ޣައްޒާގެ ހަނގުރާމަ ހުއްޓުވަން އެމެރިކާގަ އެދުނަސް އެކަމެއް ނުވާނެ: އދ ގެ ސެކްރެޓަރީ ޖެނެރަލް

ޣައްޒާގައި އިޒްރޭލުން ހިންގަމުންދާ ފަނާކުރަނިވި ހަނގުރާމަ ހުއްޓާލުމަށް އެމެރިކާއިން އިޒްރޭލަށް ޕްރެޝަރ ކުރަން ޖެހޭ ކަމަށް އދ. ގެ ސެކްރެޓަރީ ޖެނެރަލް އަންޓޯނިއޯ ގުޓެރެސް ވިދާޅުވެއްޖެއެވެ.

އަލްޖަޒީރާ އަށް ދެއްވި ބަސްދީގަތުމެއްގައި ގުޓަރެސް ވިދާޅުވީ ހަނގުރާމަ ހުއްޓާލުމަށް އެމެރިކާއިން ބާރުއަޅަންޖެހޭ ކަމަށް ވިދާޅުވިޔަސް އެމެރިކާގެ ސިޔާސީ މަސްރަހް ރަނގަޅަށް އެނގިވަޑައިގަންނަވާތީ އެކަން އެގޮތަކަށް ނުވާނެކަން އެމަނިކުފާނަށް ގަބޫލުކުރެއްވޭ ކަމަށެވެ.

ހުކުރު ދުވަހާއި ހޮނިހިރު ވިލޭރޭވެސް އިޒްރޭލުން ގެންދިޔައީ ޣައްޒާ ސްޓްރިޕަށް ހަމަލާތައް ދެމުންނެވެ.

އުތުރުގައިވާ ޣައްޒާ ސިޓީއާއި ދެކުނުގައިވާ ޚާން ޔޫނިސްއަށް ދިން ހަމަލާތަކުގައި ގިނަ އަދަދެއްގެ ފަލަސްޠީނު މީހުން ޝަހީދުވެފައިވާ ކަމަށް އަލްޖަޒީރާ އިން ބުނެއެވެ.

އިޒްރޭލު ސިފައިންގެ ދުއްތުރާތަކާ އެކުވެސް އދ. އިން ބުނަނީ ޣައްޒާގެ ކުޑަކުދިންނަށް ޕޯލިއޯ ވެކްސިން ދިނުމުގެ ފުރަތަމަ މަރުޙަލާ ނިންމާލެވިއްޖެ ކަމުގައެވެ. ފުރަތަމަ ބުރުގައި 12 ދުވަހުގެ ތެރޭގައި 560،000 ކުދިންނަށް ފުރަތަމަ ޑޯޒް ދީފައިވާ ކަމަށް އދ. އިން ހާމަކޮށްފައިވެއެވެ.

އެންމެ ފަހުގެ ރެކޯޑްތަކުން ހާމަވާ ގޮތުގައި ހުސްވި އަހަރުގެ ސެޕްޓެމްބަރު މަހުގެ 7 ވަނަ ދުވަހުން ފެށިގެން އިޒްރޭލުން ޣައްޒާއަށް ދެމުންދާ ހަމަލާތަކުގައި ޝަހީދުވި މީހުންގެ އަދަދު މަދުވެގެން 41،118 ށް ވަނީ އަރާފައެވެ. އޭގެ އިތުރުން އެ ހަމަލާތަކުގައި، 95،125 މީހުން ޒަޚަމްވެފައިވެއެވެ.