މާލޭގައި ދެ ސައިކަލެއް ޖެހި ހިނގި އެކްސިޑެންޓެއްގައި މީހަކަށް އަނިޔާވެއްޖެ
މި އެކްސިޑެންޓުގައި އެކަކަށް އަނިޔާވެފައިވޭ
ދެ ސައިކަލެއް ޖެހި ހިނގި އެކްސިޑެންޓެއް- ފައިލް ފޮޓޯ
މާލޭގައި ދެސައިކަލެއް ޖެހި ހިނގި ނުރައްކާތެރި އެކްސިޑެންޓުގައި މީހަކަށް އަނިޔާވެއްޖެއެވެ.
ފުލުހުން ބުނީ އާދިއްތަ ދުވަހުގެ ހަވީރު 6:30 ހާއިރު މާފަންނު ބަސް ޓާމިނަލް ކައިރީ ދެ ސައިކަލެއް ޖެހި އެކްސިޑެންޓެއް ހިނގާފައިވާ މައްސަލަ ރިޕޯޓުކޮށްފައިވާ ކަމަށެވެ.
ރާއްޖެއެމްވީއަށް ފުލުހުންގެ މީޑިއާ އޮފިޝަލް ވިދާޅުވީ މިއެކްސިޑެންޓުގައި އެކަކަށް އަނިޔާވެފައިވާ ކަމުގެ މައުލޫމާތު ލިބިފައިވާ ކަމަށެވެ. އަދި އެސަރަހައްދުގައި ފުލުހުން މިހާރު ހަރަކާތްތެރިވަމުންދާއިރު، އިތުރު މައުލޫމާތުތައް ފަހުން ހާމަ ކުރާނެ ކަމަށެވެ.
މި އެކްސިޑެންޓްގައި އަނިޔާވި މީހާއަށް ފަރުވާ ދިނުމަށް އައިޖީއެމްއެޗަށް ގެންގޮސްފައިވާ ކަމަށް ފުލުހުން ބުނެއެވެ. ނަމަވެސް އެމީހާއަށް ލިބުނު އަނިޔާގެ ތަފްސީލު ވަނީ ލިބޭގޮތް ނުވެފައެވެ.
މި އެކްސިޑެންޓް ފުލުހުން އިތުރަށް ތަހުގީގު ކުރަމުންދާއިރު، މިހާރަކަށް އައިސް މާލެސިޓީގައި ހިނގާ އެކްސިޑެންޓްގެ އަދަދު ވަނީ އިތުރުވެފައެވެ. އަދި 4 ސެޕްޓެންބަރު 2024 ވީ ބުދަ ދުވަހުގެ ރޭ 00:53 ހާއިރު މާލޭގައި ހިނގި އެކްސިޑެންޓެއްގައި 21 އަހަރުގެ ޒުވާން ފިރިހެނެއް މަރުވެފައިވާއިރު، މިދިޔަ ހުކުރުވިލޭރޭ ދަންވަރު ހުޅުމާލޭގައި ހިނގި ނުރައްކާތެރި އެކްސިޑެންޓެއްގައި 23 އަހަރުގެ ޒުވާން ފިރިހެނެއް ވަނީ މަރުވެފައެވެ.
ފުލުހުން މައުލޫމާތު ދޭ ގޮތުގައި މި އަހަރުގެ މިހާތަނަށް 1907 ޓްރެފިކް އެކްސިޑެންޓް ރިޕޯޓުކޮށްފައިވެއެވެ.
