ހަމާސްގެ އަސްކަރީ ކޮމާންޑަރު މަރާލި މައްސަލައިގައި ތިން މީހެއްގެ މައްޗަށް ޣައްޒާގެ ކޯޓަކުން މަރުގެ ހުކުމް އިއްވައިފި

ހަމާސްގެ އަސްކަރީ ކޮމާންޑަރު މަރާލި މައްސަލައިގައި ތިން މީހެއްގެ މައްޗަށް ޣައްޒާގެ ކޯޓަކުން އާދީއްތަ ދުވަހު މަރުގެ ހުކުމް އިއްވައިފިއެވެ.

ހަތަރު ދުވަހުގެ ޝަރީއަތަށް ފަހު އަސްކަރީ ކޯޓުން ކުރިއިރު ދެ މީހެއްގެ މައްޗަށް ހުކުމް ކުރީ ދަންޖައްސައިގެން މަރުގެ އަދަބު ދިނުމަށެވެ. ތިން ވަނަ މީހާގެ މައްޗަށް ހުކުމް ކޮށްފައިވަނީ ބަޑި ޖަހައިގެން މެރުމަށެވެ.

ހަމާސްގެ ކޮމާންޑަރ މާޒިން ފަޤްހާ މާޗް މަހުގެ 24 ވަނަ ދުވަހު ޣައްޒާގައި މާރާލުން ވެގެން ގޮސްފައިވަނީ ހަމާސް އަށް ޝޮކެއް ލިބިގެން ދިޔަކަމަކަށެވެ.

މާޒިންގެ މަރުގެ ތުހުމަތު ހަމާސްއިން އިސްރާލުގެ މައްޗަށް ކުރާއިރު މި ހާދިސާ ވެގެން ގޮސްފައި ވަނީ ފަލަސްތީ އިސްރާއީލާ ދެމެދު އަނެއްކާ ވެސް ހަމަނުޖެހުންތަކުގެ އިތުރު ބުރެއް ފެށިގެން ދިއުމުގެ ފުރުސަތު ބޮޑުވެގެން ދިޔަކަމަކަށެވެ.

އާދީއްތަ ދުވަހު އިއްވި ހުކުމުގައި އުމުރުން 38 އަހަރުގެ އަޝްރަފް އަބޫ ލީލާގެ މައްޗަށް އިއްވާފައިވަނީ ދަންޖައްސާ ހުކުމް ކުރުމަށެވެ.

ދަންޖައްސައިގެން މެރުމަށް ހުކުމް އިއްވުނު އެކަކު އެނގިފައިވަނީ އުމުރުން 44 އަހަރުގެ ހިޝާމް އޭ ގެ ގޮތުގައެވެ. އަދި ބަޑި ޖަހައިގެން މެރުމަށް ހުކުމް އިއްވުނު މީހާ އެނގިފައިވަނީ އަބްދުﷲ އެން ގެ ގޮތުގައެވެ.

އެ މީހުންގެ މައްޗަށް ސާބިތުވެފައި ވަނީ އިސްރާއީލާ ގުޅިގެން ޖަރީމާ ހިންގިކަމަށެވެ.

ފަޤްހާގެ މައްޗަށް ވަނީ ހިފާފައިވާ ހުޅަނގު އައްސޭރީގައި ހަމާސްގެ އަސްކަރީ ގޮފިން ސެލްތައް އުފައްދިކަމުގެ ތުހުމަތު ކުރެވިފައެވެ. އަހަރު ތަކެއްވަންދެން ޖަލުގައި ގެންގުޅުމަށްފަހު ޣައްޒާ ސިޓީއަށް އޭނާ ދޫކޮށްލާފައިވަނީ 2011 ވަނަ އަހަރު ކުށްވެރިން ބަދަލުކުރުމުގެ އެއްބަސްވުމެއްގެ ދަށުންނެވެ.

ހަމާސްއިން ބުނި ގޮތުގައި ފަޤްހާގެ ބޮލަށް ހަތަރުފަހަރަށް ބަޑި ޖަހާފައި ވަނީ އަޑު ނީވޭ ބަޑިއަކުންނެވެ.

ހަމާސްގެ އަސްކަރީ ކޯޓުގެ ވެރިޔާ ސުލައިމާން އަވާދު ބުނީ އެ ހުކުމަކީ އެންމެ ފަހުގެ ނިންމުން ކަމަށާއި އެ ނިންމުން އިސްތިއުނާފް ނުކުރެވޭނެ ކަމަށެވެ.