ވީއޭއެމް އެކްސޯގެ ބައެއް މެމްބަރުން އަދި އޮފިޝަލުން ސޮނޭވާ އަށް އަރުވަން ދެކޮޅު ހެދުމުން ފައިނަލް މެޗު ކެންސަލްކޮށްފި

ވޮލީބޯލް އެސޯސިއޭޝަންގެ އެކްސްކޯ ބައެއް މެމްބަރުން އަދި އޮފިޝަންލުން ސޮނޭވާ ފުއްޓަށް އަރުވަން ދެކޮޅު ހެދުމުން އިންޓަ ރިސޯޓް ވޮލީބޯލް މުބާރާތުގެ ޒޯން ފަހެއްގައި އަނަންތަރާ ކިހާވަށް ވިލާސް އަދި ސޮނޭވާ ބައްދަލުކުރުމަށް ހަމަޖެހިފައިވާ ފައިނަލް މެޗު ކެންސަލްކޮށްފި އެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ފައިނަލް މެޗު ކެންސަލްކޮށްފައިވަނީ ވީއޭއެމްގެ އެކްސޯގައި ހިމެނޭ އެކްޓިން ޖެނެރަލް ސެކެޓްރީ އަދި ޓެކްނިކަލް ޑައިރެކްޓަރު މުހައްމަދު ޝަރަފު އާއި ޑިސިޕްލިނަރީ ކޮމެޓީގެ ޗެއާމަން އަލީ ލަތީފުގެ އިތުރުން ވީއޭއެމްގެ އޮފިޝަލުން ކަމަށްވާ ޖަމްޝާދު ޖައުފަރު، އަހުމަދު މިޔާން އަދި ނަސީމް އަލީ އަށް ސޮނޭވާ އަށް އަރުވަން ދެކޮޅުހެދުމުންނެވެ.

ވީއޭއެމްގެ އޮފިޝަލުން އަދި އެކްސްކޯ ބައެއް މެމްބަރުން ފައިނަލް މެޗަށް ސޮނޭވާ އަށް ދިޔުމަށް ދަރަވަންދޫ އަށް އަންގާރަ ދުވަހު ހެނދުނު ވަނީ އައިސްފައެވެ. އެހެންނަމަވެސް އެ ރިސޯޓުން އެ މީހުން ބަލާ އައިސްފައެއްނުވެއެވެ. އެގޮތުން އެކްސްކޯ މެމްބަރުން އަދި އޮފިޝަލުން މިވަގުތު ތިބީ އަނަންތަރާގައެވެ.

އެކްސްކޯ މެމްބަރުން އަދި އޮފިޝަލުންނާއެކު ރާއްޖެއެމްވީގެ ނޫސްވެރިޔަކުވެސް ވަނީ ދަތުރުކޮށްފައެވެ. މީގެއިތުރުން ވީޓީގެ ނޫސްވެރިން ވެސް ފައިނަލް މެޗު ކަވަރު ކުރުމަށް ދަތުރުކުރިއެވެ. ވީޓީވީގެ ނޫސްވެރިން ދަރަވަންދޫގައި ތިބިއިރު، ރާއްޖެއެމްވީގެ ނޫސްވެރިޔާ ހުރީ ވީއޭއެމް އޮފިޝަލުން އަދި އެކްސްކޯ މެމްބަރުންނާއެކު އަނަންތަރާގައެވެ.

ވީއޭއެމް އިން ބުނީ ފައިނަލް މެޗު ކުޅެވޭނީ އެ އެސޯސިއޭޝަންގެ އެކްސްކޯ މެމްބަރުން އަދި އޮފިޝަލުން އެ ރިސޯޓަށް އެރުވިގެން ކަމަށާއި، އެއްވެސް އެކްސޯ މެމްބަރަކަށް އަދި އޮފިޝަލަކަށް އެ ރިސޯޓަށް އަރުވަން ދެކޮޅު ނެހެދޭނެ ކަމަށެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ސޮނޭވާގެ ކޯޗު އިބްރާހިމް ރަޝީދު (ސަތޯ) ވަނީ ވީއޭއެމްގެ އޮފިޝަލުން އަދި އެކްސްކޯގައި ހިމެނޭ ބައެއް މެމްބަރުން ސޮނޭވާއަށް ނޭރުވުމަށް އެ ރިސޯޓަށް އަންގާފައެވެ.

ސަތޯއާ ބޮޑަށް މައްސަލަ ޖެހިފައިވަނީ އެކްޓިންގ ޖެނެރަލް ސެކެޓްރީ ޝަރަފްއާކަމަށްވެސް މައުލޫމާތު ލިބެއެވެ. ޝަރަފް އަކީ ފައިނަލް މެޗުގައި ސޮނޭވާއާ އިދިކޮޅަށް ނިކުންނަ އަނަންތަރާގެ ކުރީގެ ކޯޗެވެ. އޭނާ ވަނީ ފާއިތުވެދިޔަ ދެ އަހަރު އެ ރިސޯޓަށް މުބާރާތް ކާމިޔާބުކޮށްދީފައެވެ. އެގޮތުން ޝަރަފް ފައިނަލް މެޗަށް ގެނައުމަށް ސަތޯ ބޭނުންނުވާ ކަމަށްވެސް މައުލޫމާތު ލިބެއެވެ.

އެހެންނަމަވެސް ރާއްޖެއެމްވީ އަށް މައުލޫމާތު ދެމުން ސަތޯ ބުނީ މެޗު ކެންސަލްވިކަން އޭނާ އަށް ރިސޯޓުން އަންގާފައިނުވާ ކަމަށާއި، އޭނާ މަސައްކަތްކުރަމުން ދަނީ ޓީމު ރަނގަޅަށް ތައްޔާރުކޮށް ފައިނަލް މެޗަށްކަމަށެވެ. އެގޮތުން އޭނާ ބުނީ ފައިނަލް މެޗު ކެންސަލްކޮށްފިނަމަ ރިސޯޓަށް ވަރަށް ބޮޑަށް ގެއްލުން ވާނެ ކަމަށެވެ.

ވީއޭއެމްގެ ބައެއް އެކްސްކޯ މެމްބަރުން އަދި އޮފިޝަލުންނާއި ސަތޯއާ ދެމެދު މައްސަލަތަކެއް މީގެކުރިންވެސް ވަނީ ޖެހިފައެވެ. މީގެއިތުރުން މިހާރު ކުރިޔަށްދާ އިންޓަ ރިސޯޓް ވޮލީބޯލް މުބާރާތުގައި ވީއޭއެމްގެ ބައެއް އޮފިޝަލުންނާ ހަޑިހުތުރު ބަހުން މުއާމަލާތު ކުރުމުން އޭނާ އަށް ވަނީ އެކަން ތަކުރާރުނުކުރުމަށް ނަސޭހަތްވެސް ދީފައެވެ.