކަމަށާއި، ރާއްޖޭގެ މުޅި އިގްތިސާދީ ވެށި ޒަމާނާ އެއްގޮތަށް ވަރަށް ވިސްނުންތެރިކަމާއެކު ބަދަލުތަކެއް ގެންނަންޖެހޭ ކަމަށެވެ.

ނަމަވެސް ކުންފުންޏާބެހޭ ގާނޫނު ކޮމެޓީން ފާސްކުރުމަށް ނެނގީ އެންމެ 10 މިނެޓު ކަމަށާއި، ހަރުދަނާ ސިޔާސަތެއް ނުވަތަ ހިޔާލެއް ހުށަހަޅާ ރަނގަޅު މަސައްކަތްތަކެއް ކޮށްފައިނުވާ ކަަމަށް އަހުމަދު އީސަ ވިދާޅުވިއެވެ. މިކަމުން އެކަނި ވެސް މަޖިލިސް މެންބަރުންގެ ދައުރު ނެތްކަން ނުވަތަ މެންބަރުން އަދާކުރަންޖެހޭ ޒިންމާ އަދާކުރުން ހުއްޓިފައިވާކަން ހާމަވާ ކަމަށް އޭނާ ވިދާޅުވިއެވެ.

އަހުމަދު އީސަ ވިދާޅުވީ މިހާރު 20 ވަނަ ރައްޔިތުންގެ މަޖިލީހަކީ ރައްޔިތުންގެ ހައްގުގައި ވަކާލާތު ކުރާތަނެއް ނޫން ކަމަށެވެ. ކަޅު ފައިސާއިން މަޖިލިސް ހައިޖެކްކޮށްފައިވާއިރު، މިއީ މުޅި ގައުމަށް އޮތް ބޮޑު ނުރައްކަލެއް ކަމަށް އަހުމަދު އީސަ ވިދާޅުވިއެވެ.

މީގެ އިތުރުން އަހުމަދު އީސަ ވިދާޅުވީ ގައުމު ހަމަމަގަށް އެޅުމަށް ކުރާ މަސައްކަތް ނުހުއްޓުވޭނެ ކަމަށެވެ. ބިރު ދެއްކި ނަމަވެސް ގާނޫނު އަސާސީން ކަށަވަރުކޮށްދީފައިވާ މިނިވަންކަމުގެ ބޭނުން ހިފައި މަސައްކަތް ކުރާނެ ކަމަށް އޭނާ ވިދާޅުވިއެވެ.