އިޒްރޭލުން ފަލަސްތީނުގެ ބައެއް މީޑިއާތައް ބަންދުކޮށްފި

އިޒްރޭލުގެ އަސްކަރިއްޔާ އިން ހުޅަނގު އައްސޭރީގައި ހަރަކާތްތެރިވާ ފަލަސްތީނުގެ މީޑިއާތައް ބަންދުކޮށްފި އެވެ.

އިޒްރޭލުން އަތްގަދަކޮށްފައިވާ ފަލަސްތީނުގެ ހުޅަނގު އައްސޭރީގައި ހަރަކާތްތެރިވާ ފަލަސްތީނުގެ މީޑިއާތައް ބަންދުކޮށްފައި ވަނީ، ހުޅަނގު އައްސޭރީގެ މީޑިއާ އޮފީސްތައް ބަލައިފާސްކުރުމަށް އަންގާރަ ދުވަހުގެރޭ ހިންގި އޮޕަރޭޝަންތަކުގައެވެ.

އިޒްރޭލުގެ އަސްކަރިއްޔާ އިން ނެރުނު ބަޔާނެއްގައި ވަނީ، އިޒްރޭލާއި ދެކޮޅަށް ހަމަނުޖެހުން އުފެއްދުމަށް ހިތްވަރުދޭ ކަމުގެ ތުހުމަތުގައި ފަލަސްތީނުގެ އަށް މީޑިއާ ކުންފުންޏެއްގެ އޮފީސް ބަލައި ފާސްކޮށްފައިވާ ކަމަށެވެ.

އިޒްރޭލުގެ މިއަމަލުތަކަށް ފަލަސްތީނުގެ ސަރުކާރުން ވަނީ ފާޑު ކިޔާފައެވެ.

އިޒްރޭލުގެ އަސްކަރިއްޔާ އިން އަންގާރަ ދުވަހުގެރޭ ހުޅަނގު އައްސޭރީގައި ހިންގި އޮޕަރޭޝަނުގައި ފަލަސްތީނުގެ 14 މީހަކު ހައްޔަރު ކޮށްފައިވާ ކަމަށް ފަލަސްތީނުގެ ނޫސް އޭޖެންސީ މައަން އިން ބުނެ އެވެ.

މިއޮޕަރޭޝަން ހިންގާފައިވަނީ ފަލަސްތީނުގެ ސިޔާސީ ދެ ހަތުރުން ކަމަށްވާ ހުޅަނގު އައްސޭރީގެ ވެރިކަން ކުރާ ފަތަޙަ ޖަމާއަތާއި، ޣައްޒާގައި ވެރިކަން ކުރާ ހަމާސް ޖަމާއަތާއި ދެމެދު އުފެދިފައިވާ 10 އަހަރުވީ ވާދަވެރިކަން ނިމުމަކަށް ގެނެސް، ދެ ޖަމާއަތުގެ މެދުގައި ޞުލްޙަ ގާއިމްކޮށް، އެއްބައިވަންތަކަމުގެ ސަރުކާރެއް އުފެއްދުމަށް އެއްބަސްވުމަކާއި ހަމަޔަށް އައިތާ ހަފްތާއެއްވެސް ނުވަނީހެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ މިދިޔަ ހަފްތާގައި ވަނީ، ހަމާސް އިން ހަތިޔާރު ބަހައްޓައި، އިޒްރޭލްގެ ދައުލަތް ބަލައި ނުގަންނަނީސް އެޖަމާއަތުން ބައިވެރިވާ އެއްވެސް އެއްބަސްވުމެއް ބަލައިނުގަންނާނެ ކަމަށާއި، ހަމާސް އާއެކު ހަދާ އެއްބަސްވުންތަކަށް އިޒްރޭލުން ދެކޮޅު ހަދާނެ ކަމަށް ވިދާޅުވެފައެވެ.

އިޒްރޭލުން، ފަލަސްތީނުގެ ޣައްޒާ ބަންދުކޮށް، ހުޅަނގު އައްސޭރި އަށް އަތްގަދަކޮށްގެން އުޅޭތާ ބައިގަރުނު ވަނީ ވެފައެވެ.