އިޒްރޭލު ސިފައިން ޣައްޒާގެ މެދުތެރޭގައި ހުރި އދ އިން ހިންގާ އަލް-ޖައައުނީ ސްކޫލަށް ފައިޓަރ ޖެޓްތަކުގައި ބޮން އަޅައި، މަދުވެގެން 18 މީހުން މަރުވެއްޖެއެވެ. ބޮމުގެ ބާރުގަދަ ކަމާއެކު މަންޒަރު ދުށް މީހުން ބުނީ މި ހަމަލާގައި އަންހެނުންއި ކުޑަކުދިންތައް ކުދިކުދިވެގެން ދިޔަކަމަށެވެ.

ބުދަ ދުވަހުގެ ރޭ މި ސްކޫލަށް ބޮން އެޅިއިރު އެވަގުތަކީ ކޭމްޕްގައި ދިރިއުޅޭ މީހުން ކެއުމަށް މަޑުކޮށްގެން ތިބި ގަޑި ކަމަށްވެއެވެ.

ފަލަސްތީންގެ ރެފިއުޖީން ތޮއްޖެހިފައިވާ މި ކޭމްޕަށް ބޮން އެޅިއިރު މި ތަނަކީ ބައިނަލް އަގްވާމީ ގާނޫނުގެ ދަށުން ރެފިއުޖީންނަށް ހިމާޔަތް ދޭން ޖެހޭ ތަނެއް ކަމަށް ރިޕޯޓްތައް ބުނެއެވެ.

މަރުވި މީހުންގެ ތެރެއިން 6 މީހުންނަކީ އދ ގެ ރެފިއުޖީ އެޖެންސީ (އަންރުވާ) ގެ މުވައްޒަފުންނެވެ. އޭގެ ތެރޭގައި އެ ހިޔާވަހިކަމުގެ މަރުކަޒު ހިންގުމާ ހަވާލުވެ ހުރި ވެރިޔާވެސް ހިމެނެއެވެ. މި ހަނގުރާމައިގައި ފާއިތުވި 11 މަސްދުވަހުގެ ތެރޭގައި އެއް ފަހަރާ އެންމެ ގިނަ އދ ގެ މުވައްޒަފުން މަރުވި ހާދިސާ މިއީ ކަމަށް އެ އެޖެންސީން ބުނެފައިވެއެވެ.

ވަފާ ނިއުސް އޭޖެންސީން ބުނާ ގޮތުގައި، އިޒްރޭލު ސިފައިން ބުދަ ދުވަހުގެ ހަވީރު ޣައްޒާ ސިޓީގެ އެކި ސަރަޙައްދުތަކަށް ވެސް ވަނީ ބޮންއަޅާ، މަދުވެގެން 12 މީހުން ޝަހީދުކޮށް، އަދި އެތައް ބަޔަކު ޒަޚަމްކޮށްލާފައެވެ.

އިޒްރޭލުން ޣައްޒާއަށް ދެމުންދާ ހަމަލާތަކުގައި ޝަހީދުވި މީހުންގެ އަދަދު މަދުވެގެން 41،084ށް ވަނީ އަރާފައެވެ. އޭގެ އިތުރުން މި ހަމަލާތަކުގައި، 95،029 މީހުންނަށް ޒަޚަމްވެފައިވެއެވެ.