ނިކުތީ ތިން ޕޮއިންޓް ހޯދަން، ކޮލިފައިވަނީ ކޮން ބައެއްތޯ ބަލާކަށް ނޫން: ސޮބާ

މެޗަށް ނިކުތީ ތިން ޕޮއިންޓް ހޯދަން ކަމަށާއި، ޕްރެމިއާ ލީގަށް ކޮލިފައިވަނީ ކޮން ކަމެއްތޯ ބަލަން ނޫން ކަމަށް ގްރީން ސްޓްރީޓުގެ ކޯޗް ސޮބާހް މުހަންމަދު (ސޮބާ) ބުނެފިއެވެ.

އެސްޓީއޯ މާލެ ލީގުގެ ފަހު މެޗުގައި ކްލަބް އީގަލްސް އާއި ދެކޮޅަށް ކުޅުނު މެޗް ކާމިޔާބުކުރުމަށްފަހު ނޫސްވެރިންނާއި ވާހަކަ ދައްކަމުން ސޮބާ ބުނީ، ޕްރެމިއާ ލީގުން ޖާގައެއް އޮތީ ކުރިންވެސް ކަށަވަރު ވެފައި ކަމަށާއި ނަމަވެސް 3 ޕޮއިންޓް ލިބެން އޮއްވާ ދޫކޮށްލާކަށް ނުޖެހޭ ކަމަށެވެ. އެގޮތުން، މެޗަށް ނިކުތީ ތިން ޕޮއިންޓް ހޯދަން ކަމަށް ސޮބާ ބުންޏެވެ.

އިތުރަށް ވާހަކަ ދައްކަމުން ސޮބާ ބުނީ، ހާސިލް މިވީ ވަރަށް ބޮޑު އެޗީވްމަންޓެއް ކަމަށާއި، ފުރަތަމަ ފަހަރަށް ފުރަތަމަ ޑިވިޝަނަށް ކޮލިފައިވެ، މާލެ ލީގުގެ 2 ވަނަ މަގާމުގައި އޮވެ ލީގު ނިންމާލަން ލިބުމަކީ ވަރަށް ބޮޑު ހިތްހަމަ ޖެހުމެއް ކަމަށެވެ. ސޮބާ ބުނީ، މުޅި ޓީމުވެސް އަބަދުވެސް މަސައްކަތް ކުރަމުން އައީ ޕްރެމިއާ ލީގަށް ކޮލިފައި ވާއިރު، މުޅި ޓީމުވެސް މޯޓިވޭޝަން ވާ ވަރުގެ ނަތީޖާއެއް ހިފައިގެން ކޮލިފައި ވާން ކަމަށެވެ.

މާލެ ލީގުގެ ފަހު މެޗުގައި އީގަލްސް އާއި ދެކޮޅަށް ކުޅުނު މެޗް އެޓީމުން ކާމިޔާބުކުރީ 1-0 ގެ ނަތީޖާއަކުންނެވެ. އެގޮތުން އެޓީމް ވަނީ ކުޅުނު 14 މެޗުން 27 ޕޮއިންޓް ހަމަކޮށް ވަގުތީ ގޮތުން ތާވަލުގެ އެއްވަނައަށް އަރާފައެވެ. ނަމަވެސް ލީގުގެ ފަހު މެޗުގައި މާޒިޔާ އާއި ނިއު ބައްދަލުކުރާ މެޗުން ނިކުންނަ ނަތީޖާއިން ތާވަލަށް ބަދަލު އަންނާނެ އެވެ. އެގޮތުން ފަހު މެޗުން މާޒިޔާ ނުވަތަ ނިއު މޮޅުވި ނަމަވެސް ގްރިންއަށް 2 ވަނަ މަގާމުގައި އޮވެ ލީގު ނިންމާލެވޭނެއެވެ.