ޣައްޒާގެ ގެއަކަށް އިޒްރޭލުން ބޮންއަޅާ އެއް އާއިލާގެ 11 މެމްބަރުން ޝަހީދު ކޮށްލައިފި
ޝަހީދުވި މީހުންގެ ތެރޭގައި 4 ކުދިންނާއި 3 އަންހެނުން ހިމެނެއެވެ.
އިޒްރޭލުން ދިން ހަމަލާގައި ސުންނާފަތިވެފައިވާ ގެއެއް ކައިރީގައި މީހަކު ހުއްޓިގެން
ހޮނިހިރު ދުވަހުގެ ހެނދުނު އިޒްރޭލުން ޣައްޒާ ސިޓީގެ ގެއަކަށް ބޮންއަޅާ އެއް ޢާއިލާއެއްގެ 11 މެންބަރުން ޝަހީދުކޮށްލައިފި ކަމަށް ޣައްޒާގެ ސިވިލް ޑިފެންސް އޭޖެންސީން ބުނެފިއެވެ.
ޝަހީދުކޮށްލި މީހުންގެ ތެރޭގައި އަންހެނުންނާއި ކުޑަކުދިން ހިމެނެއެވެ.
ސިވިލް ޑިފެންސްގެ ތަރުޖަމާނު މަޙްމޫދު ބައްސާލް އޭއެފްޕީއަށް މައުލޫމާތު ދެމުން ބުނެފައިވަނީ "11 ޝަހީދުންގެ ހަށިގަނޑު ނަގައިފިން، އޭގެ ތެރޭގައި 4 ކުދިންނާއި 3 އަންހެނުން ހިމެނޭ، އިޒްރޭލް ސިފައިން ހަމަލާދިނީ ޣައްޒާ ސިޓީގެ އިރުމަތީ ސަރަޙައްދުގައި ހުރި ބުސްތާން ޢާއިލާގެ ގެއަށް،" ކަމަށެވެ.
ހަމަލާ ދިން ސަރަހައްދުން ދިރިތިބި މީހުން ފެނޭތޯ އޮފިޝަލުން ގެންދަނީ މަސައްކަތް ކުރަމުންނެވެ.
އިޒްރޭލުން މި ހިންގި ޖަރީމާ އާ ބެހޭ ގޮތުން އެއްވެސް އެއްޗެއް ބުނެފައެއް ނުވެއެވެ.
ޣައްޒާގެ އެކި ސަރަހައްދުތަކަށް ހުކުރުދުވަހުގެ ރޭ ވެސް ވަނީ މިފަދަ ހަމަލާތައް ދީފައެވެ. އެ ހަމަލާތަކުގައި މަދުވެސް 10 މީހުން ޝަހީދުވެފައިވާ ކަމަށް ރިޕޯޓްތައް ބުނެއެވެ.
