ހަމާސް އިން ޣައްޒާގެ ބޯޑަރުތައް ފަލަސްތީނުގެ ސަރުކާރާއި ހަވާލުކޮށްފި

އިޒްރޭލުން ބަންދުކޮށްފައިވާ ފަލަސްތީނުގެ ޣައްޒާ އަށް ވަދެވެން އޮންނަ ބޯޑަރުތަކުގެ އިދާރީ ކޮންޓްރޯލް ހަމާސް އިން ފަލަސްތީނުގެ ސަރުކާރަށް ދޫކޮށްލައިފި އެވެ.

ޣައްޒާގައި ވެރިކަން ކުރާ ހަމާސް އިން، ޣައްޒާ އަށް ވަދެވެން އޮންނަ ފަސް ބޯޑަރެއްގެ ކޮންޓްރޯލް، ހުޅަނގު އައްސޭރީގައި ގާއިމްވެފައިވާ ފަތަޙް ޖަމާއަތުގެ ސަރުކާރާއި ހަވާލުކޮށްފައިވާ ކަމަށް ރިޕޯޓްތައް ބުނެއެވެ.

ހަމާސް އިން ޣައްޒާ އަށް ވަދެވެން އޮންނަ ބޯޑަރުތަކުގެ ޗެކްޕޮއިންޓްތައް ފަލަސްތީނުގެ ސަރުކާރާއި ހަވާލުކޮށްފައިވަނީ، މިސްރުން މެދުވެރިވެގެން ހަމާސް އަދި ފަލަސްތީނުގެ ފަތަޙް ޖަމާއަތާއި ދެމެދު މިދިޔަ އޮކްޓޯބަރު މަހުގެ 12 ވަނަ ދުވަހު މިސްރުގެ ގާހިރާގައި ސޮއިކުރި އެއްބަސްވުމުގެ ދަށުންނެވެ.

ޣައްޒާގެ ބޯޑަރުތައް ހަމާސް އިން ފަލަސްތީނުގެ ސަރުކާރާއި ހަވާލު ކުރި ނަމަވެސް، ޣައްޒާގެ ރައްޔިތުންނަށް މިނިވަންކަމާއެކު ބޯޑަރު ހުރަސްކޮށް ދަތުރުފަތުރު ކުރުމުގެ ފުރުޞަތެއް ނުލިބޭނެ އެވެ. ޣައްޒާ އަށް ވަދެވެން އޮންނަ ބޯޑަރުތައް ހުރަސްކޮށް ދަތުރުކުރުމަށް، އިޒްރޭލުން ހުއްދަ ނަގަން ޖެހެއެވެ.

ހަމާސް އަދި ފަތަހް އާދެމެދު ވެފައިވާ ޞުލްހައިގެ އެއްބަސްވުމުގެ ދަށުން، ބައިނަލްއަޤްވާމީ މުޖުތަމަޢު އިން ގަބޫލްކުރާ ފަލަސްތީނުގެ ސަރުކާރު (ޕީއޭ) އަންނަ ޑިސެމްބަރު މަހުން ފެށިގެން ޣައްޒާގެ ސަލާމަތީ ކަންކަން ބެލެހެއްޓުމާއި ހަވާލުވާނެ އެވެ.

2007 ވަނަ އަހަރު ހަމާސް އާއި ފަތަހް ޖަމާއަތާއި ދެމެދު އުފެދުނު ދެބަސްވުމަށްފަހު، ފަލަސްތީނުގެ ހުޅަނގު އައްސޭރި އާއި ޣައްޒާގައި ހިނގަމުންދަނީ ވަކި ވެރިކަމެކެވެ. ފަލަސްތީނުގެ މައި ސަރުކާރުގެ ގޮތުގައި ބައިނަލްއަޤްވާމީ މުޖުތަމައު ދެކޭ ފަތަޙް ޖަމާއަތުގެ ސަރުކާރުން ހުޅަނގު އައްސޭރީގައި ގާއިމްވެފައިވާއިރު، ފަލަސްތީނުގެ މައި ސަރުކާރާއި ވަކިން ޣައްޒާގައި ވެރިކަން ކުރަނީ ހަމާސް ޖަމާއަތުންނެވެ.